ក្នុងរយៈពេលប៉ុន្មានសប្ដាហ៍ចុងក្រោយនេះ មនុស្សគ្រប់វ័យបានបង្កើត និងបង្ហោះរូបភាព ដែលបង្កើតដោយ AI ពីស្ទីលភាពយន្ត Studio Ghibli នៅលើគណនី Facebook និង Instagram របស់ពួកគេ។ រូបទាំងនោះមើលទៅគួរឱ្យស្រឡាញ់ មានភាពច្នៃប្រឌិត និងពោរពេញដោយភាពរីករាយ ប៉ុន្តែមុនពេលបង្ហោះរូបភាពផ្ទាល់ខ្លួនរបស់អ្នកនៅលើបណ្ដាញសង្គម អ្នកគួរធ្វើការពិចារណាលើរឿងមួយចំនួន ជាពិសេស គឺនៅពេលដែលអ្នកបង្ហោះរូបកូនរបស់អ្នក។

តើអ្វីជានិន្នាការរូបថតដែលបង្កើតដោយ AI ?

រូបភាពដែលបង្កើតដោយ AI គឺជារូបភាពឌីជីថល បង្កើតឡើងដោយក្បួនដោះស្រាយបញ្ញាសិប្បនិម្មិត (AI) ជំនួសឱ្យការបង្កើតរូបភាពដោយសិល្បករជាមនុស្ស។ ពួកវាអាចត្រូវបានបង្កើតឡើងតាមរបៀបជាច្រើន រួមទាំងការប្រើក្បួនដោះស្រាយបញ្ហារបស់ម៉ាស៊ីនចេះរៀន ដែលបានបង្វឹកលើរូបភាព ឬគម្រូម៉ូឌែល (generative models) ដែលអាចបង្កើតរូបភាពថ្មី ដោយផ្អែកលើសំណុំនៃធាតុចូល (inputs) ជាច្រើន។ រូបភាពទាំងនេះ អាចត្រូវបានប្រើសម្រាប់គម្រោងជាច្រើន រួមទាំងប្រព័ន្ធផ្សព្វផ្សាយសង្គម ការធ្វើទីផ្សារ និងរូបភាពនៅលើគេហទំព័រជាដើម។

ពេលនេះ រូបភាពដែលបង្កើតឡើងដោយ AI ត្រូវបានគេប្រើយ៉ាងទូលំទូលាយ រួមបញ្ចូលទាំង កុមារ និងក្មេងជំទង់ផងដែរ ដោយគេអាចបង្កើតបានឥតគិតថ្លៃ ឬតាមរយៈគេហទំព័រដែលមានតម្លៃទាប អាចបំប្លែងរូបភាពទៅជា តុក្កតា anime របស់ជប៉ុន, តួអង្គក្នុងរឿងរបស់ Disney, Pixar-style figures, Ghibli-like art និងសូម្បីតែ Toy doll figures។

ការបង្កើត រូបភាពសិល្បៈ ដោយ AI អាចផ្ដល់នូវអារម្មណ៍រីករាយ ងាយស្រួល និងមិនបង្កផលប៉ះពាល់ ប៉ុន្តែក៏បង្កើតឱ្យមានក្ដីបារម្ភមួយចំនួនផងដែរ រាប់ចាប់តាំងពីឯកជនភាពទិន្នន័យ រហូតដល់បញ្ហាសុចរិតភាពក្នុងវិស័យសិល្បៈ ហើយហានិភ័យ នឹងកើតមានកាន់តែខ្ពស់ នៅពេលមានការចូលរួមពីកុមារ។

មូលហេតុដែលអាណាព្យាបាលគួរប្រុងប្រយ័ត្ន

នេះគឺជាបញ្ហាសំខាន់ៗដែលមាតាបិតាត្រូវគិតគូរ និងពិភាក្សាជាមួយកូនរបស់ខ្លួនមុនពេលបង្កើតរូបភាពសិល្បៈ ដោយប្រើបច្ចេកវិទ្យា AI នេះ។

១. បញ្ហាឯកជនភាព និងការប្រមូលទិន្នន័យ ៖ ឯកជនភាពទិន្នន័យ និងការប្រើប្រាស់ គឺជាកង្វល់ចម្បងនៅពេលប្រើប្រាស់កម្មវិធី AI ដើម្បីផលិតរូបភាពសិល្បៈ។ អាណាព្យាបាល ឬក៏កូនៗ កំពុងតែប្រគល់រូបភាពរបស់ខ្លួនឯងឱ្យទៅអ្នកដទៃ។ កម្មវិធីនេះ នឹងរក្សាទុក ប្រើឡើងវិញ និងលក់រូបថត និងទិន្នន័យរបស់អ្នក។ នេះមានន័យថា អ្នកណាក៏អាចប្រើរូបភាព ឬទម្រង់រូបភាពដែលមានលក្ខណៈស្រដៀងអ្នក ទៅប្រើប្រាស់ដោយគ្មានការអនុញ្ញាតពីអ្នក។ អ្នកប្រើប្រាស់មិនអាចសម្អាតទិន្នន័យរបស់ពួកគេបានទេ នៅពេលអ្នកបានបញ្ចូលទិន្នន័យនោះទៅក្នុងវេទិកា AI ដែលអ្នកបានប្រើប្រាស់ ដែលនេះជាមូលហេតុបង្កឱ្យមានការព្រួយបារម្ភអំពីឯកជនភាព និងការរក្សាសិទ្ធិ។

