ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ការដាក់ពាក្យសិក្សាទៅសាកលវិទ្យាល័យនៅក្រៅប្រទេសជាពិសេសដាក់ពាក្យអាហារូបករណ៍ New Zealand Scholarship សិស្សនិស្សិតចាំបាច់ត្រូវស្វែងយល់ពីអាហារូបករណ៍ឱ្យបានច្បាស់ និងយល់ពីលក្ខខណ្ឌផ្សេងៗដែលអាហារូបករណ៍ និងសាកលវិទ្យាល័យដែលស្នើទៅសិក្សា ។ នេះជាការលើកឡើងរបស់លោក ប្រាក់ គៀត អតីតបេក្ខភាពអាហារូបករណ៍ថ្នាក់បរិញ្ញាបត្រជាន់ខ្ពស់ជំនាញ Art in TESOL នៃសាកលវិទ្យាល័យវិចតូរៀ នៃទីក្រុងWellington ប្រទេសណូវែលហ្សេឡង់ ឆ្នាំសិក្សា២០២០-២០២១ ។
លោក ប្រាក់ គៀត បានលើកឡើងថា ដើម្បីទទួលបានឱកាសសិក្សាពីអាហារូបករណ៍ New Zealand Scholarship សិស្សនិស្សិត និងបេក្ខជនដាក់ពាក្យ ត្រូវរៀបចំខ្លួននូវ ៤ចំណុចដូចជា ការជ្រើសរើសជំនាញ, ការសរសេរពាក្យស្នើសុំ, ការរៀបចំឯកសារចាំបាច់ និង យល់ពីដំណាក់កាលនៃការដាក់ពាក្យ ។ បើតាមលោក ប្រាក់ គៀត ការជ្រើសរើសជំនាញមានន័យថា និស្សិតត្រូវមើលលើជំនាញសិក្សានៅថ្នាក់បរិញ្ញាបត្រថា តើពាក់ព័ន្ធនឹងផ្នែកអ្វី ដូចជាវិទ្យាសាស្រ្ត បច្ចេកវិទ្យា នយោបាយ ឬវិស្វកម្មជាដើម ។ ការមើលទៅលើជំនាញ គឺដើម្បីឱ្យបេក្ខជនដាក់ពាក្យងាយស្រួលក្នុងការជ្រើសរើសជំនាញដែលស្រដៀង ឬជំនាញដែលទាក់ទងព្រោះជំនាញថ្នាក់បរិញ្ញាបត្រជាន់ខ្ពស់នៅប្រទេសផ្សេងៗមិនមានឈ្មោះចំដូចគ្នាឡើយ គឺមានឈ្មោះស្រដៀង ឬជំនាញដែលអាចមានទំនាក់ទំនងគ្នា ។
លោក ប្រាក់ គៀត បានបន្តថា ការសរសេរពាក្យស្នើសុំអាហារូបករណ៍ ជាឱកាសដែលបេក្ខភាពស្នើសុំអាហារូបករណ៍បានបង្ហាញអំពីស្នាដៃ ឬបទពិសោធន៍ការងារសង្គម និងការងារស្ម័គ្រចិត្តផ្សេងៗដែលបេក្ខជនធ្លាប់បានធ្វើដើម្បីជាចំណាប់អារម្មណ៍ដល់អ្នកពិនិត្យពាក្យស្នើសុំអាហារូបករណ៍ ។ លើសពីនេះការដាក់ពាក្យស្នើសុំអាហារូបករណ៍ ក្នុងពេលសរសេរ Writing Style បេក្ខជនត្រូវមានការប្រយ័ត្នប្រយែងក្នុងការសរសេរដែលធ្វើយ៉ាងណាឱ្យមានភាពសាមញ្ញ ផ្លូវការ និងភ្ជាប់ជាមួយនឹងបទពិសោធន៍ក្នុងការងារសង្គមដែលធ្វើឱ្យមានភាពងាយស្រួលក្នុងការពិនិត្យ និងអាចទាក់ទាញចំណាប់អារម្មណ៍ពីអ្នកពិនិត្យ ។
ជាមួយគ្នានេះ ការរៀបចំឯកសារចាំបាច់ បេក្ខជនដែលមានគោលបំណងក្នុងការដាក់ពាក្យអាហារូបករណ៍ត្រូវរៀបចំឱ្យបានជាស្រេច ដោយក្រោយពេលបញ្ចប់ការសិក្សាភ្លាម ត្រូវស្នើសុំប្រតិបត្តិពិន្ទុភ្លាមឱ្យរួចជាស្រេចតាមឆ្នាំសិក្សា ដែលចំបាច់សម្រាប់ការដាក់ពាក្យ និងលិខិតបញ្ជាក់ការងារពីប្រធានក្រុមធនធានមនុស្សនៅកន្លែងធ្វើការ ។ អាហារូបករណ៍ New Zealand ក៏តម្រូវទាមទារឱ្យបេក្ខជនមានបទេពិសោធន៍ការងារចំនួន១ឆ្នាំឡើង ចំណែកភាគីខាងសាលាទាមទារបទពិសោធន៍ការងារ២ឆ្នាំឡើង ។ ក្នុងករណីនេះ ប្រសិនបើមានបទពិសោធន៍១ឆ្នាំ ឬ១ឆ្នាំជាងអាចស្នើពាក្យសុំចូលរៀនសិនទម្រាំដល់ពេលទៅសិក្សានិងគ្រប់ចំនួនបទពិសោធន៍ការងារ ។
សរុបមកវិញ ដំណាក់កាល នៃការដាក់ពាក្យត្រូវមាន បទពិសោធន៍ការងារ ប្រតិបត្តិពិន្ទុសិក្សាថ្នាក់បរិញ្ញាបត្រ លិខិតអនុសាសន៍ចំនួន២ពីលោកគ្រូអ្នកគ្រូ ឬសាស្ត្រាចារ្យ ពិន្ទុIELTS និងការត្រៀមខ្លួនរង់ចាំដំណឹងពីភាគីអាហារូបករណ៍ដើម្បីបន្តបញ្ជាក់ទៅកាន់សាកលវិទ្យាល័យថា ខ្លួនបានជាប់អាហារូបករណ៍ជាស្ថាពរ ។
គួរបញ្ជាក់ដែរថា ការចែករំលែកបទពិសោធន៍របស់លោក ប្រាក់ គៀត អតីតបេក្ខភាពអាហារូបករណ៍ថ្នាក់បរិញ្ញាបត្រជាន់ខ្ពស់ជំនាញ Art in TESOL សាកលវិទ្យាល័យវិចតូរៀនៃទីក្រុងWellington បានធ្វើឡើងនៅក្នុងសិក្ខាសាលាស្ដីពី «កម្មវិធីអាហារូបករណ៍ New Zealand Scholarships នៃប្រទេសប្រទេសណូវែលហ្សេឡង់ និងការចែករំលែកបទពិសោធន៍ និងគន្លឹះជោគជ័យ» ដែលរៀបចំដោយក្រុមការងារសាបព្រោះគ្រាប់ពូជ នៃសហភាពសហព័ន្ធយុវជនកម្ពុជា រាជធានីភ្នំពេញ កាលពីពេលថ្មីៗកន្លងទៅនេះ៕
