ការបង្កើតតាងរាងបែងចែកពេលវេលា ឬការរកវិធីសាស្រ្តក្នុងការរំឮកខ្លួនឯង ក៏ដូចជាការបង្កើតកាលវិភាគផ្ទាល់ខ្លួនសុទ្ធសឹងតែជាការរួមចំណែកផ្តល់ភាពងាយស្រួលក្នុងការសិក្សា, តែយ៉ាងណានៅមិនទាន់គ្រប់គ្រាន់ទេ តាមរយៈគេហទំព័រ Harvard Summer School បានបង្ហាញ៥គន្លឹះដើម្បីជួយ​សិស្ស​និស្សិត​ក្នុង​ការ​ពន្លឿនភាពងាយស្រួលក្នុងការសិក្សា។

១. ជ្រើសរើសវិធីសាស្រ្តដែលសាកសមសម្រាប់ខ្លួនឯង ៖ ក្នុងការធ្វើឱ្យដំណើរសិក្សា សិស្ស អាចនឹងសិក្សាស្រាវជ្រាវជាច្រើនអំពីភាពឈ្លាសវៃនៃការរៀនសូត្រ រួមទាំងការសាកសួរយោបល់ពីគ្រូជំនាញ អ្នកប្រឹក្សា អាណាព្យាបាល រួមទាំងរៀមច្បងជាដើម។ យ៉ាងណាមិញ គួរទុកចន្លោះខ្លះ ដើម្បីវិភាគឆ្លុះបញ្ចាំង អំពីមតិយោបល់ និងវិធីទាំងនោះ ថា តើមួយណាដែលមានភាពសមស្រប ក៏ដូចជាឆ្លើយតបជាមួយនឹងថាមពលដែលខ្លួនមាន ឬឆ្លើយតបនឹងស្ថានភាពបច្ចុប្បន្ន។ ឧទាហរណ៍ប្រសិនបើ ធ្វើផែនការនៅលើឌីជីថលហាក់ផ្តល់ភាពងាយស្រួលចំពោះខ្លួនឯងជាង នោះគឺមិនមានភាពចាំបាច់អ្វី ត្រូវស្វែងរកក្រដាសក្នុងការសរសេរនោះទេ។

គួរកត់សម្គាល់ថា ទោះជ្រើសរើសវិធីបែបណាក៏ដោយ ក៏គួមានការថ្លឹងថ្លែងដោយភ្ជាប់ជាមួយលទ្ធផលក្នុងរយៈពេលវែង និងត្រូវមានចំណុចសំខាន់ៗដូចជា ផែនការសកម្មភាព កាលវិភាគ និងការកត់ត្រាទុករាល់ទិន្នន័យសំខាន់ៗ។ ផែនការសកម្មភាព សំខាន់នៅត្រង់ថា ជួយ​ឱ្យសិស្សតាមដានពេលវេលាដែលកំណត់នីមួយៗ មិនថារយៈពេលវែង និងរយៈពេលខ្លី រួមទាំងកាលបរិច្ឆេទកំណត់កិច្ចការសំខាន់ៗ ដូចជាការប្រឡងនាពេលខាងមុខ និងការណាត់ជួបជាមួយគ្រូ ឬអ្នកប្រឹក្សា និងការប្រជុំរបស់សាលាជាដើម។

២. កំណត់អាទិភាព ៖ អារម្មណ៍ស្មុគស្មាញ ឬការពិបាកក្នុងការបញ្ចប់លទ្ធផលណាមួយនឹងកើតមានកាន់តែច្រើនប្រសិនបើមិនកំណត់អាទិភាពពេលវេលាក្នុងការកាត់បន្ថយបញ្ហាទាំងនេះទេ។ ទំនួលខុសត្រូវការងារសាលាច្រើន ស្របនឹងពេលផ្ទាល់ខ្លួនដែលមានតិច គឺពិតជាផ្តល់ភាពរំខានដល់ផ្លូវចិត្តសិស្ស ហើយដើម្បីបន្ធូរបន្ថយចំណោទបញ្ហាមួយនេះ គួរមានការវិនិយោគពេលខ្លះ ដើម្បីវាយតម្លៃអំពីអ្វីទៅជាអាទិភាពផ្ទាល់ខ្លួន? ឧទាហរណ៍ នៅពេលមានមិត្តបបួលទៅពិសាកាហ្វេ អាចថាជាពេលដ៏រីករាយមួយ ព្រោះអ្នកក៏ចូលចិត្តដែរ តែជាមួយគ្នានោះ អ្នកក៏ត្រូវមានការងារសាលា ដែលជិតដល់ម៉ោងត្រូវបំពេញ ដូច្នេះត្រូវក្រឡេកទៅមើលអំពីប្រភេទកិច្ចការ ដែលមានភាពបន្ទាន់និងសំខាន់ជាមុន ទម្លាប់វិភាគបែបនេះយូរៗ គឺនឹងជួយជំរុញឱ្យមានការកំណត់អាទិភាពបានត្រឹមត្រូវជាងមុន។

