យោង​តាមរបាយការណ៍របស់ក្រសួងអប់រំ យុវជន និងកីឡា ក្នុង​ការ​ប្រឡង​សញ្ញាបត្រ​មធ្យមសិក្សា​ទុតិយភូមិ ឬបាក់ឌុប ឆ្នាំ​២០២៥នេះ ក្នុងចំណោម​​បេក្ខជន​ដែលបាន​ដាក់ពាក្យ​ប្រឡងជាង១៤ម៉ឺននាក់ មាន​បេក្ខជនដែលបានដាក់ពាក្យ​ប្រឡង​ថ្នាក់វិទ្យាសាស្រ្ត​ត្រឹមជាងជាង៤ម៉ឺននាក់ ខណៈ​បេក្ខជន​ដាក់ពាក្យ​ប្រឡង​ថ្នាក់វិទ្យាសាស្រ្តសង្គម​មានរហូត​ដល់ជាង ១០ម៉ឺននាក់។ ទិន្នន័យ​នេះបានបង្ហាញថា យុវជន​ចាប់អារម្មណ៍​ទៅ​លើវិទ្យាសាស្រ្តតិចតួច ខណៈកម្ពុជា​កំពុងឈាន​ទៅ​រក​សង្គម​ឧស្សាហកម្ម និង​បច្ចេកវិទ្យា។

លោក គីម ដារ៉ា នាយកសាលាបង្វឹកស្តាតអាប់ មានប្រសាសន៍ថា ការធ្លាក់ចុះ​នៃចំនួនសិស្ស​ថ្នាក់វិទ្យាសាស្រ្ត គឺជាការព្រួយបារម្ភមួយ, លោក​មើលឃើញថា ក្រសួងអប់រំបានរៀបចំ​ស្តង់ដានៃការ​ប្រឡង​ទាំងពីរមិនដូចគ្នា នោះគឺការប្រឡងថ្នាក់វិទ្យាសាស្រ្តពិតលំបាកក្នុងការជាប់ ខណៈការប្រឡងថ្នាក់វិទ្យាសាស្រ្តសង្គមងាយក្នុងការជាប់ ដែលជំរុញឱ្យសិស្សដាក់ពាក្យប្រឡង ឬរៀនផ្នែកសង្គម ដើម្បីជាប់បាក់ឌុប។

លោក គីម ដារ៉ា ផ្តល់យោបល់ថា ដើម្បីបង្កើនចំនួនសិស្សថ្នាក់វិទ្យាសាស្រ្តពិត ក្រសួងអប់រំចាំបាច់ត្រូវពង្រឹងវិញ្ញាសាប្រឡងសញ្ញាបត្រ​មធ្យមសិក្សា​ទុតិយភូមិ (បាក់ឌុប) ឡើងវិញ ពោលគឺស្តង់ដាវិញ្ញាសាថ្នាក់វិទ្យាសាស្រ្តសង្គម ត្រូវប្រហាក់ប្រហែលគ្នានឹងវិញ្ញាសាថ្នាក់វិទ្យាសាស្រ្តពិត។ នោះនឹងនាំឱ្យសិស្ស និងសាលារៀន ចាប់ផ្ដើមគិតឡើងវិញថា ថ្នាក់វិទ្យាសាស្រ្តសង្គម ក៏មិនងាយប្រឡងជាប់ដូចគ្នា ហើយ​សិស្សខ្លួនឯងក៏គិតដែរថា ដើម្បីប្រឡងជាប់មិនមែនដោយសារជ្រើសរើសផ្នែកសង្គមនោះទេ ពោល​ដើម្បីប្រឡងជាប់ គឺទាល់តែខំប្រឹងរៀន។

ចំពោះករណីនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា លើកឡើងថា ត្បិតតែសិស្សថ្នាក់វិទ្យាសាស្រ្តមានអត្រាតែ ៣០% តែសុទ្ធសឹងជាសិស្សពូកែ ដែលជាធនធានសម្រាប់កម្ពុជានាពេលអនាគត។ ឯកឧត្តមបណ្ឌិតសភាចារ្យបន្តថា សិស្សថ្នាក់វិទ្យាសាស្រ្តសង្គម ក៏មានសិស្សពូកែដែរ គ្រាន់តែអត្រាសិស្សពូកែទាបជាងសិស្សថ្នាក់វិទ្យាសាស្រ្តពិត។

