ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កិច្ចសន្ទនា ឬទំនាក់ទំនងមានប្រសិទ្ធភាព ជាចំណែកសំខាន់មួយ និងជាទម្លាប់ដ៏ចាំបាច់ដែលមនុស្សត្រូវរៀនសូត្រជាប្រចាំ។ កាលដែលមានវិធីក្នុងការធ្វើទំនាក់ទំនងជាមួយសង្គមប្រកបដោយទំនុកចិត្ត និងផាសុកភាព គឺជាការភ្ជាប់កិច្ចសហការគ្នាក្នុងរយៈពេលវែង ក៏ដូចជាការអភិវឌ្ឍសមត្ថភាពផ្ទាល់ខ្លួន។ មិនថានៅកន្លែងធ្វើការ នៅជាមួយសមាជិកគ្រួសារ ឬក៏នៅក្នុងចំណោមមិត្តភក្តិនោះទេ ជំនាញនៃការប្រាស្រ័យទាក់ទងប្រកបដោយប្រសិទ្ធភាព គឺជាតម្រូវការចាំបាច់ដែលគួរតែយកចិត្តទុកដាក់។ តាមរយៈគេហទំព័រ BESTLIFE បានបង្ហាញគន្លឹះ៦ចំណុច ដើម្បីពង្រឹងសមត្ថភាព នៃការទំនាក់ទំនងជាមួយមនុស្សថ្មីៗ។
១. អនុវត្តន៍ជាប្រចាំអំពីជំនាញស្តាប់ដ៏សកម្ម ៖ ការស្តាប់ដោយយកចិត្តទុកដាក់ និងផ្តល់ចំណាប់អារម្មណ៍យ៉ាងពេញលេញ នៅពេលមាននរណាម្នាក់កំពុងនិយាយ គឺជាឥទ្ធិពលល្អជំរុញឱ្យអ្នកដែលកំពុងនិយាយទទួលបានអារម្មណ៍ថា គ្រប់ភាគីទាំងអស់ កំពុងស្ថិតក្នុងបច្ចុប្បន្នភាព, នេះហើយ គឺជាការស្តាប់មួយដ៏សកម្ម។ ទន្ទឹមគ្នានឹងការបង្ហាញចំណាប់អារម្មណ៍ទៅកាន់អ្នកនិយាយ ជាកិច្ចបន្ទាប់គឺការបង្ហាញភាសាកាយវិការ បញ្ចៀសការកាត់ចង្វាក់ដោយសម្លេងរំខានណាមួយ (សម្លេងទូរស័ព្ទ )។ ត្រង់ចំណុចនេះដែរ ជំនាញស្តាប់ដ៏សកម្ម ជួយឱ្យទំនាក់ទំនងមានភាពរឹងមាំ កាត់បន្ថយការយល់ច្រឡំ និងបង្កើនទំនុកចិត្តរវាងគ្នានិងគ្នា។
២. ដកដង្ហើម វែងៗ ឱ្យអារម្មណ៍ធូរស្រាល ៖ ការកើតមានអារម្មណ៍មិនស្រណុកចិត្ត នៅពេលចុះចូលក្នុងបរិយាកាសថ្មីៗ គឺជារឿងធម្មតាសម្រាប់មនុស្សស្ទើរតែគ្រប់គ្នា។ ដូច្នេះការសម្រួលចិត្ត ដកដង្ហើមឱ្យវែងៗបន្ថយភាពតានតឹង និងពង្រឹងស្មារតីខ្លួនឯងដើម្បីបន្សាំខ្លួន ជាមួយបរិយាកាសដែលមិនមានផាសុកភាព។
