តាមរយៈការកាត់បន្ថយការចំណាយដែលមិនចាំបាច់ កាត់បន្ថយការចំណាយលើការរស់នៅ បង្កើនការសន្សំ និងវិនិយោគលើខ្លួនឯង, ការរស់នៅបែបតិចនិយម (Minimalist) អាចជាផ្លូវឆ្ពោះទៅរកឯករាជ្យផ្នែកហិរញ្ញវត្ថុ និងសន្តិភាពផ្លូវចិត្ត។ 

តើអ្វីជារបៀបរស់នៅបែបតិចនិយម ឬ Minimalist ?

ស្ថាបត្យករ តាំង ចុងសាន បានឱ្យនិយមន័យគោលការណ៍តិចនិយមថា វាជាការរស់នៅប្រកាន់គោលការណ៍តិច ពោលគឺជាការរស់នៅមានចំណង់តិច ប៉ុន្តែទទួលបានផលច្រើន ឬមានន័យជាភាសាអង់គ្លេសថា «Less is more» ។ ក្នុងន័យនេះ លោកចង់សង្កត់ធ្ងន់ថា យើងត្រូវលះបង់នូវអ្វីដែលមិនចាំបាច់សម្រាប់ការរស់នៅ ហើយផ្តោតលើអ្វីដែលចាំបាច់ ហើយផ្ដល់គុណតម្លៃសម្រាប់ជីវិត។ ម្យ៉ាងទៀត អ្វីដែលយើងមាន គួរតែប្រើឱ្យអស់ពីលទ្ធភាព និងស្គាល់ពីតម្រូវការជាក់ស្តែង ហើយមិនខ្ជះខ្ជាយ។ 

ឥទ្ធិពលនៃគោលការណ៍រស់នៅតិចនិយម លើសុខភាពហិរញ្ញវត្ថុ

បើតាមលោក គីម ដារ៉ា ស្ថាបនិកសាលាបង្វឹក Startup Community មានប្រសាសន៍ថា បើនិយាយតាមទម្រង់ចិត្តសាស្ត្រ នៅពេលរស់នៅប្រកាន់គោលការណ៍តិចនិយម មនុស្ស នឹងមិនចាំបាច់ប្រៀបធៀប និងបង្អួតជីវិតខ្លួនឯងឱ្យអ្នកដទៃមើលឃើញ។ 

លោកបន្តថា ​​នៅពេលឈប់ប្រៀបធៀប ឈប់បង្អួត គេនឹងដឹងថា សម្ភារ ម្ហូបអាហារ និងរបស់ប្រើប្រាស់ មិនចាំបាច់ថ្លែ ក៏យើងអាចប្រើ និងញ៉ាំបាន អ្វីដែលសំខាន់ គឺមានគុណភាព និងរស់នៅស្រួល។

ការរស់នៅ ដោយត្រូវបង្អួត បង្ហាញអ្នកដទៃ បានត្រឹមតែល្អមើលប៉ុណ្ណោះ វាមិនមែនជាសន្តិភាពផ្លូវចិត្ត ហើយក៏មិនមែនជាភាពរីករាយពិតប្រាកដដែរ។ ការយល់បែបនេះ យើងនឹងអាចរស់នៅដោយសាមញ្ញ ព្រមទាំងមានសុខភាពហិរញ្ញវត្ថុល្អ។

