បន្ទាប់ពីប្រឡងយ៉ាងតឹងរឹងអស់រយៈពេលជាច្រើនខែ គណៈកម្មការបានរកឃើញសិស្សឆ្នើមចំនួន២៥រូប ក្លាយជា​សិស្ស​ឆ្នើម​ថ្នាក់ទី១០ ប្រចាំស្រុកព្រៃឈរ ហើយ​ក្នុងនោះ​សិស្ស​ឆ្នើម​ជាង​គេ​ចំនួន៣រូប ដែល​មានចំណាត់ថ្នាក់លេខ១ ដល់លេខ៣ ទទួល​បាន​រង្វាន់​ម៉ូតូ​ម្នាក់មួយ​គ្រឿង ពី “ពានរង្វាន់​សម្តេច​មហាបវរធិបតី ហ៊ុន ម៉ាណែត” ។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា បានបង្ហាញក្តីរំភើបរីករាយ និងចូលរួមអបអរសាទរដល់សិស្សជ័យលាភីទាំងអស់ ព្រមទាំងលោកគ្រូ អ្នកគ្រូ អ្នកអាណាព្យាបាល មាតាបិតាដែលបានរួមចំណែកជំរុញឱ្យកូនៗ សិស្សានុសិស្សទទួលបានលទ្ធផលគួរជាទីមោទនៈនេះ។

រដ្ឋមន្រ្តីក្រសួងអប់រំបាន​គូសបញ្ជាក់ថា ប្រសិនបើមិនមានគ្រូល្អទេ ក៏​មិនមានសិស្សពូកែដែរ ហើយលទ្ធផលដ៏ត្រចះត្រចង់នេះ មិនអាចសម្រេចបានឡើយ បើមិនមានការប្តេជ្ញាចិត្តខិតខំរៀនសូត្ររបស់សិស្សផ្ទាល់។ ឯកឧត្តមបណ្ឌិតសភាចារ្យ ហង់ជួន ណារ៉ុន បន្តថា ការគាំទ្រពីមាតាបិតា អ្នកអាណាព្យាលបាល និងការគាំទ្ររបស់សាលារៀន នាយកសាលា គណៈគ្រប់គ្រង ដើរតួនាទីដ៏សំខាន់ក្នុងការបង្កើតបរិយាកាសឱ្យគ្រូបានបញ្ចេញសមត្ថភាពបង្រៀន និងផ្តល់ឱកាសឱ្យក្មួយៗយុវសិស្សយើងខិតខំរៀនសូត្រអស់ពីសមត្ថភាព។

បើតាមក្រសួងអប់រំ ការប្រឡងសិស្សឆ្នើមថ្នាក់ទី១០ “ពានរង្វាន់ សម្តេចមហាបវរធិបតី ហ៊ុន ម៉ាណែត” មានគោលដៅសំខាន់ពីរ រួមមាន ទី១.លើកទឹកចិត្តដល់ប្អូនៗ ដែលមានសមត្ថភាពខ្ពស់ ដើម្បីទទួលបាននូវរង្វាន់តបស្នងចំពោះការខិតខំរៀនសូត្រកន្លងមក និងទី២. ដើម្បីជំរុញលើកទឹកចិត្តឱ្យបន្តខិតខំប្រឹងប្រែងរៀនសូត្រចាប់ពីឥលូវ មិនចាំបាច់ទាល់តែជិតដល់ប្រឡងសញ្ញាបត្រមធ្យមសិក្សាទុតិយភូមិនោះទេ។

សម្រាប់ការប្រឡងប្រជែងជ្រើសរើសសិស្សឆ្នើមថ្នាក់ទី១០ ប្រចាំស្រុកព្រៃឈរនេះ មានសិស្ស​នៃវិទ្យាល័យចំនួន៥​បាន​ចូលរួម​ រួមមាន វិទ្យាល័យ ហ៊ុន សែន ព្រៃទទឹង,​ វិទ្យាល័យ ហ៊ុន សែន គរ,​ វិទ្យាល័យ ស្រេង​គីម,​ វិទ្យាល័យ ល្វា​ និង​វិទ្យាល័យ នរណឬទ្ធិ គន្ធបុប្ផា។ ដោយ​ឡែកបេក្ខជនចូលរួមប្រឡង គឺត្រូវ​បានកំណត់គឺជាសិស្សថ្នាក់ទី១០ នៃឆ្នាំសិក្សា២០២៣-២០២៤ ដែលទទួលបាននិទ្ទេស A ឬ B សម្រាប់ឆមាសទី១ នៃឆ្នាំសិក្សា ២០២៣-២០២៤ និងសិស្សមិនទទួលបាននិទ្ទេស A ឬ B ក៏អាចចូលរួមការប្រឡងជ្រើសរើសសិស្សឆ្នើមនេះបានផងដែរ​ ។

ក្នុងការ​ប្រឡង​នេះ បេក្ខជនជ័យលាភីលេខ ១ ទទួលបានរង្វាន់ម៉ូតូ Honda Dream 125ccមួយគ្រឿង និងថវិកា ១លានរៀល, ជ័យលាភីលេខ ២ និងលេខ ៣ ទទួលបានរង្វាន់ម៉ូតូ Wave ម្នាក់ ១គ្រឿង និងថវិកា ១លានរៀល, ជ័យលាភីលេខ ៤ និងលេខ ៥ ទទួលបានកុំព្យូរទ័រយួរដៃមួយគ្រឿង និងថវិកា ១លានរៀល, ជ័យលាភីពីលេខ ៦ ដល់លេខ ១០ ទទួលបានថវិកាម្នាក់ ២លានរៀល, ជ័យលាភីពីលេខ ១១ ដល់លេខ ២០ ទទួលបាន ១លានរៀល, ជ័យលាភីទី២១ ដល់ទី២៥ ទទួលបានថវិកា ៥០ម៉ឺនរៀល។ ក្នុងនោះ ជ័យលាភីលេខ ១ ក្នុងមុខវិជ្ជានីមួយៗទទួលបានប័ណ្ណសរសើរ និងកុំព្យូរទ័រយួរដៃ​ ១គ្រឿង​ផងដែរ​៕