ជាធម្មតានៅពេលចាប់ផ្តើមឆ្នាំថ្មី វាក៏ជាពេលដ៏សាកសមមួយ ក្នុងការបញ្ជូលរូបភាពល្អៗទៅក្នុងទម្លាប់ថ្មីៗ ក៏ដូចជាគោលដៅ ក្នុងការថែទាំសុខភាព។ តាមរយៈគេហទំព័រ My Health បានបង្ហាញគន្លឹះសាមញ្ញៗក្នុងការជំរុញលោកអ្នក ឱ្យអនុវត្តន៍សកម្មភាពដែលបានរួមចំណែកធ្វើឱ្យរបៀបរស់នៅមានភាពរស់រវើកជាងមុន។

១. របបអាហារមានសារធាតិចិញ្ចឹមត្រូវតែមានភាពចម្រុះ ៖ អាហារដែលផ្តល់សារធាតុចិញ្ចឹមឆ្លើយតបនឹងតម្រូវការរាងកាយ ក្នុងសភាពច្រើនប្រភេទ ដូច្នេះត្រូវផ្តល់ឱកាសឱ្យខ្លួនឯងទទួលបានបទពិសោធន៍អាហារដែលមានចម្រុះបែបដូចគ្នា ដើម្បីកាត់បន្ថយភាពធុញទ្រាន់ដែរ។ ម៉្យាងវិញទៀត ស្ថានភាពនៃសុខភាពមនុស្សមានភាពខុសប្លែកគ្នា ហើយតម្រូវការអាហារក៏មានភាពភាពខុសប្លែកគ្នាដែរ។ វិធីជំរុញឱ្យកាន់តែមានប្រសិទ្ធភាព គឺទៅពិនិត្យសុខភាពដើម្បីឱ្យកាន់តែច្បាស់ពីប្រសិទ្ធភាពនៃអាហារដែលត្រូវទទួលទាន។

២. ទម្លាប់ទទួលទាននៅផ្ទះជំនួសឱ្យការចេញទៅក្រៅ ៖ ការចម្អិនអាហារនៅផ្ទះ មិនត្រឹមតែជួយរក្សាអនាម័យ ​និងការថែទាំសុខភាពប៉ុណ្ណោះទេ ប៉ុន្តែបានរួមចំណែកយ៉ាងខ្លាំងទៅកាន់ការសន្សំថវិកា។​ ដើម្បីឱ្យកាន់តែមានភាពងាយស្រួលក្នុងចំណុចនេះ ឬក៏កាត់បន្ថយភាពស្មុគស្មាញ លោកអ្នកអាចរៀបចំផែនការប្រចាំថ្ងៃ នៃប្រភេទមុខម្ហូបទៅក្នុងសប្តាហ៍នីមួយៗ នៅពេលមានផែនការរៀបរាប់លម្អិត នោះក៏ផ្តល់នូវភាពងាយស្រួល ក្នុងការដើរផ្សារទិញគ្រឿងទេសផងដែរ។ ផែនការសកម្មភាពធ្វើម្ហូបនៅផ្ទះ បានរួមចំណែកថែទាំសុខភាពរាងកាយ កាត់បន្ថយការចំណាយ និងមានភាពងាយស្រួលដល់ការរៀបចំផែនការហិរញ្ញវត្ថុ។

៣. កាត់ទម្លាប់ញ៉ាំផ្អែម ៖ ជារឿងទូទៅហើយ ដែលមនុស្សបានដឹងថា ពិសាជាតិស្ករច្រើនពេក អាចបណ្តាលឱ្យឡើងទម្ងន់ ឬលើសទម្ងន់ រួមទាំងបណ្តាលឱ្យពុកធ្មេញ កើតជំងឺទឹកនោមផ្អែមប្រភេទទី២ ជំងឺលើសឈាម និងបញ្ហាសុខភាពផ្សេងៗទៀត។ ទោះបីជាមិនអាចកាត់ផ្តាច់អាហារដែលមានជាតិស្ករបានទាំងស្រុងក៏ពិតមែន ប៉ុន្តែគេអាចកាត់បន្ថយតាមរយៈសកម្មភាពមួយចំនួនដូចជា ឧស្សាហ៍ពិនិត្យកម្រិតជាតិស្ករក្នុង​ផលិតផលនីមួយៗដែលបានកំណត់ មុននឹងទទួលទាន និងព្យាយាមជ្រើសអាហារដែលគេដាក់ថា គ្មានជាតិស្ករជាដើម។

៤. អាហារសម្រន់ផ្ទុកក្នុងផ្ទះគួរតែគិតឱ្យលម្អិតមុនជ្រើសយក ៖ ពេលដែលទំនេរនៅផ្ទះម្នាក់ឯង ឬក៏ពេលអផ្សុក គឺជាឱកាសមួយដែលរុញច្រានចិត្តមនុស្សឱ្យស្វែងរកអាហារសម្រន់មកទទួលទាន ទោះបីជារាងកាយមិនទាន់ត្រូវការអាហារក៏ដោយ។ ដូច្នេះបុគ្គលខ្លួនឯងផ្ទាល់ត្រូវមានវិធីសាស្រ្តក្នុងការដោះស្រាយបញ្ហានេះ ដោយឡែកការជ្រើសប្រភេទអាហារ ដែលផ្តល់នូវផលវិជ្ជមានទៅកាន់សុខភាព ឬសារធាតុល្អដូចជា ជាតិសរសៃ និងប្រូតេអ៊ីនខ្ពស់ ក៏អាចកាត់បន្ថយហានិភ័យខ្លះៗទៅកាន់រាងកាយដែរ។

៥. ជ្រើសនរណាម្នាក់ដែលអាចជំរុញសក្តានុពល ៖​ ការព្យាយាមដើម្បីខ្លួនឯង ជាចំណុចល្អហើយ ប៉ុន្តែយូរ ឬឆាប់ ថាមពលនឹងថមថយនៅពេលណាមួយ។ ដូច្នេះត្រូវមានវិធីសាស្រ្តក្នុងការទប់ទល់ដូចគ្នា ហើយការប្រើប្រាស់ថាមពលខាងក្រៅ ដូចជាការជំរុញចិត្តពីគ្រួសារ ពីមនុស្សស្និទ្ធស្នាល សុទ្ធសឹងតែជាចំណែកសំខាន់ ក្នុងការជួយឱ្យរក្សាបាននូវទម្លាប់ទទួលទានល្អៗរៀងរាល់ថ្ងៃ។

៦. ពិនិត្យតាមដានខ្លួនឯង ៖ ក្នុងករណីដែលមានការព្រួយបារម្ភខ្លាំងពាក់ព័ន្ធនឹងទម្លាប់មិនល្អនៃការទទួលទានអាហារ អ្វីដែលគួរអនុវត្តន៍នៅត្រង់ចំណុចនេះ គឺធ្វើកាលវិភាគតាមដានអាហារដែលបានទទួលទានរួច តាមរយៈកម្មវិធីឌីជីថលណាមួយ បន្ទាប់មកសង្កេតរាល់ប្រភេទអាហារ និងបរិមាណដែលបានទទួលទាន ធ្វើបែបនេះជាការដាស់តឿនស្មារតីកុំឱ្យទទួលទានចំណីចំណុកលើសពេក ឬក៏ការជ្រើសអាហារបន្ថែមដើម្បីអភិវឌ្ឍន៍សុខភាពរាងកាយ៕