ក្នុងឱកាស​បើកបវេសនកាលឆ្នាំសិក្សា២០២៣-២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានផ្តល់នូវអនុសាសន៍ ៩ចំណុច ដើម្បីឱ្យដំណើរការឆ្នាំសិក្សា​២០២៣-២០២៤ ទទួលបានលទ្ធផលល្អប្រសើរតាមការគ្រោងទុក។

អនុសាសន៍ទាំង៩ចំណុចនោះ រួមមាន ៖ ទី១. ក្រសួងអប់រំ យុវជន និងកីឡា បន្ត​អនុវត្តកម្មវិធីកំណែទម្រង់​វិស័យអប់រំ ដែលបានដាក់ចេញរួចហើយ ជាពិសេស​ការរៀបចំយន្តការគាំទ្រ និង​យន្តការវាយតម្លៃសាលារៀនគំរូ, ទី២. គ្រឹះស្ថានសិក្សា​គ្រប់កម្រិត ត្រូវ​បន្ត​រៀបចំបរិស្ថានសាលារៀនស្អាត គ្មានសំរាម សាលារៀនបៃតង ឱ្យស័ក្តិសមជាទីកន្លែងសម្រាប់ការអប់រំ និងបណ្តុះបណ្តាលគំនិតស្អាតស្អំ ឥរិយាបទល្អ និង​គ្មានការ​ញ៉ាំញីផ្លូវចិត្ត និង​ផ្លូវកាយ។

ទី៣. លោកគ្រូអ្នកគ្រូទាំងអស់ សូមបន្ត​ដើរតួជាបុគ្គលនាំមុខ ជាឪពុកម្តាយទី២ ជាមគ្គុទ្ទេសក៍ ជាអ្នកស្រាវជ្រាវ ជាទីប្រឹក្សា និង​ជាអ្នក​ច្នៃប្រឌិត ដោយត្រូវខិតខំប្រឹងប្រែងអភិវឌ្ឍសមត្ថភាព​របស់ខ្លួន​ជាប្រចាំ ទាំងខាងផ្នែកចំណេះដឹង ទាំងវិធីសាស្រ្តបង្រៀន រួមទាំងការប្រើប្រាស់បច្ចេកវិទ្យាព័ត៌មាន និង​ភាសាបរទេស។

ទី៤. មាតាបិតា អ្នកអាណាព្យាបាល សូមចូលរួមតាមដានលទ្ធផលសិក្សា អត្តចរិត សីលធម៌ សុជីវធម៌ របស់កូនទាំងនៅក្នុងគ្រួសារ សាលារៀន និងសហគមន៍ ព្រមទាំងជួយបង្រៀនកូនបន្ថែមនៅផ្ទះ ឬបង្កលក្ខណៈឱ្យកូនបានសិក្សា​បន្ថែមនៅផ្ទះ ជាពិសេស​ការចូលរួមអានសៀវភៅជាមួយកូន ជាដើម។ បន្ថែមពីលើនេះ មាតាបិតា អ្នកអាណាព្យាបាលត្រូវផ្គត់ផ្គង់សម្ភារសិក្សា ទិញសៀវភៅ លំហាត់ឱ្យកូនសម្រាប់ហ្វឹកហាត់ទាំងនៅសាលារៀន និងនៅផ្ទះ, ចូលរួមគាំទ្រជាសម្ភារៈ ថវិកា ដល់ដំណើរការបណ្ណាល័យនៅតាមសាលារៀន, ចូលរួមក្នុងការអភិវឌ្ឍ​សាលារៀន និង​គាំទ្រដល់គ្រូបង្រៀន តាមគ្រប់លទ្ធភាព។

ទី៥. ប្អូនៗ ក្មួយៗ សិស្សានុសិស្ស យុវជន យុវនារីទាំងអស់ សូមបន្តខិតខំរៀនសូត្រ និង​ស្រាវជ្រាវឱ្យបានខ្ជាប់ខ្ជួន និង​ចូលរួមធ្វើ “អំពើល្អ” ដើម្បីការរីកចម្រើននៅក្នុងគ្រួសារ សង្គម និងប្រទេសជាតិយើងទាំងមូល។ ជាមួយនេះដែរ សូមប្អូនៗ ក្មួយៗ សិស្សានុសិស្ស ចងចាំជានិច្ចថា បើយើងស្រឡាញ់ខ្លួន ស្រឡាញ់ឪពុកម្តាយ និងចង់បាន​អនាគតរុងរឿង គឺត្រូវនៅ​ឱ្យឆ្ងាយពីគ្រឿងញៀន និង​ការប្រព្រឹត្តអំពើអបាយមុខផ្សេងៗ។

ទី៦. ក្រសួង ស្ថាប័នពាក់ព័ន្ធ អាជ្ញាធរដែនដី សហគមន៍ និងអ្នកពាក់ព័ន្ធទាំងអស់ សូមបន្តចូលរួម និងគាំទ្រឱ្យកាន់តែសកម្មថែមទៀត ក្នុង​ការ​អភិវឌ្ឍសាលារៀន ព្រមទាំងបន្ត​ជួយផ្សព្វផ្សាយ ឱ្យ​បានទូលំទូលាយអំពី​កិច្ចការការពារ​កុមារ ពីអំពើហិង្សា និង​ពលកម្មកុមារគ្រប់ទម្រង់។

ទី៧. ដៃគូអភិវឌ្ឍ អង្កការមិនមែនរដ្ឋាភិបាលជាតិ និងអន្តរជាតិ និងសប្បុរសជននានា សូមបន្ត​ចូលរួមឱ្យបានកាន់តែសកម្មបន្ថែមទៀត ក្នុងការជួយគាំទ្រដល់វិស័យអប់រំ ជាពិសេសលើក​កម្ពស់អភិបាលកិច្ចសាលារៀន នៅក្នុងព្រះរាជាណាចក្រ​កម្ពុជា។

ទី៨. គ្រប់ស្ថានីយ៍វិទ្យុ ទូរទស្សន៍របស់រដ្ឋ និងឯកជន និងប្រព័ន្ធផ្សព្វផ្សាយទាំងអស់ សូមបន្ត​ជួយផ្សព្វផ្សាយឱ្យបានទូលំទូលាយ អំពីយុទ្ធនាការនៃការប្រមូលកុមារចូលរៀន និង​សារៈសំខាន់នៃការអប់រំ ជាពិសេសការ​ផលិតកម្មវិធីអប់រំ និងវីដេអូបង្រៀន ដើម្បី​ឱ្យ​សេវាអប់រំកាន់តែគ្របដណ្តប់គ្រប់ទីកន្លែង គ្រប់ពេលវេលា និង​ស្របទៅនឹងទស្សនាទាននៃការអប់រំពេញមួយជីវិត។

និងទី៩ សូមមាតាបិតា អ្នក​អាណាព្យាបាលគ្រប់រូប នាំកូនចៅមកចុះឈ្មោះចូលរៀន និង​បន្ត​ផ្តល់​ការ​គាំទ្រ ការ​លើកទឹកចិត្ត និង​ការ​ជួយបង្រៀនបន្ថែមតាមគ្រប់រូបភាព នៅ​ឆ្នាំសិក្សាថ្មី ២០២៣-២០២៤ នេះទាំងអស់គ្នា៕