ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីលើកកម្ពស់ការយល់ដឹងអំពីឫសគល់ និងកម្លាំងជំរុញឱ្យកើតមាននូវអំពើប្រល័យពូជសាសន៍ និងឧក្រិដ្ឋកម្មអន្តរជាតិធ្ងន់ធ្ងរនានា ដូចជាឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិជាដើម ក៏ដូចជាក្រើនរំលឹកដល់តួអង្គពាក់ព័ន្ធអំពីហានិភ័យ នៃឧក្រិដ្ឋកម្មប្រភេទនេះ, កាលពីពេលថ្មីៗនេះ ការិយាល័យទីប្រឹក្សាពិសេសទប់ស្កាត់អំពើប្រល័យពូជសាសន៍ នៃអង្គការសហប្រជាជាតិ និងមជ្ឈមណ្ឌលឯកសារកម្ពុជា បានចុះកិច្ចព្រមព្រៀងជាមួយគ្នាក្នុងការរឹតបន្តឹងកិច្ចសហប្រតិបត្តិការលើការទប់ស្កាត់អំពើប្រល័យពូជសាសន៍ និងឧក្រិដ្ឋកម្មអន្តរជាតិធ្ងន់ធ្ងរនៅទូទាំងពិភពលោក។
លោកស្រី អាលីស វ៉ៃរីមូ ឌឺរីទូ អគ្គលេខាធិការរងនៃការិយាល័យទីប្រឹក្សាពិសេសទប់ស្កាត់អំពើប្រល័យពូជសាសន៍នៃអង្គការសហប្រជាជាតិ មានប្រសាសន៍ថា កិច្ចសហការនេះ សរបញ្ជាក់អំពីជំហានដ៏ចាំបាច់មួយនៃកិច្ចខិតខំប្រឹងប្រែងបន្តបន្ទាប់របស់យើង ក្នុងការទប់ស្កាត់អំពើប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ។ លោកស្រីបន្តថា តាមរយៈការច្របាច់បញ្ចូលគ្នាជាធ្លុងមួយរវាងវិសាលភាពនៅទូទាំងសកលលោករបស់អង្គការសហប្រជាជាតិ និងជំនាញជាន់ខ្ពស់ព្រមទាំងចំណេះដឹងក្នុងតំបន់របស់មជ្ឈមណ្ឌលឯកសារកម្ពុជា យើងអាចពង្រឹងសមត្ថភាពរបស់ខ្លួនក្នុងការកំណត់ និងឆ្លើយតបចំពោះសញ្ញាអាសន្ននៃអំពើប្រល័យពូជសាសន៍ និងឧក្រិដ្ឋកម្មអន្តរជាតិធ្ងន់ធ្ងរនានា បានឆាប់រហ័សបំផុត ក៏ដូចជារៀបចំនិងអនុវត្តសកម្មភាពទប់ស្កាត់ប្រកបដោយប្រសិទ្ធភាពនិងនិរន្តរភាព។
លោក ឆាំង យុ នាយកមជ្ឈមណ្ឌលឯកសារកម្ពុជា លើកឡើងថា កិច្ចព្រមព្រៀងនេះ បានគូសបញ្ជាក់អំពីសារសំខាន់ក្នុងការអភិរក្សនិងថែរក្សាកំណត់ត្រាប្រវត្តិសាស្ត្រស្តីពីឧក្រិដ្ឋកម្មដែលបានប្រព្រឹត្តឡើងនៅក្នុងរបបខ្មែរក្រហម (១៩៧៥-១៩៧៩) ដោយប្រើប្រាស់ព្រឹត្តិការណ៍នេះ ជាមេរៀនក្នុងការពង្រឹងកិច្ចខិតខំប្រឹងប្រែងទប់ស្កាត់វត្តមាននៃឧក្រិដ្ឋកម្មប្រភេទនេះ នៅក្នុងតំបន់អាស៊ីអាគ្នេយ៍និងតំបន់ដទៃទៀត។
“កិច្ចសហប្រតិបត្តិការនេះ គាំទ្រចំពោះកិច្ចខិតខំប្រឹងប្រែងរបស់យើង ក្នុងការធានាថាពាក្យស្លោក លែងកើតមានទៀត គឺមិនមែនត្រឹមតែជាការនិយាយឱ្យពីរោះពិសាប៉ុណ្ណោះទេ ក៏ប៉ុន្តែគឺជាកិច្ចប្ដេជ្ញាចិត្តក្នុងការផ្លាស់ប្ដូរនិងជួយសង្គ្រោះជីវិត របស់មនុស្សជាតិទាំងនៅក្នុងតំបន់អាស៊ីអាគ្នេយ៍ និងនៅទូទាំងសកលលោក”
គួរជំរាបជូនដែរថា ការិយាល័យអង្គការសហប្រជាជាតិ និងមជ្ឈមណ្ឌលឯកសារកម្ពុជា បានធ្វើកិច្ចសហប្រតិបត្តិការជាមួយគ្នាតាំងតែពីឆ្នាំ២០២០មក ហើយនៅក្នុងរយៈពេលប្រមាណបួនឆ្នាំកន្លងមកនេះ ការិយាល័យទីប្រឹក្សាពិសេសទប់ស្កាត់អំពើប្រល័យពូជសាសន៍ និងមជ្ឈមណ្ឌលឯកសារកម្ពុជា បានបង្កើតជាកម្មវិធីអប់រំពិស្តារស្តីពីការទប់ស្កាត់អំពើប្រល័យពូជសាសន៍ ដែលមានគោលបំណងទប់ស្កាត់អំពើប្រល័យពូជសាសន៍ និងឧក្រិដ្ឋកម្មអន្តរជាតិធ្ងន់ធ្ងរនានា នៅក្នុងតំបន់អាស៊ីអាគ្នេយ៍។ កម្មវិធីសិក្សានេះ ត្រូវបានអនុវត្តសាកល្បងជាមួយនឹងគ្រូបង្រៀនមកពីប្រទេសកម្ពុជា ប្រទេសវៀតណាម និងប្រទេសថៃ។
អនុស្សរណៈនៃកិច្ចសហការដែលបានចុះហត្ថលេខាដោយមជ្ឈមណ្ឌលឯកសារកម្ពុជា និងការិយាល័យទីប្រឹក្សាពិសេសទប់ស្កាត់អំពើប្រល័យពូជសាសន៍កាលពីពេលថ្មីៗនេះវិញ នឹងរឹតបន្តឹងកិច្ចសហការគ្នា ឈានទៅសម្រេចបានការលើកកម្ពស់ការទប់ស្កាត់អំពើប្រល័យពូជសាសន៍ និងឧក្រិដ្ឋកម្មអន្តរជាតិធ្ងន់ធ្ងរនានានៅទូទាំងសកលលោក៕