យ៉ាងណាក៏ដោយ ដើម្បីឱ្យអត្រាសិស្សដែលរៀនថ្នាក់វិទ្យាសាស្រ្តមានការកើនឡើង បើតាម​ប្រសាសន៍ឯកឧត្តមបណ្ឌិតសភាចារ្យ ហង់ជួន ណារ៉ុន នៅឆ្នាំសិក្សាថ្មីខាងមុខនេះ ក្រសួងអប់រំ នឹងរៀបចំយន្តការថ្មីមួយទៀត នោះគឺគន្លងអប់រំថ្មី ដោយញែកសិស្ស​ពីកម្រិតថ្នាក់ទី១០ ដល់ថ្នាក់ទី១២ តាម​គន្លងថ្នាក់វិទ្យាសាស្រ្ត គន្លងថ្នាក់វិទ្យាសាស្រ្តសង្គម និងគន្លងវិជ្ជាជីវៈ ហើយយន្តការនេះនឹងសាកល្បងនៅតាមសាលាមួយចំនួន។ រដ្ឋមន្ត្រីក្រសួងអប់រំ ក៏​បានបញ្ជាក់ដែរថា ក្រសួង ក៏នឹងរៀបចំឱ្យមានមគ្គុទ្ទេសអាជីព ដើម្បីពន្យល់ណែនាំសិស្សឱ្យស្គាល់ខ្លួនឯង ដឹងពីសមត្ថភាពខ្លួនឯង ក្នុងការជ្រើសរើសជំនាញ ដោយឈរលើមូលដ្ឋាននៃពិន្ទុប្រឡងមធ្យមសិក្សាបឋមភូមិ។

“សិស្សណាដែលពូកែមុខវិជ្ជាវិទ្យាសាស្រ្ត ត្រូវរុញគាត់ទៅរៀនវិទ្យាសាស្រ្ត ហើយសិស្សណាពូកែវិទ្យាសាស្រ្តសង្គម ហើយខ្សោយវិទ្យាសាស្រ្ត ត្រូវឱ្យទៅរៀនថ្នាក់វិទ្យាសាស្រ្តសង្គម ហើយសិស្សផ្សេងទៀតទៅរៀនការអប់រំបច្ចេកទេស”

ចំពោះការបែងចែកគន្លងសិក្សាថ្មី​ដែល​ក្រសួងអប់រំគ្រោងនឹងអនុវត្ត​នៅឆ្នាំសិក្សាថ្មីនេះ លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា និងជាអ្នកវិភាគសង្គម​ មានប្រសាសន៍គាំទ្រ ដោយថា កន្លងមក ក្រសួងអប់រំ បានអនុវត្តថ្នាលអប់រំចំនួន២ គឺថ្នាលវិទ្យាសាស្ត្រ និងថ្នាលវិទ្យាសាស្ត្រសង្គម ប៉ុន្តែបើពេលនេះ បានដាក់បន្ថែមគន្លងអប់រំថ្មីមួយ​ទៀត ដែលជាថ្នាលមូលដ្ឋានគ្រឹះនៃការបណ្តុះបណ្តាលវិជ្ជាជីវៈ ដែលសិស្សអាចជ្រើសរើសរៀនបានចាប់ពីថ្នាក់វិទ្យាល័យនោះ វាគឺជាការកែទម្រង់មួយជំហានទៀតរបស់រាជរដ្ឋាភិបាល ដើម្បីផ្តល់នូវកម្មវិធីសិក្សាចម្រុះតាមទេពកោសល្យរបស់សិស្ស។ លោកជឿជាក់ថា សិស្សដែលរៀនចប់ នឹងមានជំនាញពិតប្រាកដមួយរួចស្រេច ដែលមានកម្រិតសមមូលនឹងមធ្យមសិក្សាទុតិយភូមិដែរ។ លោកថា គន្លងអប់រំបែបនេះ មិនមែនជារឿងថ្មីទេនៅលើសកលលោក តែជាការបណ្តុះបណ្តាលសិស្សស្របតាមកម្រិតសិក្សា ដែលអាចចូលរួមចំណែកក្នុងសង្គមពិតប្រាកដបានក្រោយបញ្ចប់ថ្នាក់។

យ៉ាងណា ដើម្បីជួយ​ឱ្យ​គន្លងសិក្សាថ្មីនេះអាចប្រព្រឹត្តទៅ​បាន​ល្អ អគ្គលេខាធិការ នៃរាជបណ្ឌិត្យសភាកម្ពុជា ស្នើ​ឱ្យ​ក្រសួងអប់រំ គួរពិចារណាវិនិយោគឱ្យបានគ្រប់គ្រាន់សម្រាប់ឧបករណ៍សម្ភារៈដែលចាំបាច់ក្នុងការរៀន និងបង្រៀន ព្រមទាំងព្យាយាមបង្កើតតាមដំណាក់កាល ដើម្បីពង្រីកមុខវិជ្ជាវិជ្ជាជីវៈ ឱ្យកាន់តែសម្បូរបែប ហើយ​ជាមួយ​គ្នា​ក្រសួងក៏​ត្រូវ​ខិតខំផ្សព្វផ្សាយ និងធ្វើទំនើបកម្មជំនាញវិជ្ជាជីវៈជាប់ជាប្រចាំ ដើម្បីឆ្លើយតបទៅនឹងទីផ្សារការងារក្នុងស្រុក៕