លោក គីម ដារ៉ា

សម្រាប់ស្ថាបត្យករ តាំង ចុងសាន ដែលលោកចូលចិត្តរស់នៅបែបតិចនិយមនេះដែរ បានចែករំលែកថា តាមបទពិសោធជាក់ស្ដែងរបស់លោក ការរស់នៅបែបតិចនិយម មានឥទ្ធិពលវិជ្ជមានមកលើហិរញ្ញវត្ថុលោកខ្លាំង ជាពិសេសក្នុងការបរិបទរស់នៅបែបឌីជីថល ដែលងាយស្រួលបញ្ជាទិញរបស់របរគ្រប់បែបយ៉ាង ។ លោកយល់ថាការរស់នៅបែបតិចនិយម គឺល្អ, ល្អត្រង់ថា នៅពេលមុននឹងសម្រេចចិត្តទិញអ្វីមួយ លោកតែងតែសួរសំណួរបីមកខ្លួនឯងថា តើរបស់នោះចាំបាច់ឬទេ? ផ្ដល់គុណតម្លៃសម្រាប់ខ្ញុំឬទេ? ហើយរបស់នោះមានគុណភាពខ្ពស់ ឬទេ? ប្រសិនបើស្ថិតក្នុងចំណុចទាំងបីនេះ លោកនឹងទិញរបស់នោះ។

ការអនុវត្តទម្លាប់សួរខ្លួនឯងមុនទិញអ្វីមួយ ធ្វើឱ្យស្ថានភាពហិរញ្ញវត្ថុរបស់ខ្ញុំប្រសើរឡើង និងមានលំនឹង។ ដូច្នេះ ថវិកា ដែលសល់ពីការចំណាយចាំបាច់ ខ្ញុំអាចប្រើ សម្រាប់គ្រាអាសន្ន ដែលអាចកើតឡើងគ្រប់ពេល។

លោក តាំង ចុងសាន

ហេតុផលដែលមនុស្សសម័យថ្មី គួរជ្រើសរើសគោលការណ៍តិចនិយម

កញ្ញា សេង ហ្គិចលី ជាអ្នកផលិតមាតិកា ដែលមានបទពិសោធអនុវត្តទម្លាប់រស់នៅតិចនិយមប្រមាណ ៥ឆ្នាំ បានបង្ហាញការយល់ឃើញថា ការរស់នៅបែបតិចនិយម គឺពិតជាល្អសម្រាប់យុវជន និងមនុស្សសម័យថ្មី​ ជាពិសេស សម្រាប់អ្នកដែលរស់នៅក្នុងបន្ទុកឪពុកម្ដាយ អ្នកដែលទើបតែចេញធ្វើការ ឬទើបតែមានចំណូលដំបូងៗ ប្រសិនបើគាត់អាចប្ដូរមករស់នៅបែបតិចនិយមបាន គឺវាពិតជាអាចជួយគាត់កាត់បន្ថយការចំណាយបានច្រើន។

កញ្ញាបន្តថា ដូច្នេះ ថវិកាដែលនៅសល់ យើងអាចយកទៅប្រើលើសកម្មភាព ដែលផ្ដល់ជាប្រយោជន៍ផ្សេងទៀត ដូចជា ការវិនិយោគលើសមត្ថភាពខ្លួនឯង ទិញសៀវភៅ ចូលរួមវគ្គសិក្សាខ្លីៗ ឬរៀនជំនាញទន់ នោះការចំណាយរបស់យើងនឹងរឹតតែមានប្រសិទ្ធភាព និងផ្ដល់ប្រយោជន៍ ដល់យើងនៅថ្ងៃអនាគត។ 

មិនត្រឹមតែសម្រាប់ការរស់នៅប៉ុណ្ណោះទេ ការរស់នៅបែបតិចនិយម គឺល្អសម្រាប់សង្គមទាំងមូលតែម្ដង ហើយលើសពីការជួយដល់សង្គម គឺជួយបរិស្ថានរស់នៅរបស់យើងផងដែរ។ ជាក់ស្ដែង ប្រសិនបើយើងមានទម្លាប់រស់នៅតិចនិយម ពិភពលោកនឹងល្អជាងមុន ស្រស់ស្អាតជាងមុន អាចកាត់បន្ថយប្លាស្ទិក និងកាកសំណល់ផ្សេងៗ ហើយសុខភាពផ្លូវកាយ និងផ្លូវចិត្តរបស់យើងក៏ប្រសើរឡើងដូចគ្នាដែរ។ នេះជាការលើឡើងរបស់ ស្ថាបត្យករ តាំង ចុងសាន៕