ខួរក្បាលមនុស្ស គឺជាបណ្តុំនៃផ្នែកសំខាន់ៗទៅកាន់សារពាង្គកាយទាំងមូល ក្នុងការឆ្លើយតបនឹងតម្រូវការ នៃរាងកាយ និងការចងចាំ។ ការសិក្សាមួយបានបង្ហាញថា ភាពជាក់លាក់ នៃការបរិភោគអាហារ និងកាត់បន្ថយអ្វីដែលមិនគួរបរិភោគ មានឥទ្ធិពលដល់ការរក្សាសុខភាពខួរក្បាល និងថាមពល​ក្នុង​ការបំពេញការងារ។ តាមរយៈគេហទំព័រ Reviewjournal ខួរក្បាល អាចដំណើរការ សូម្បីតែពេលទទួលទានដំណេក និងដើរតួនាទីក្នុងការជំរុញគុណភាពគេង ដូច្នេះ តើ​យើងគួរបរិភោគអាហាបែបណា និងមិនគួរបរិភោគអាហារបែបណា ដើម្បីរក្សាសុខភាពខួរក្បាលឱ្យបាន​ល្អ?

អាហារសម្រាប់សុខភាពខួរក្បាល ៖ ការពិសាត្រីសាលម៉ុន ត្រីធូណា គ្រាប់ធញ្ញជាតិ ផ្លែប័រ សាច់ បន្លែបង្ការ ជាពិសេស អាហារមានជាតិខ្លាញ់អូមេហ្គា៣ ដែលសុទ្ធសឹងតែជាអាហារមានសារធាតុចិញ្ចឹម និងជំនួយទៅដល់សុខភាព។ ក្នុងមួយសប្តាហ៍ ទទួលទានសាច់ត្រីឱ្យបានយ៉ាងហោចណាស់ ពីរដង និងកាត់បន្ថយអាហារមានជាតិស្ករ និងជៀសវាងអាហារកែច្នៃ។

អាហារដែលគួរជៀសវាង ៖ ចំពោះបុគ្គលដែលបរិភោគអាហារកែច្នៃក្នុងចំនួនច្រើន ពួកគេប្រឈមនឹងមានអាការភ្លេចភ្លាំង និងសុញគំនិតក្នុងការវិភាគ រួមទាំងបង្កើនហានិភ័យនៃជំងឺដាច់សរសៃឈាមខួរក្បាល។ អាហារដែលមិនគួរទទួលទានមានដូចជា អាហារមានការកែច្នៃខ្ពស់ មានជាតិខ្លាញ់ ប្រៃខ្លាំង រួមទាំងអាហារទាំងឡាយណា ដែលមានសារធាតុចិញ្ចឹម និងប្រូតេអ៊ីនទាប និងខ្វះខាតសសៃសាយប័រ មានដូចជា ភេសជ្ជៈប៉ូវកម្លាំង ភេសជ្ជៈគ្រឿងកំប៉ុងមានជាតិផ្អែម ស្ករ ការ៉េម ឬប្រភេទនំវេចខ្ចប់មួយចំនួនដែលផ្ទុកសារធាតុឱ្យទុកបានយូរ។

គុណភាពដំណេក ៖ ដើម្បីពង្រឹង និងរក្សាសុខភាពខួរក្បាល ការញ៉ាំបានល្អមិនទាន់គ្រប់គ្រាន់នៅឡើយទេ គឺនៅមានកត្តាផ្សេងៗទៀតដែលចូលរួម តួយ៉ាងដូចជា គុណភាពនៃការទទួលទានដំណេក ក៏ដើរតួនាទីក្នុងការរក្សាសុខភាពខួរក្បាល  ដោយហេតុថា ការគេងបានជួយ​ដល់សមត្ថភាពនៃការគិត បង្កើនថាមពល ហើយកម្ចាត់ចោលរាល់ភាពតបប្រមល់ដែលកើតមានពេញមួយថ្ងៃ។ ការគេងមិនគ្រប់គ្រាន់ ប៉ះពាល់ដល់សមត្ថភាពផ្តោត ឧស្សាហ៍ភ្លេចភ្លាំង ការគិតមានភាពស្ពឹកស្រពន់ ហើយសមត្ថភាពនៃការបត់បែនក៏ត្រូវបានធ្លាក់ចុះ។ ហើយជាទូទៅ មនុស្សត្រូវការទទួលទានដំណេក៨ម៉ោងក្នុងមួយយប់ ចំណែកឯមនុស្សចាស់ហាក់មានតម្រូវការច្រើនជាងមនុស្សពេញវ័យ ដោយត្រូវការចន្លោះពី ៩ម៉ោងទៅ១១ម៉ោង។

ភាពសកម្មនៃការគិត ៖ កាលដែលមានសកម្មភាព ធ្វើ​ឱ្យខួរក្បាលមានការគិត គឺជាការបណ្តុះរាល់សុខភាពទូទៅ នៃខួរក្បាល ព្រោះការគិតនាំឱ្យកោសិកាសរសៃប្រសាទមានភាពរស់រវើក និងបណ្តុះបាននូវកោសិកាថ្មីៗ។ សកម្មភាពដែលត្រូវការប្រើប្រាស់ខួរក្បាលដើម្បីលេងមានដូចជា ហ្គេមផ្គុំរូប សន្លឹកបៀរ ការសួរសំណួរ ឬក៏ប្រភេទល្បែងទាំងឡាយណាដែលត្រូវការខួរក្បាលគិតកំឡុងពេលលេង។ ក្រៅពីហ្វឹកហាត់ការគិត លំហាត់ប្រាណ នៃរាងកាយ គឺជាចំណែកដែលមិនអាចមើលរំលង ដោយហេតុថា បុគ្គលដែលមានទម្លាប់ហាត់ប្រាណ មានសមត្ថភាពក្នុងការចងចាំ និងគ្រប់គ្រងខ្លួនឯងបានច្រើន៕