ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជំងឺលើសសម្ពាធឈាម នៅតែជាបញ្ហាប្រឈមធំមួយក្នុងចំណោមប្រជាជនកម្ពុជា និងពិភពលោក ជាពិសេស មនុស្សវ័យកណ្ដាលដែលមានអាយុចាប់ពី ៤០ឆ្នាំឡើងទៅ។ ទិន្នន័យអង្គការសុខភាពពិភពលោកឆ្នាំ២០២១បានបង្ហាញថា ជំងឺលើសសម្ពាធឈាម បាននិងកំពុងកើតមានលើមនុស្ស ១,២៨ប៊ីលាននាក់ជុំវិញពិភពលោក។ ជំងឺនេះរួមចំណែកដល់ការស្លាប់ និងបង្កើនហានិភ័យ ជំងឺបេះដូង និងដាច់សរសៃឈាមខួរក្បាល។
ការសិក្សាមួយដែលបានចេញផ្សាយក្នុង Circulation បានពិនិត្យមើលអំពីឥទ្ធិពល នៃសកម្មភាពផ្សេងៗមកលើបញ្ហាលើសសម្ពាធឈាម។ លទ្ធផលនៃការស្រាវជ្រាវបានរកឃើញថា ការបង្កើនសកម្មភាពហាត់ប្រាណ ដូចជា ការរត់ ការជិះកង់ និងការឡើងជណ្ដើរ ជាប់ទាក់ទងនឹងការថយចុះនៃសម្ពាធឈាម។ ជាក់ស្ដែងការស្រាវជ្រាវបានបង្ហាញថា ការផ្លាស់ប្ដូរពេលវេលាសម្រាក ២១នាទី ជាមួយនឹងសកម្មភាពដូចជា ការធ្វើលំហាត់ប្រាណ អាចបន្ថយសម្ពាធឈាមស៊ីស្ដូលិកប្រហែល ២ mmHg ។
លទ្ធផលបានគូសបញ្ជាក់អំពីឥទ្ធិពល នៃលំហាត់ប្រាណ មកលើសម្ពាធឈាម ហើយការធ្វើលំហាត់ប្រាណជាប់ជាប្រចាំ អាចជះឥទ្ធិពលយ៉ាងខ្លាំងលើសុខភាពសរសៃឈាមបេះដូង។ ជាពិសេសការបង្កើនសកម្មភាពដូចជា ការរត់ ឬជិះកង់ ត្រឹមតែ ៥នាទីក្នុងមួយថ្ងៃ និងការគេងគ្រប់គ្រាន់ អាចជួយកាត់បន្ថយសម្ពាធឈាមស៊ីស្តូលីក និងឌីស្តូលីក។
ផ្ទុយទៅវិញ កត្តាដែលបណ្ដាលឱ្យមនុស្សឡើងសម្ពាធឈាម បណ្ដាលមកពី ការទទួលទានគ្រឿងស្រវឹង ការជក់បារី និងអាយុ។ ខណៈកត្តារួមផ្សំមួយចំនួនទៀត គឺបណ្ដាលមកពីកង្វះការបម្លាស់ទី និងចំណេះដឹងអំពី បញ្ហាលើសសម្ពាធឈាមនៅមានកម្រិត៕