៣. ទុកពេលឱ្យខ្លួនឯងមានឱកាសកម្សាន្ត ៖ ការគ្រប់គ្រងពេល ឬកាលវិភាគមិនមែនមានន័យថា ដើរតាមគោលដៅដើម្បីបញ្ចប់ការងារតែប៉ុណ្ណោះទេ ប៉ុន្តែក៏និយាយអំពីដំណើរការ ការបង្កភាពងាយស្រួលក្នុងការសិក្សា ក៏ដូចជាការថែទាំសុខភាពផ្លូវចិត្ត។ ហេតុដូចនេះហើយ ការទុកចន្លោះឱ្យខ្លួនឯងទទួលបានការកម្សាន្តក៏ជាចំណែកនាំឱ្យសុខភាពផ្លូវចិត្តមានភាពរឹងមាំផងដែរ។ មានសកម្មភាពជាច្រើន ដែលផ្តល់ទាំងការកម្សាន្ត និងភាពរីកចម្រើនក្នុងការរស់នៅប្រចាំថ្ងៃ ដោយមានដូចជា ការជិះកង់លេងនៅទីធ្លាស្រឡះ  ចំណាយពេលជាមួយមិត្តភ័ក្តិនិងក្រុមគ្រួសារ និងការសម្រាកឱ្យបានពេញមួយថ្ងៃរៀងរាល់ថ្ងៃអាទិត្យជាដើម ដែលធ្វើយ៉ាងឱ្យមានតុល្យភាពរវាងការសិក្សា និងការប្រើប្រាស់ជីវិតផ្ទាល់ខ្លួន ដើម្បីកាត់បន្ថយភាពតានតឹង និងការស្រូបយកថាមពលបន្ថែម។

៤. ស្វែងរកការគាំទ្រពីមជ្ឈដ្ឋានខាងក្រៅ ៖  ការរៀបចំដោយខ្លួនឯង ការអនុវត្តផ្តើមចេញពីខ្លួនឯង ចាត់ជារឿងល្អមួយផ្នែកហើយ តែយ៉ាងណាថាមពល និងអារម្មណ៍ម្តងម្កាល អាចនឹងមានការប្រែប្រួល ដែលតម្រូវឱ្យត្រូវការ ការដាស់តឿនបន្ថែមពីមជ្ឈដ្ឋានខាងក្រៅ។ ភ្ជាប់ទំនាក់ទំនង ជាមួយសិស្សដែលរៀនជំនាន់ជាមួយគ្នា ដើម្បីងាយស្រួលក្នុងការទទួលបាននូវសារដាស់តឿន ក៏ដូចជាការរំឮកពីគោលបំណងនៅពេលណាយើងមានស្ថានភាពផ្លូវចិត្តមិនសូវល្អ។ មួយវិញទៀត ទៅជួបអ្នកដែលផ្តល់ការគាំទ្រប្រចាំសាលា ឬលោកគ្រូអ្នកគ្រូដែលសិស្សយល់ថា ជាបុគ្គលមានផាសុកភាពដើម្បីជជែកនៅពេលមានបញ្ហា។

៥. ភាពជាក់លាក់ និងភាពបត់បែន ៖ ពីមួយថ្ងៃទៅមួយថ្ងៃ មានហេតុការណ៍ច្រើនណាស់ដែលបានកើតមានដោយឥតព្រៀងទុក រហូតមានព្រឹត្តិការណ៍បង្កការភ្ញាក់ផ្អើលលក្ខណៈទ្រង់ទ្រាយសកលក៏មាន យ៉ាងណាមិញក្នុងដំណើរជីវិត និងដំណើរសិក្សាយើងក៏ដូចគ្នា ក្នុងកាលៈទេសៈដែលប្រែប្រួល ផែនការ ឬក៏ការអនុវត្តសកម្មភាពក៏ត្រូវមានការផ្លាស់ប្តូរដូចគ្នា ហើយនៅពេលដែលការអនុវត្តមិនឆ្លើយតបនឹងគោលដៅ សូមកុំទាន់បាក់ទឹកចិត្ត ជំនួសមកវិញដោយក្រឡេកទៅមើលពីភាពរីកចម្រើនវិញ។ ការគ្រប់គ្រងកាលវិភាគ ឬកំណត់ទិសដៅក្នុងនាមជាសិស្ស មិនសំដៅលើតែភាពហ្មត់ចត់នៃការដើរឱ្យត្រូវអ្វីដែលបានកំណត់សុតសាតនោះទេ ប៉ុន្តែក៏មានពាក់ព័ន្ធនឹងការរៀនសម្របខ្លួន និងការផ្លាស់ប្តូរទៅរកភាពវិជ្ជមាន និងសុខុមាលភាពផ្លូវចិត្តផងដែរ៕