៣. បង្កើនទំនុកចិត្តផ្ទាល់ខ្លួន ៖ គ្រប់គ្នាចង់ទទួលបានអារម្មណ៍ល្អចំពោះខ្លួនឯង ពេញចិត្តចំពោះខ្លួនឯង ប៉ុន្តែបរិយាកាសសង្គមខាងក្រៅ ពេលខ្លះ បានបណ្តាលឱ្យអារម្មណ៍ធ្លាក់ចុះ បង្កបាននូវការប្រៀបធៀប បន្ទាប់មកលោកអ្នកក៏សង្កេតឃើញកត្តាជាច្រើនដែលត្រូវបំពេញបន្ថែមចំពោះខ្លួនឯង។ បាត់បងទំនុកចិត្តជាកត្តានាំឱ្យមនុស្សកាត់បន្ថយសមត្ថភាពក្នុងការទំនាក់ទំនងជាមួយមនុស្សថ្មីៗ ដែលជាហេតុបញ្ជាក់ឱ្យដឹងថា ដល់ពេលហើយដែលត្រូវពង្រឹងទំនុកចិត្តរបស់អ្នកឡើងវិញ។
៤. សង្កេតអ្នកដ៏ទៃតាមរយៈកិច្ចសន្ទនា ៖ ការសង្កេតមើលរបៀបដែលអ្នកដ៏ទៃធ្វើប្រាស្រ័យទាក់ទង ទាំងភាសាកាយវិការ និងពាក្យសម្តី ជាពិសេសនៅពេលកិច្ចសន្ទនាកាន់តែស៊ីជម្រៅ។ បន្ថែមពីនោះ ត្រូវពិនិត្យទៅលើអារម្មណ៍នៃបុគ្គលនីមួយៗ ការយកចិត្តទុកដាក់លើចំណុចទាំងនេះ គឺជាដើមចមនាំឱ្យងាយក្នុងការយល់ចិត្តអ្នកដទៃបានល្អ។ វិធីសាមញ្ញក្នុងការសង្កេតបន្ថែមគឺ មើលរបៀបនិយាយ របៀបសួរសំណួរ របៀបឆ្លើយតប ការកាត់សម្តីគ្នា និងរបៀបដែលគេសម្របសម្រួលគ្នា។
៥. បំផុសសំណួរបើកទូលាយ ៖ ការប្រើប្រាស់សំណួរបើកចំហ ជាវិធីសាស្រ្តដ៏មានប្រសិទ្ធភាពក្នុងការធ្វើឱ្យអ្នកដទៃមានឱកាសឆ្លើយឆ្លងប្រកបដោយអារម្មណ៍កក់ក្តៅ, ជួយអ្នករៀនសូត្រពីអ្នកដទៃ ហើយអ្វីដែលសំខាន់នោះ គឺ ពង្រឹងឱ្យទំនាក់ទំនងកាន់តែជិតស្និទជាមួយមិត្តរួមអាជីព មិត្តរួមថ្នាក់ ឬក៏មនុស្សថ្មីៗ ដែលទើបតែនឹងស្គាល់គ្នា។
៦. ព្យាយាមរកចំណុចរួមដូចគ្នា ៖ ការចូលរួមជាមួយក្រុមណាមួយ ឬក៏ក្លឹបសិក្សាដែលខ្លួនចូលចិត្ត គឺជាឱកាសមួយជួយឱ្យមនុស្សគ្រប់វ័យពង្រឹងបាននូវទំនាក់ទំនងក្នុងសង្គម ពីព្រោះការចែករំលែកចំណុចរួមគ្នាកាន់តែផ្តល់នូវភាពងាយស្រួល និងផាសុកភាព នៅពេលដែលបុគ្គលនីមួយៗបានរកឃើញថា ខ្លួនមានចំណូលចិត្តដូចគ្នា ឬស្រដៀងគ្នា ដូចជា ប្រភេទកីឡា ភាពយន្ត ឬសៀវភៅជាដើម។ ការរកចំណុចរួមគ្នាធ្វើឱ្យទំនាក់ទំនងមានភាពរឹងមាំ និងភាពងាយស្រួល៕
