ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ចំណេះដឹងហិរញ្ញវត្ថុបានដើរតួនាទីយ៉ាងសំខាន់នៅក្នុងជីវិតប្រចាំថ្ងៃរបស់ប្រជាពលរដ្ឋ ឬអាចនិយាយបានថា ចំណេះដឹងមួយនេះ គឺជាបំណិនជីវិតដែលមនុស្សម្នាក់ៗត្រូវយកមកប្រើប្រាស់ ក្នុងការចាត់ចែង គ្រប់គ្រងធនធានលុយកាក់ ទ្រព្យសម្បត្តិឱ្យមានប្រសិទ្ធិភាព និងធ្វើឱ្យជីវិតរស់នៅប្រចាំថ្ងៃកាន់តែប្រសើរ។
លោក ទុំ តុលា នាយកសិក្សាធិការផ្នែកបំណិនជីវិត និង Leader in Me នៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រប មានប្រសាសន៍ថា ជាទូទៅនៅពេលដែលកុមារ ឬក៏យុវជនមិនទាន់មានចំណេះដឹងហិរញ្ញវត្ថុ មិនទាន់មានទម្លាប់ក្នុងការប្រើប្រាស់លុយដ៏ត្រឹមត្រូវ ពួកគេងាយស្រួលក្នុងការធ្លាក់ចូលទៅក្នុងបំណុលអាក្រក់ ចូលចិត្តសម្ភារៈនិយម ហើយចំណាយលុយដោយគ្មានគោលដៅ ដែលវាជាហានិភ័យមួយសម្រាប់យុវជន ។
តាមប្រសាសន៍បញ្ជាក់របស់លោក ទុំ តុលា បើក្រឡេកមើលទៅលើការសិក្សានៅពេលបច្ចុប្បន្ន យុវជនបានចំណាយរយៈពេល១២ឆ្នាំនៅក្នុងការសិក្សាពីកម្រិតបឋមសិក្សា រហូតដល់កម្រិតវិទ្យាល័យ ហើយអាចចំណាយរយៈពេល៤ឆ្នាំទៀតនៅកម្រិតសិក្សាថ្នាក់បរិញ្ញាបត្រ និងអាចបន្ត ២ ទៅ៣ឆ្នាំថែមទៀត នៅថ្នាក់អនុបណ្ឌិត ឬបន្តទៅកាន់ថ្នាក់បណ្ឌិត នៅក្នុងគោលបំណងប្រកបអាជីវកម្មខ្លួនឯង ឬទៅធ្វើការងារតាមជំនាញដែលខ្លួនប្រាថ្នា, តែជាចំណុចរួម យុវជនចង់មានសេរីភាពហិរញ្ញវត្ថុ ដូច្នេះប្រសិនបើពួកគេមិនមានចំណេះដឹងហិរញ្ញវត្ថុទេនោះ គឺពួកគេមិនអាចមានសេរីភាពហិរញ្ញវត្ថុបានឡើយ ។
បើតាមលោក ទុំ តុលា នៅក្នុងការគ្រប់គ្រងចាយវាយទៅលើហិរញ្ញវត្ថុ គឺមាន ៣ចំណុចសំខាន់ ទី១ បុគ្គលម្នាក់ៗត្រូវមានចំណេះដឹងហិរញ្ញវត្ថុ ដោយមានន័យថា យុវជនត្រូវដឹងថា តើរបស់ណាជារបស់តម្រូវការ ? តើរបស់ណាដែលជារបស់ចង់បាន? ហើយអ្វីជាទ្រព្យសម្បត្តិ និងអ្វីទៅជាទ្រព្យបំណុល ? ក្នុងនោះយុវជនក៏ត្រូវដឹងដែរថា តើការគ្រប់គ្រងចំណាយដោយរបៀបម៉េច ? ឬអាចនិយាយថា តើនៅពេលដែលគាត់មានលុយហើយ តើត្រូវចំណាយមុន ឬក៏សន្សំមុន ? ទី២ ត្រូវមានទម្លាប់ក្នុងការប្រើប្រាស់លុយដោយត្រឹមត្រូវ និងទី៣ គឺគ្រប់គ្រងសម្ពាធសម្ភារៈនិយម ។ លោក ទុំ តុលា មានប្រសាសន៍ថា សម្ពាធសម្ភារៈនិយម មិនមែនមានសម្រាប់តែកុមារ ឬយុវជននោះទេ សូម្បីតែមនុស្សចាស់ក៏មានបញ្ហានេះដែរ ដូច្នេះប្រសិនបើអ្នកទាំងអស់គ្នាមិនទទួលបានចំណេះដឹងដ៏ត្រឹមត្រូវ នោះនឹងធ្លាក់ចូលទៅក្នុងបំណុល ដែលនឹងមានបញ្ហានៅក្នុងផ្នែកហិរញ្ញវត្ថុ។
តើវ័យណាទើបអាចរៀនពីចំណេះដឹងហិរញ្ញវត្ថុបាន ?
នាយកសិក្សាធិការផ្នែកបំណិនជីវិតនៃបណ្តាញគ្រឹះស្ថានអប់រំ វេសឡាញ មានប្រសាសន៍ថា នៅពេលដែលយើងនិយាយពីចំណេះដឹងហិរញ្ញវត្ថុ យើងត្រូវគិតអំពីបំណិនជីវិត ហើយបំណិនជីវិតគឺជាអ្វីដែលយើងប្រើប្រាស់រាល់ថ្ងៃ ដូចនេះ ការបង្រៀនពីចំណេះដឹងហិរញ្ញវត្ថុ គឺយើងអាចបង្រៀនចាប់តាំងពីកុមារមានអាយុ៦ឆ្នាំទៅ ពោលគឺនៅពេលដែលគាត់ចេះចាយលុយ ដើម្បីឱ្យគាត់អាចគ្រប់គ្រងលុយដោយខ្លួនឯង។ « បំណិនជីវិត គាត់ត្រូវការចាយលុយរាល់ថ្ងៃ ប្រសិនបើគាត់មិនមានចំណេះដឹងហិរញ្ញវត្ថុទេ ការចាយវាយលុយរបស់គាត់គឺមិនមានគោលដៅច្បាស់លាស់ទេ… អញ្ចឹងទាល់តែយើងបង្រៀនគាត់ពីតូចឡើងមក ដើម្បីឱ្យក្លាយជាទម្លាប់ ហើយគាត់អាចប្រើប្រាស់លុយប្រកបដោយប្រសិទ្ធភាពបាន» ។
យ៉ាងណាក៏ដោយ បើតាមលោក ទុំ តុលា ប្រសិនបើ កុមារ ឬយុវជន ទទួលបានចំណេះដឹងពីហិរញ្ញវត្ថុ អាចប្រើប្រាស់វាក្នុងជីវិតប្រចាំថ្ងៃបាន នោះនៅពេលពួកគេធំឡើង ពួកគេអាចដឹកនាំខ្លួនឯង ដឹកនាំគ្រួសារបាន ព្រោះថា ឪពុកម្តាយមិនអាចតាមជួយជ្រោមជ្រែងពួកគាត់បានរហូតនោះទេ ៕
