ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នាយកមជ្ឈមណ្ឌលបណ្តុះបណ្តាលវិជ្ជាជីវៈខេត្តរតនគិរី បានលើកឡើងថា វគ្គបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងងាយរងហានិភ័យ ១,៥លាននាក់ របស់រាជរដ្ឋាភិបាល គឺជាឱកាសសម្រាប់បងប្អូនជនជាតិដើមភាគតិច ដើម្បីប្រែក្លាយជីវភាពពីការប្រកបរបរបែបប្រពៃណី មកជារបរបែបបច្ចេកទេសវិជ្ជាជីវៈ ដែលរកចំណូលបានខ្ពស់ និងមានភាពស្ថិតស្ថេរ។
លោក សែម ប៉ាត នាយកមជ្ឈមណ្ឌលបណ្តុះបណ្តាលវិជ្ជាជីវៈខេត្តរតនគិរី មានប្រសាសន៍ថា បងប្អូនជនជាតិដើមភាគតិច ភាគច្រើនពួកគាត់តែងតែចូលព្រៃ អាស្រ័យផលដែលជាមុខរបរចិញ្ចឹមជីវិតជាប្រពៃណីរបស់ពួកគាត់។ ប៉ុន្តែចាប់តាំងពីមានការបើកឱ្យចុះឈ្មោះចូលរៀនជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាល ជាការកត់សម្គាល់របស់លោក មានបងប្អូនជនជាតិដើមភាគតិចបានមកចុះឈ្មោះចូលរៀនដែរ។
បើតាមលោកនាយកមជ្ឈមណ្ឌល យុវជមកជាជនជាតិដើមភាគតិចដែលបានមកចុះឈ្មោះរៀនជំនាញវិជ្ជាជីវៈ និងបច្ចេកទេសនៅខេត្តរតនគិរី មានសរុបចំនួន៦១នាក់ ភាគច្រើនពួកគេជាជនជាតិ ព្រៅ កាវ៉ែត ទំពួន គ្រឹង ចារ៉ាយ កាចក់ និងឡាវ ហើយសិក្ខាកាមភាគច្រើន ស្រឡាញ់ជំនាញសេវាកម្មសម្អាងកាយ រចនាក្រាហ្វិកដោយកុំព្យូទ័រ ដំឡើងបណ្ដាញអគ្គីសនី និងសេវាកម្មកាត់សក់បុរស។
លោក សែម ប៉ាត បញ្ជាក់ថា ចាប់តាំងពីការប្រកាសដាក់ឱ្យអនុវត្តជាផ្លូវការនូវវគ្គបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥ លាននាក់កាលពីថ្ងៃទី១៤ វិច្ឆិកា ឆ្នាំ២០២៣ មក មានយុវជនចំនួន ២៤០នាក់ ក្នុងនោះស្រី ៩៧នាក់ បានចុះឈ្មោះចូលរៀនជំនាញនៅមជ្ឈមណ្ឌលបណ្តុះបណ្តាលវិជ្ជាជីវៈខេត្តរតនគីរីលើជំនាញចំនួន៥ ដែលរួមមានការដំឡើងបណ្តាញបំពង់ទឹក ការដំឡើងបណ្តាញអគ្គិសនីក្នុងអគារ ការរចនាក្រាហ្វិកដោយកុំព្យូទ័រ សេវាកម្មកាត់សក់បុរស និងសេវាវកម្មសម្អាងកាយ៕
