ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា នៅតែរក្សាសុក្រឹតភាព យុត្តិធម៌ និងតម្លាភាព សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១៨ សីហា ២០២៥ ខាងមុខ ស្របតាមគោលការណ៍ “អ្នកចេះ គឺជាប់”។
ក្នុងកិច្ចប្រជុំត្រៀមរៀបចំការប្រឡងសញ្ញាបត្រមធ្យមសិក្សាទុតិយភូមិ កាលពីពេលថ្មីៗនេះ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា បានផ្ដល់អនុសាសន៍ថា ដើម្បីជំរុញប្រសិទ្ធភាពការងារ និងធានាឱ្យបាននូវដំណើរការប្រឡងប្រកបដោយភាពរលូន សុក្រឹតភាព យុត្តិធម៌ និងតម្លាភាព ស្របតាមគោលការណ៍ “អ្នកចេះ គឺជាប់” ក្រុមការងារជំនាញត្រូវអនុវត្ត ដូចជា ការពង្រឹងយន្តការ និងសម្របសម្រួលដល់ការបន្ថែមបេក្ខភាពបេក្ខជនក្នុងការប្រឡង និងប្រុងប្រៀបជានិច្ចចៀសវាងទឹកជន់លិចនៅរដូវវស្សា ដោយសារជំនន់ទឹកភ្លៀងនាពេលខាងមុខ។
ជាមួយគ្នា ក៏គប្បីពង្រឹងយន្តការត្រួតពិនិត្យដំណាក់កាលកំណែទាំងការបែងចែកសន្លឹកកិច្ចការ កាត់ក្បាលសន្លឹកកិច្ចការ និងពេលកំណែត្រូវមានភាពច្បាស់លាស់ ដោយប្រធានក្រុមមុខវិជ្ជាត្រូវណែនាំលម្អិតពីដំណើរការ។ រីឯដំណើការនៃការបូកស្រង់ពិន្ទុ នាយកដ្ឋានជំនាញត្រូវមានកម្រងភារកិច្ច និងបែងចែកនូវលំហូរនៃសកម្មភាពឱ្យបានច្បាស់លាស់។
ឯកឧត្ដមបណ្ឌិតសភាចារ្យ ហង់ជួន ណារ៉ុន បានកោតសរសើរ និងវាយតម្លៃខ្ពស់ដល់ក្រុមការងារទាំងអស់ដែលបានខិតខំក្នុងការបំពេញភារកិច្ចតាមតួនាទី និងឆ្ពោះទៅកាន់ការប្រឡងសញ្ញាបត្រមធ្យមសិក្សាទុតិយភូមិនាពេលខាងមុខប្រកបដោយភាពជោគជ័យ និងក្រោមស្មារតី ”អ្នកចេះ គឺជាប់”។
ជាមួយគ្នានេះ លោកជំទាវឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា ក៏បានលើកទឹកចិត្តប្អូនៗដែលជាបេក្ខជនប្រឡងបាក់ឌុបបន្តខិតខំប្រឹងប្រែងរៀន និងតាមដានព័ត៌មានពីក្រសួងអប់រំឱ្យបានជិតស្និទ្ធ។
គួរជម្រាបជូនថា ចាប់តាំងពីឆ្នាំ២០១៤មក ក្រសួងអប់រំ យុវជន និងកីឡា បានធ្វើកំណែទម្រង់ការប្រឡងសញ្ញាបត្រមធ្យមសិក្សាទុតិយភូមិ ក្រោមពាក្យស្លោក «អ្នកចេះ គឺជាប់»។ ការប្រឡងក្នុងសម័យកំណែទម្រង់ មានវត្តមានភាគីជាច្រើនចូលរួមដោយក្នុងនោះមានអ្នកសង្កេតការណ៍ពីអង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជា។ ការប្រឡងនេះ នៅតែបន្តរឹតបន្តឹង ដោយមិនអនុញ្ញាតឱ្យបេក្ខជនលួចចម្លង យកសំណៅឯកសារ និងគ្រឿងអេឡិចត្រូនិក ចូលទៅកាន់មណ្ឌលប្រឡងឡើយ ហើយសិស្សដែលប្រព្រឹត្តផ្ទុយ អាចទទួលទណ្ឌកម្មខាងវិន័យ តាមកម្រិតសកម្មភាពដែលបានប្រព្រឹត្ត៕
