ក្រោមកិច្ចសហប្រតិបត្តិការជាមួយកម្មវិធីអភិវឌ្ឍន៍ជំនាញ នៃអង្គការស្វីសខន់ថាក់ មន្ទីរទេសចរណ៍ខេត្តប៉ៃលិន កាលពីពេលថ្មីៗនេះ បានធ្វើ​ការ​បណ្តុះបណ្តាលជំនាញ​បដិសណ្ឋារកិច្ច ក៏​ដូចជាជំនាញចុងភៅ ទៅ​ដល់​ចុងភៅ​នៅ​តាម​ភោជនីយដ្ឋាន ក៏​ដូចជា​សណ្ឋាគារនានា​នៅ​ក្នុង​ខេត្ត​ ដើម្បីពង្រឹងសមត្ថភាពចុងភៅ និងលើកកម្ពស់សុវត្ថិភាពចំណីអាហារ។

លោក ជួប រតនា ប្រធាននាយកដ្ឋានផែនការអភិវឌ្ឍទេសចរណ៍ និងជាប្រធានលេខាដ្ឋាន នៃគណៈកម្មការគ្រប់គ្រងគម្រោងហូកា នៃក្រសួងទេសចរណ៍ មានប្រសាសន៍ថា ការផ្ដល់វគ្គបណ្ដុះបណ្ដាលនេះ មានគោលបំណងពង្រឹងសមត្ថភាពចុងភៅ ដែលមិនធ្លាប់បានរៀនជំនាញចុងភៅនៅសាលាពីមុនមក។ លោកថា ចុងភៅនៅតាមខេត្តគោលដៅមិនមានសាលារៀនជំនាញចុងភៅនោះទេ ដោយ​ពួក​គាត់រៀនចេះតាមអ្វីដែលធ្លាប់ធ្វើ មិនមានស្តង់ដាត្រឹមត្រូវ ដូច្នេះវគ្គបណ្ដុះបណ្ដាលនេះ បង្កើតឡើងដោយមានស្តង់ដា ឯកសារច្បាស់លាស់ ដើម្បីជួយឱ្យជំនាញចុងភៅរបស់ពួកគាត់មានស្តង់ដា គុណភាពសេវាកម្មល្អ ការគិតគូរទៅលើសុខសុវត្ថិភាព និងអនាម័យកាន់តែល្អប្រសើរ។

ប្រធាននាយកដ្ឋានផែនការអភិវឌ្ឍទេសចរណ៍ បន្ថែមថា ជំនាញចុងភៅ កំពុងមានតម្រូវការទីផ្សារការងារ ហើយនៅតាមហាងនីមួយៗពិបាករកអ្នកមានជំនាញចុងភៅច្បាស់លាស់ ដោយសារអត់មានសាលារៀន ហើយបើទៅរៀននៅសាលាចំណាយខ្ពស់ មួយឆ្នាំ៤ទៅ៥ពាន់ដុល្លារ។ បើតាមលោក ជួប រតនា ការបណ្ដុះបណ្ដាលជំនាញចុងភៅនេះ ជាផ្នែកមួយ នៃការបណ្តុះបណ្ដាលធនធានមនុស្សនៅក្នុងវិស័យទេសចរណ៍ ជាពិសេសជំនាញចុងភៅ ដែលកំពុងមានតម្រូវការទីផ្សារការងារខ្ពស់ ដោយពួកគាត់អាចចាប់ផ្ដើមពីកូនកាំបិត រហូតដល់មេចុងភៅ អាចទទួលបានប្រាក់ខែរាប់ពាន់ដុល្លារ ឱ្យតែមានជំនាញច្បាស់លាស់។

វគ្គបណ្ដុះបណ្ដាលហូកា លើជំនាញចុងភៅនៅ​ខេត្តប៉ៃលិននេះ ផ្តោតទៅលើ១២មេរៀន រួមមាន ១. ប្រសិទ្ធភាពការងារ ជាមួយក្រុម និងបុគ្គលិកផ្ទះបាយ, ២. គោរពតាមកន្លែងធ្វើការ និងអនាម័យក្នុងផ្ទះបាយ, ៣. លាងសម្អាតឧបករណ៍ និងថែរក្សាសម្ភារ:ផ្ទះបាយ, ៤. អនុវត្តបច្ចេកទេសមូលដ្ឋាននៃការចម្អិន, ៥.គោលការណ៍ និងការអនុវត្តរបស់ចុងភៅ, ៦.រៀបចំម្ហូបពីស៊ុត និងវិធីផ្សេងៗនៃការចម្អិនស៊ុត, ៧. រៀបចំទឹកស៊ុប និងទឹកជ្រលក់តាមប្រភេទផ្សេងៗ, ៨.រៀបចំធ្វើស៊ុប, ៩. រៀបចំអាហារដំបូង និងសាឡាដ (បែបខ្មែរ និងបរទេស), ១០. រៀបចំអាហារចម្បង, ១១. រៀបចំប៉ាស្តា និងបាយ និង ១២. រៀបចំបង្អែមបែបអាស៊ី ។

លោក ជួប រតនា មានប្រសាសន៍ថា កម្មវិធីនេះបណ្ដុះបណ្ដាលនេះ បានកំពុងធ្វើជា​បន្ត​បន្ទាប់​នៅខេត្តគោលដៅចំនួន១២ រួមមាន ក្រចេះ ព្រះវិហារ ស្ទឹងត្រែង មណ្ឌលគិរី រតនគិរី ពោធិ៍សាត់ បាត់ដំបង ប៉ៃលិន ឧត្តរមានជ័យ បន្ទាយមានជ័យ កំពង់ឆ្នាំង កោះកុង។ គិតពី២០១៧ ដល់ ២០២៤ កម្មវិធីបានធ្វើ​ការ​បណ្ដុះបណ្ដាលជំនាញបដិសណ្ឋារកិច្ចបានជាង ៨ពាន់នាក់ ហើយជំនាញចុងភៅប្រហែល ៦រយនាក់៕