ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងជំនួបជាមួយគណៈប្រតិភូក្រុមហ៊ុនតូយូតាកាលពីថ្ងៃសុក្រ (២៩ វិច្ឆិកា) ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានបង្ហាញពីការស្វាគមន៍ និងត្រៀមសហការជាមួយក្រុមហ៊ុន Toyota Tsusho Manufacturing (Cambodia) Co., Ltd. ក្នុងការបង្កើតមជ្ឈមណ្ឌលបណ្តុះបណ្តាលជំនាញយានយន្ត ដើម្បីអភិវឌ្ឍធនធានមនុស្សកម្ពុជាក្នុងវិស័យយានយន្ត។
ឯកឧត្តម ហេង សួរ មានប្រសាសន៍ថា ចំពោះគម្រោងបង្កើតមជ្ឈមណ្ឌលបណ្តុះបណ្តាលជំនាញយានយន្ត (Toyota Traning Center) នៅកម្ពុជា ក្រសួងការងារបានត្រៀមខ្លួនរួចរាល់ក្នុងការសហការជាមួយក្រុមហ៊ុន ក្នុងការអភិវឌ្ឍការបណ្តុះបណ្តាលធនធានមនុស្សក្នុងវិស័យយានយន្ត ដោយឯកឧត្តមបានស្នើដល់ក្រុមហ៊ុនពិនិត្យមើលលទ្ធភាពក្នុងការបង្កើតមជ្ឈមណ្ឌលបណ្តុះបណ្តាលនេះក្នុងបរិវេណគ្រឹះស្ថាន TVET នៅរាជធានីភ្នំពេញ។
លោក Fujita Ryoji នាយកក្រុមហ៊ុន Toyota Tsusho Manufacturing (Cambodia) Co., Ltd. បានបញ្ជាក់ថា គម្រោងបង្កើតមជ្ឈមណ្ឌលបណ្តុះបណ្តាលជំនាញយានយន្តនេះ គឺក្នុងគោលបំណងមិនត្រឹមតែសម្រាប់ដំណើរការផលិតកម្មរថយន្តរបស់ក្រុមហ៊ុននោះទេ តែនឹងផ្តល់ការបណ្តុះបណ្តាញជំនាញក្នុងវិស័យយានយន្តដល់សិស្សនិស្សិត និងគ្រូបង្គោល ជាមួយនឹងបច្ចេកវិទ្យាថ្មីៗនៃវិស័យយានយន្តសម្រាប់កម្ពុជា។ គម្រោងមជ្ឈមណ្ឌលបណ្តុះបណ្តាលជំនាញយានយន្តនេះ អាចនឹងមានកិច្ចសហប្រតិបត្តិការជាមួយគ្រឹះស្ថាន TVET កម្ពុជា ក្នុងការបណ្តុះបណ្តាលជំនាញដូចជា ជំនាញថែទាំជួសជុលរថយន្ត ជំនាញតោននិងបាញ់ថ្នាំរថយន្ត រួមនិងការផ្តល់នូវឧបករណ៍សម្ភារៈនានាពាក់ព័ន្ធនឹងវិស័យរថយន្ត ជាដើម។
លោកបណ្ឌិត យង់ ពៅ អគ្គលេខាធិការរាជបណ្ឌិតសភាកម្ពុជា មានប្រសាសន៍ថា ការបង្កើតមជ្ឈមណ្ឌលបណ្តុះបណ្តាលជំនាញយានយន្តនៅកម្ពុជា របស់ក្រុមហ៊ុន Toyota គឺជាការបណ្តុះបណ្តាលវិជ្ជាជីវៈប្រកបដោយគុណភាពទៅលើជំនាញបច្ចេកទេសតាមបែបជប៉ុនដល់យុវជនកម្ពុជា ដែលក៏នឹងធ្វើឱ្យពួកគេទទួលបានឱកាសការងារជាមួយក្រុមហ៊ុនជប៉ុន ក៏ដូចជាក្រុមហ៊ុនផ្សេងៗទៀត។
តាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) បច្ចុប្បន្នកម្ពុជាកំពុងត្រៀមខ្លួនក្លាយជាមជ្ឈមណ្ឌលប្រមូលផ្តុំសកម្មភាពផលិតគ្រឿងបង្គំយានយន្ត ខណៈក្រុមហ៊ុនផ្គុំដំឡើងយានយន្ត និងក្រុមហ៊ុនផលិតគ្រឿងបង្គុំយានយន្តល្បីៗរបស់ពិភពលោកបានកំពុងមកបណ្តាក់ទុកបង្កើតរោងចក្រនៅកម្ពុជាជាបន្តបន្ទាប់ ដូចជា ក្រុមហ៊ុន Toyota, RMA, Denso ក៏ដូចជា SUmitomo ជាដើម។ បើតាម CDC បច្ចុប្បន្ន ប្រទេសជប៉ុន កូរ៉េ និងចិន គឺជាប្រភពទុនវិនិយោគសំខាន់ជាងគេ ខណៈដែលប្រទេសថៃ និងជប៉ុន គឺជាទីផ្សារនាំចេញធំជាងគេរបស់កម្ពុជា៕