២. ទិន្នន័យកុមារនៅកន្លែងដែលគ្រោះថ្នាក់ ៖ ក្មេងជំទង់ចូលចិត្ត និងឆាប់ចូលរួមទៅក្នុងនិន្នាការសង្គម ដែលមនុស្សភាគច្រើនកំពុងចាប់អារម្មណ៍ខ្លាំង ជាពិសេសរូបភាព ដែលបង្កើតដោយ AI អាចបង្កើតរូបភាពពួកគេក្នុងទម្រង់ជាតុក្កតាក្នុងខ្សែភាពយន្ត ដែលពួកគេចូលចិត្ត។ យ៉ាងណាក៏ដោយ ពួកគេអាចនៅក្មេងពេកក្នុងការយល់ច្បាស់អំពី គ្រោះថ្នាក់ដែលអាចកើតមាន និងផលប៉ះពាល់ ដែលបណ្ដាលមកពីការបង្ហោះរូបភាពរបស់ពួកគេនៅលើកម្មវិធី ឬវេទិកាឌីជីថល។

កម្មវិធី AI ទាំងនេះ ភាគច្រើន មិនយល់ច្បាស់អំពីរបៀបដែលពួកគេគ្រប់គ្រងទិន្នន័យរបស់អ្នកប្រើប្រាស់នោះទេ។ នេះជាការព្រួយបារម្ភ ជាពិសេសដោយសាររូបភាពរបស់កុមារមានលក្ខណៈរស៊ើប ហើយអាចត្រូវបានគេកេងប្រវ័ញ្ចតាមវិធី ដែលអាណាព្យាបាល ឬឪពុកម្ដាយពួកគេ មិនអាចព្យាករណ៍ដឹងមុន។

៣. សក្តានុពលសម្រាប់ការបោកប្រាស់ និងបច្ចេកវិទ្យា Deepfakes ៖ Deepfakes គឺជាវីដេអូរបស់បុគ្គលដែលត្រូវបានគេកែច្នៃជាទម្រង់ឌីជីថល ដើម្បីបង្ហាញថា ពួកគេកំពុងនិយាយ ឬធ្វើអ្វីមួយ ដែលពួកគេមិនបាននិយាយឬធ្វើ។ ជាធម្មតា គេប្រើបច្ចេកវិទ្យានេះ ដើម្បីធ្វើបាបនរណាម្នាក់ ឬផ្សព្វផ្សាយព័ត៌មានមិនពិត។ ហើយដោយសារការពេញនិយមប្រើកម្មវិធី AI ឬគេហទំព័របង្កើតរូបភាព និងបច្ចេកវិទ្យា Deepfakes នេះ វាអាចជាឱកាសសម្រាប់ជនបោកប្រាស់ អាចប្រើប្រាស់រូបភាពកូនរបស់អ្នកដើម្បីធ្វើរឿងផ្សេងៗបាន។

៤. បញ្ហាក្រមសីលធម៌ និងផលប៉ះពាល់លើសិល្បករ ៖ ការពិភាក្សាភាគច្រើនជុំវិញរូបភាព និងសិល្បៈ ដែលបង្កើតដោយ AI ពាក់ព័ន្ធនឹងសំណួរអំពីភាពត្រឹមត្រូវ ការប្រើប្រាស់ប្រកបដោយក្រមសីលធម៌ និងផលប៉ះពាល់លើសិល្បៈករ និងឧស្សាហកម្មច្នៃប្រឌិត។ វិចិត្រករចំណាយពេលរាប់ម៉ោង ដើម្បីផលិតស្នាដៃរបស់ខ្លួន ហើយ AI អាចចម្លងស្នាដៃនេះ ត្រឹមតែប៉ុន្មាននាទីប៉ុណ្ណោះ ហើយថែមទាំងគ្មានការយល់ព្រមពីវិចិត្រករទៅទៀត។ បច្ចេកវិទ្យានេះ កំពុងតែធ្វើឱ្យវិចិត្រករ លែងមានតម្លៃ ដោយសារភាពងាយស្រួលក្នុងការបង្កើតរូបភាពសិល្បៈ ដោយឥតគិតថ្លៃ។

រឿងដែលអាណាព្យាបាលត្រូវធ្វើ

មុននឹងបញ្ចូលរូបភាពកូនៗ រូបភាពគ្រួសារ និងរូបភាពខ្លួនឯង ទៅក្នុងកម្មវិធី AI អាណាព្យាបាល ត្រូវអនុវត្តគោលការណ៍ឆ្លាតវៃមួយចំនួន ហើយក៏ត្រូវបង្ហាត់កុមារ ដែលជាកូនៗឱ្យធ្វើផងដែរ ដែលសកម្មភាពទាំងនោះរួមមាន ៖ ស្វែងយល់ពីគោលការណ៍របស់កម្មវិធីនោះ ហើយត្រូវដឹងថា រូបភាពរបស់អ្នកនឹងត្រូវប្រើ ឬរក្សាទុកដោយរបៀបណា? ជៀសវៀងការបញ្ចូលរូបភាពកូនរបស់អ្នក ព្រោះទិន្នន័យរបស់ពួកគេពិតជាមានតម្លៃ និងពិបាកក្នុងការការពារ នៅពេលមានបញ្ហា, ប្រើកម្មវិធី AI ដែលមានកេរ្តិ៍ឈ្មោះល្បី, អប់រំកុមារអំពី ការការពារទិន្នន័យផ្ទាល់ខ្លួន ការបង្កើតដានជើងឌីជីថល និងហានិភ័យនៃការចែករំលែកទិន្នន័យផ្ទាល់ខ្លួននៅលើអ៊ីនធឺណិត លើសពីនេះ អាណាព្យាបាល ត្រូវបន្តតាមដានអំពីការវិវត្តន៍នៃបច្ចេកវិទ្យា AI ជាប្រចាំ៕