មនុស្សស្ទើតែគ្រប់គ្នា តែងទទួលបានបទពិសោធន៍ការប៉ះពាល់អារម្មណ៍ពីមួយពេលទៅមួយពេល ។ បើអ្នករកឃើញថា ចិត្តលោកអ្នកទំនងជាបោកបក់ទៅរកចំណុចមិនល្អ ហើយជះផលអវិជ្ជមានទៅដល់ទំនាក់ទំនង ឬក៏គុណភាពនៃជីវិតក្នុងការរស់នៅ គេហទំព័រ insider បានបកស្រាយនូវវិធីមួយចំនួនក៏ដូចជាលំហាត់ក្នុងការអនុវត្តដើម្បីរក្សាលំនឹងផ្លូវចិត្តរបស់អ្នកឱ្យប្រសើរជាងមុន។

១. គូសវាសរូបភាពខ្លួនឯងសម្រាប់អនាគត ៖ ចំណុចនេះមិនមែនមានន័យថា ផ្តោតលើអនាគតហើយបំភ្លេចចោលបច្ចុប្បន្នភាពនោះទេ! ប៉ុន្តែគឺចង់សំដៅលើ ទុកពេលបន្តិចដើម្បីសម្លឹងវិភាគ ឬក៏ស្រមៃអំពីអនាគត នៃខ្លួនឯងសម្រាប់ពេលខាងមុខ នៅក្នុងចំណុចជាក់លាក់ណាមួយ គ្រាន់នឹងជំរុញឱ្យអ្នកបានប្រព្រឹត្តិសកម្មភាពបច្ចុប្បន្នដែលឆ្លើយតបនឹងអ្វីដែលគ្រោងចង់បាន។ មិនតែប៉ុណ្ណោះ ការគូសវាសរូបភាពខ្លួនឯងសម្រាប់អនាគត វាក៏ជួយឱ្យលោកអ្នក មានការគិតមួយដែលមានភាពបត់បែនទៀតផង និងលើកទឹកចិត្តឱ្យសម្លឹង មើលពន្លឺរស្មីនៃជីវិតក្នុងរូបភាពវែងឆ្ងាយ។

២. នឹកដល់មនុស្សដែលអ្នកចូលចិត្ត ៖ ក្នុងន័យនេះចង់សំដៅថា នឹកទៅដល់កាយវិការ ឬក៏ភាសាណាមួយ របស់មនុស្ស ដែលអ្នកចូលចិត្ត ឬនឹកទៅដល់មនុស្សដែលមានក្ដីបារម្ភអំពីអ្នកយ៉ាងជាក់ប្រាកដ ដែលមានដូចជា សមាជិកគ្រួសារ មិត្តជិតស្និត ឬក៏ដៃគូស្នេហាជាដើម។

៣. ទុកចន្លោះឱ្យខ្លួនឯង ៖ អនុញ្ញាតឱ្យខ្លួនឯងមានពេលគ្រប់គ្រាន់ក្នុងការសរសេរអំពីអ្វីដែលបានកើតឡើងរៀងរាល់ថ្ងៃ យ៉ាងហោចណាស់១៥នាទីក្នុងមួយថ្ងៃ ដោយកត់ត្រាអំពីអារម្មណ៍ និងសកម្មភាព ទាំងរឿងសប្បាយ និងរឿងកើតទុក្ខ ដើម្បីផ្ទៀងផ្ទាត់អំពីស្ថានភាពដែលបានជួបប្រទះប្រចាំថ្ងៃ។

៤. លះផ្នត់គំនិតអវិជ្ជមាន ៖ បើផ្តោតអំពីរឿងមិនល្អច្រើនពេក ក៏ជាចំណែកមួយប៉ះពាល់ដល់ផ្នត់គំនិតមិនល្អជាច្រើន នៅពេលមានអារម្មណ៍មិនល្អកើតឡើង ព្យាយាមបង្វឹកខ្លួនឯង ឱ្យមើលអំពីទស្សនៈវិជ្ជមានឱ្យបានច្រើនជ្រុង។

៥. គិតអំពីសេចក្ដីស្ងប់ ៖ បណ្តុះស្មារតីឱ្យមានការសង្កេត និងមានមេត្តាទៅកាន់ខ្លួនឯង គឺជាកូនសោដ៏សំខាន់ ក្នុងការការពារអារម្មណ៍មិនល្អ។ មួយវិញទៀត ធ្វើសមាធិឱ្យបានទៀងទាត់ ទោះបីជាក្នុងរយៈពេលខ្លីក៏ដោយ ព្រោះវាជាបំណែកបង្រៀនអ្នកឱ្យមានស្ថេរភាពផ្លូវចិត្ត៕