ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រឿងអ្វីក៏ដោយ តែងតែចាប់ផ្ដើមពីជំហានដំបូង ប្រសិនបើអ្នកមិនចាប់ផ្ដើមជំហានដំបូង អ្នកច្បាស់ជាមិនដឹងទេថា ជីវិតរបស់អ្នក នៅដំណាក់កាលបន្ទាប់នឹងមានរឿងអ្វីកើតឡើង ហើយអាចនឹងធ្វើដំណើរទៅរកគោលដៅ ដែលអ្នកចង់ទៅដោយរបៀបណា។ នេះជាការលើកឡើងរបស់យុវតី កៅ ម៉េងហ័ង សហស្ថាបនិក នៃគម្រោងស្ទែមយូនីធី និងគម្រោង Ladies in Tech ហើយក៏ជានិស្សិតកំពុងសិក្សាជំនាញផ្នែកវិទ្យាសាស្ត្រទិន្នន័យ និងបញ្ញាសិប្បនិម្មិត នៅក្នុងវេទិកា នៃពិព័រណ៌សាកលវិទ្យាល័យ និងអាជីព ២០២៤ កាលពីពេលថ្មីៗនេះ។
ដើម្បីបំផុសស្មារតី និងលើកទឹកចិត្តដល់សិស្សានុសិស្សថ្នាក់វិទ្យាល័យ ឱ្យហ៊ានសាកល្បង ពង្រឹងសមត្ថភាពខ្លួនឯង ម៉េងហ័ង បានចែករំលែកថា វិធីសាស្ត្រចំនួន៤ ដែលសិស្សានុសិស្សថ្នាក់វិទ្យាល័យ ឬនិស្សិត អាចពង្រឹងសក្តានុពល និងបង្កើតឱកាសសម្រាប់ខ្លួនឯងបាន ៖
១.ការចូលរួមកម្មវិធីស្ម័គ្រចិត្ត ៖ ម៉េងហ័ង សង្កត់ធ្ងន់ថា ការចូលរួមក្នុងការងារស្ម័គ្រចិត្ត ពិតជាសំខាន់សម្រាប់សិស្ស និងនិស្សិត ដែលត្រូវការបទពិសោធន៍ ព្រោះតាមរយៈការចូលរួមក្នុងកម្មវិធី យុវជននឹងរៀនសូត្របានច្រើន អំពីការងារ។ ម៉េងហ័ង បន្តថា ពេលខ្លះ ទោះយើងមិនចូលចិត្តធ្វើកិច្ចការ ឬរឿងទាំងនោះក៏ដោយ ប៉ុន្តែយើងត្រូវតែហ៊ានសាកល្បង ហ៊ានធ្វើ ព្រោះក្នុងជីវិតយើងមិនអាចធ្វើរឿង ដែលយើងចូលចិត្តរហូតនោះទេ។
២.ចូលរួមកម្មវិធីប្រកួតប្រជែងផ្សេងៗ ៖ យុវតីរូបនេះ លើកឡើងថា បើតាមបទពិសោធន៍ផ្ទាល់ខ្លួន ការចូលរួមក្នុងកម្មវិធីប្រកួតប្រជែងផ្សេងៗ បានធ្វើឱ្យសមត្ថភាព និងការយល់ដឹង ក្នុងវិស័យដែលខ្លួនកំពុងសិក្សារីកចម្រើនបានឆាប់រហ័ស ហើយនេះ ក៏ជាផ្នែកមួយ នៃការពង្រឹងកេឌ្រីតខ្លួនឯងផងដែរ។
៣.ផ្លាស់ប្ដូរការសិក្សា (Exchange program) ៖ ការចូលរួមកម្មវិធីផ្លាស់ប្ដូរការសិក្សា នឹងផ្ដល់មេរៀន និងបទពិសោធន៍ថ្មីៗជាច្រើន។ បើតាមបទពិសោធន៍ជាក់ស្តែងរបស់ ម៉េងហ័ង ផ្ទាល់ ការចូលរួមក្នុងកម្មវិធីផ្លាស់ប្ដូរការសិក្សា បានធ្វើឱ្យនាងផ្លាស់ប្ដូរខ្លួនឯងក្នុងរូបភាពវិជ្ជមានយ៉ាងច្រើន ជាពិសេស គឺការគិត អាកប្បកិរិយា និងការនិយាយស្ដី។
៤.បង្កើតគម្រោងសម្រាប់សង្គម ៖ ជាក់ស្តែង ក្នុងការសិក្សានៅថ្នាក់ទី១១ ម៉េងហ័ង បានបង្កើតគម្រោងមួយ ដែលមានឈ្មោះថា Lady in tech ដែលត្រូវបានគាំទ្រដោយ Unicef Cambodia និងធ្វើឡើងដើម្បីបង្កើតវគ្គសិក្សាឱ្យក្មេងស្រី ចូលរួមរៀនសរសេរកូដ។ តាមរយៈការបង្កើត និងដឹកនាំគម្រោងនេះ ម៉េងហ័ង បានជួយដល់សិស្សស្រីប្រមាណ ៥០នាក់ឱ្យរៀនសរសេរកូដ ព្រមទាំងរៀនសូត្រ និងទទួលបានបទពិសោធន៍ជាច្រើនពីការងារ។
យ៉ាងណាក៏ដោយ បើតាមបទពិសោធន៍ជាក់ស្ដែងរបស់ខ្លួន ម៉េងហ័ង បានបញ្ជាក់ថា ការបង្កើតឱកាសឱ្យខ្លួនឯងធ្វើរឿងថ្មីជាប្រចាំ មិនមែនជារឿងងាយស្រួលប៉ុន្មានទេ។ ការសាកល្បងនេះ នឹងធ្វើឱ្យយុវជនមានអារម្មណ៍ភ័យខ្លាច ខ្លាចធ្លាក់ ខ្លាចគេស្ដីឱ្យ ខ្លាចគេប្រៀបធៀប ឬមាក់ងាយ និងយល់ថា ខ្លួនឯងមិនល្អគ្រប់គ្រាន់ជាដើម។ ប៉ុន្តែទោះជាមានអារម្មណ៍បែបណាក៏ដោយ ដើម្បីភាពរីកចម្រើន យុវជនត្រូវតែហ៊ានសាកល្បង និងផ្ដល់ឱកាសឱ្យខ្លួនឯងរៀនពីបទពិសោធន៍ទាំងនោះ ទោះជោគជ័យ ឬបរាជ័យក៏ដោយ៕
