ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការជជែកអំពីបញ្ហាបុរស និងសុខភាពផ្លូវចិត្តរបស់ពួកគាត់ ហាក់មិនសូវមានភាពទូលំទូលាយនោះទេក្នុងសង្គមបច្ចុប្បន្ន ការយល់ថា វាជារឿងដែលមិនគួរនិយាយ បានជំរុញឱ្យកើតមាននូវផលអវិជ្ជមាន និងនាំឱ្យបុរសមានភាពតាងតឹងកាន់តែច្រើន។ តួយ៉ាង នៅពេលដែលបុរសមានបញ្ហាប្រេះឆា នៅក្នុងទំនាក់ទំនង បណ្តាលឱ្យពួកគាត់មានសម្ពាធ និងបញ្ហាផ្លូវចិត្ត និងឈានទៅរកការបាក់ទឹកចិត្ត ឬបាត់បង់ចំណាប់អារម្មណ៍ទៅលើអ្វីមួយ។
យោងតាមគេហទំព័រ marriage បានឱ្យដឹងថា កត្តាដែលនាំឱ្យមនុស្សមួយចំនួនគិតថាបុរសមិនសូវត្រូវការ ការគាំទ្រផ្នែកផ្លូវចិត្ត ឬពួកគាត់មានភាពរឹងមាំស្រាប់ពីកំណើត អាចបណ្តាលមកពីបទដ្ឋានយេនឌ័រ ឬផ្នត់គំនិតដែលគេយល់ឃើញតៗគ្នា និងបទពិសោធន៍របស់ក្រុមមនុស្សក្នុងជ្រុងណាមួយ។ ដូច្នេះហើយ ធ្វើឱ្យបុរសមួយចំនួនមិនសូវស្វែងរកជំនួយដើម្បីជំនះនឹងបញ្ហាសុខភាពផ្លូវចិត្តនោះទេ។
ក្រោយទំនាក់ទំនងប្រេះឆា តើបុរសប៉ះពាល់សុខភាពផ្លូវចិត្តយ៉ាងដូចម្តេច?
ពេលបុរសជួបទំនាក់ទំនងមិនសមប្រកប ឬប្រេះឆា អាចបណ្តាលឱ្យបុរសមួយចំនួនប្រឈមនឹងភាពកម្សោយនៃការគ្រប់គ្របស្ថានភាពទៅតាមកាលៈទេសៈរៀងៗខ្លួន ដោយមានអាការៈដូចជា មានអារម្មណ៍កើតទុក្ខ ខឹង និងបាត់បងចំណាប់អារម្មណ៍ទៅលើអ្វីមួយ ដែលទាំងនេះហើយ ជាសញ្ញាបង្ហាញថា ពួកគាត់កំពុងឈានទៅរកបញ្ហាផ្លូវចិត្ត និងជំរុញឱ្យមានមន្ទិលចំពោះគុណតម្លៃខ្លួនឯង និងមិនច្បាស់អំពីអត្តសញ្ញាណខ្លួនឯង។ អារម្មណ៍ទាំងអស់នេះនឹងឆ្លើយតបដោយឯងៗ ហើយវានឹងកើតមានកាន់តែខ្លាំងឡើងៗ ឬអូសបន្លាយច្រើនជាងមុនទៀតផង ជាពិសេសនៅពេលមានរឿងរ៉ាវបង្កជាភាពឈឺចាប់ណាមួយ បុរសអាចនឹងទទួលរង់នូវអារម្មណ៍តាងតឹងខ្ពស់ និងរ៉ាំរ៉ៃ ហើយមានផលប៉ះពាល់យ៉ាងខ្លាំង ទៅកាន់សុខភាពផ្លូវចិត្ត និងសុខភាពផ្លូវកាយរបស់ពួកគាត់។
ជាងនេះទៅទៀត ទំនាក់ទំនងបែកបាក់ អាចបណ្តាលឱ្យបុរសកាត់ផ្តាច់ទំនាក់ទំនងចោលពីមនុស្សជុំវិញខ្លួន និងរក្សាគម្លាតខ្លួនឯងចេញឆ្ងាយពីទំនាក់ទំងសង្គម ហើយនាំឱ្យកើតមានអារម្មណ៍ឯកា និងបាក់ទឹកចិត្ត។ គេអាចសន្មត់បានថា នៅពេលដែលបុរសបាន វិនិយោគពេលវេលានិងថាមពល ទាំងអស់ ទៅក្នុងទំនាក់ទំនងហើយបន្ទាប់មកក៏ដឹងថាមិនអាចបន្តទៅមុខបាន នោះនឹងកាន់តែធ្វើឱ្យពួកគាត់យល់ថា ត្រូវបានគេផាត់ចោល និងទទួលរងរាល់ការបដិសេធ។
ប្រសិនបើបានដឹង ឬសង្កេតឃើញថា ក្រោយទំនាក់ទំនងប្រេះឆាធ្វើឱ្យប៉ះពាល់សុខភាពផ្លូវចិត្ត សូមកុំមានមន្ទិលក្នុងការស្វែងរកជំនួយពីមជ្ឈដ្ឋានខាងក្រៅ ដើម្បីទាញយកថាមពលត្រឡប់មកវិញ។ អ្នកដែលអាចជួយបាន មានដូចជា ការជជែកជាមួយមនុស្សជិតស្និត មិត្តភ័ក្តិ សមាជិកគ្រួសារ អ្នកចិត្តសាស្រ្ត ឬអ្នកជំនាញវិជ្ជាជីវៈណាមួយ ដែលអាចប្រឹក្សាបាន បើបណ្តោយឱ្យអាការៈសម្ពាធផ្លូវចិត្តកាន់តែយូរទៅៗ គឺអាចឈានដល់សម្ពាធរ៉ាំរ៉ៃ ដែលពិបាកនឹងព្យាបាល៕
