កាលពីចុងសប្តាហ៍កន្លងទៅនេះ មូលនិធិវេសឡាញបាននាំយកអំណោយថវិកា សម្ភារៈសិក្សា សម្លៀកបំពាក់ ឧបត្ថម្ភដល់សិស្សានុសិស្សចំនួន ៣៨៦នាក់ នៅសាលាបឋមសិក្សាក្រឡាញ់ ខេត្តពោធិ៍សាត់ គោលបំណងគាំទ្រដល់កុមារក្នុងសហគមន៍ដែលត្រូវការធនធាន និងការបំផុសគំនិតឱ្យបន្តការសិក្សា ដើម្បីទទួលបានអនាគតកាន់តែប្រសើរ។

ក្នុងពិធីនេះមានអញ្ជើញចូលរួមពី ឧកញ៉ា ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប និងលោក យឹង សុផៃ នាយកផ្នែកផ្គត់ផ្គង់សេវាកម្មធនធានមនុស្សនៃក្រុមហ៊ុន អេផ្លើស ខនសាល់ធីង ឯ.ក រួមជាមួយបុគ្គលិក អាជ្ញាធរស្រុក ឃុំ និងលោកគ្រូ អ្នកគ្រូនៅសាលាបឋមសិក្សាក្រឡាញ់ ព្រមទាំងមានការទទួលទានអាហារសាមគ្គី ដើម្បីបង្កើនភាពសិទ្ធស្នាលផងដែរ។

ឧកញ៉ា ប៉ិច បូឡែន បានមានប្រសាសន៍ថា គម្រោង “កាតាបពន្លឺនៃអនាគត” មានគោលបំណងគាំទ្រដល់កុមារក្នុងសហគមន៍ដែលត្រូវការធនធាន និងការបំផុសគំនិតឱ្យបន្តការសិក្សា ដើម្បីទទួលបានអនាគតកាន់តែប្រសើរ។ ចំណែកអំណោយទាំងនេះទទួលបានពីការបរិច្ចាគរបស់ ថ្នាក់ដឹកនាំ បុគ្គលិក មាតាបិតា សិស្សានុសិស្ស នៃសាលារៀនវ៉េស្ទឡាញន៍និងសាលារៀនណត្សឡាញន៍ និងក្រុមហ៊ុនដៃគូអាជីវកម្មនានា។

លោកឧកញ៉ាបានក្រើនរំលឹកដល់ក្មួយៗត្រូវបន្តខិតខំប្រឹងប្រែងរៀនសូត្រ ជាពិសេសផ្តោតលើអំណាន និងគណិតវិទ្យា ហើយលោកឧកញ៉ាក៏បានថ្លែងអំណរគុណយ៉ាងជ្រាលជ្រៅចំពោះការចូលរួមចំណែកដ៏ថ្លៃថ្លាពីសប្បុរសជននិងដៃគូអាជីវកម្មនានា ក្នុងការផ្តល់ស្នាមញញឹម និងក្តីសង្ឃឹមដល់កុមារនៅក្នុងសហគមន៍យើង។

សូមបញ្ជាក់ថា សម្ភារៈឧបត្ថម្ភទាំងនោះមានដូចជា សម្ភារៈសិក្សាចំនួន ៤០០ ឈុត (ក្នុង១ឈុត មាន កាតាប១ សៀវភៅសរសេរ ២ក្បាល ខ្មៅដៃ ៣ដើម ជ័រលុប១ ដែកខួង១ និងទឹកដោះគោ High Q ១ប្រអប់) សម្លៀកបំពាក់ អាហារ សៀវភៅអាន និងសម្ភារៈនានា ដែលទទួលបានពីការបរិច្ចាគរបស់ ថ្នាក់ដឹកនាំ បុគ្គលិក មាតាបិតា សិស្សានុសិស្ស នៃសាលារៀនវ៉េស្ទឡាញន៍និងសាលារៀនណត្សឡាញ ព្រមទាំងមានការចូលរួមឧបត្ថម្ភពីក្រុមហ៊ុន អេផ្លើស ខនសាល់ធីង និងសហការឧបត្ថម្ភដោយ ក្រុមហ៊ុនផលិតផលទឹកដោះគោ ហាយឃ្យូ (High Q) ធនាគារ ហ្វីលីព (Phillip) ក្រុមហ៊ុន គីណូ(Kino) ក្រុមហ៊ុន រ៉េវឡន(Revelon) ក្រុមហ៊ុន អប់ស៊ីឌៀន (Obsidian) ក្រុមហ៊ុន ប៉ាមូលី (Pax Moly) និងក្រុមហ៊ុន អាយវ៉ច (Ice-Watch) និងសប្បុរសជននានាតាមរយៈមូលនិធិវេសឡាញកន្លងមកផងដែរ៕