ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ ៖ ខណៈជំងឺផ្តាសាយបក្សី (H5N1) នៅតែបន្តគំរាមកំហែងដល់សុខភាពសាធារណៈនៅកម្ពុជា ជាពិសេសលើកុមារ និងមនុស្សវ័យជំទង់ ក្រសួងអប់រំ យុវជន និងកីឡា បានចាប់ផ្តើមរៀបចំផលិតសារ និងសម្ភារៈអប់រំសម្រាប់បង្ការជំងឺនេះ ដើម្បីបង្កើនការយល់ដឹង និងជំរុញការអនុវត្តវិធានការការពារនៅក្នុងសាលារៀន និងសហគមន៍។
កិច្ចប្រជុំលើកទី១របស់ក្រុមការងារស្នូលសម្រាប់ផលិតសារ និងសម្ភារៈអប់រំបង្ការជំងឺ H5N1 ត្រូវបានរៀបចំឡើងកាលពីថ្ងៃទី២២ ខែកក្កដា ដោយមានការចូលរួមពីថ្នាក់ដឹកនាំក្រសួងអប់រំ តំណាងក្រសួងសុខាភិបាល ក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន អង្គការ FHI 360 និងដៃគូអភិវឌ្ឍន៍ពាក់ព័ន្ធ។
តាមក្រសួងអប់រំ សម្ភារៈដែលគ្រោងផលិតរួមមាន ផ្ទាំងផ្សព្វផ្សាយ វីដេអូ និងសៀវភៅរឿងអប់រំ ដោយផ្អែកលើវិធីសាស្ត្រចូលរួម និងតម្រូវការរបស់សិស្ស។ គម្រោងនេះក៏មានគោលបំណងឱ្យសិស្សអាចបន្តផ្សព្វផ្សាយចំណេះដឹងស្តីពីការបង្ការជំងឺ H5N1 ទៅកាន់គ្រួសារ និងសហគមន៍របស់ពួកគេ ដើម្បីកាត់បន្ថយហានិភ័យនៃការឆ្លង។
លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា មានប្រសាសន៍ថា កិច្ចប្រជុំនេះនឹងជួយឱ្យក្រុមការងារស្នូលយល់កាន់តែច្បាស់អំពីតួនាទី និងភារកិច្ចរបស់ខ្លួន ចាប់ពីការរៀបចំផែនការ ការអនុវត្ត ការតាមដាន និងការវាយតម្លៃ ដើម្បីសម្រេចបាននូវការផលិតសារ និងសម្ភារៈអប់រំបង្ការជំងឺ H5N1 ប្រកបដោយប្រសិទ្ធភាព។
លោក ប៉ាត់ អ៊ុន នាយករងសាលាបឋមសិក្សាកេសរារាម បានប្រាប់ AMS ថា សាលារបស់លោកក៏បានសហការជាមួយមន្ត្រីជំនាញសុខាភិបាល ចុះអប់រំផ្សព្វផ្សាយដល់សិស្សអំពីវិធីការពារជំងឺផ្តាសាយបក្សីផងដែរ។
កូនសិស្សតូចៗ ជាក្រុមងាយប្រឈមនឹងការឆ្លងជំងឺផ្តាសាយបក្សី H5N1 ដូច្នេះសាលាបានសហការជាមួយមន្ត្រីជំនាញ ចុះអប់រំផ្សព្វផ្សាយឱ្យសិស្សយល់ដឹងពីវិធានការការពារ និងវិធីបង្ការការឆ្លង
លោក ប៉ាត់ អ៊ុន នាយករងសាលាបឋមសិក្សាកេសរារាម
គម្រោងផលិតសារ និងសម្ភារៈអប់រំនេះ នឹងអនុវត្តសាកល្បងនៅសាលាបឋមសិក្សាចំនួន ១០ និងអនុវិទ្យាល័យចំនួន ១០ ក្នុងរាជធានីភ្នំពេញ និងខេត្តកំពង់ចាម ព្រៃវែង សៀមរាប និងស្វាយរៀង មុនពង្រីកទៅកាន់សាលារៀនផ្សេងទៀត។
យោងតាមក្រសួងសុខាភិបាល កម្ពុជាបានរកឃើញអ្នកឆ្លងជំងឺផ្តាសាយបក្សី H5N1 យ៉ាងហោចណាស់ ១០នាក់ ក្នុងឆ្នាំ២០២៥។ ចំណែកករណីចុងក្រោយ ត្រូវបានប្រកាសកាលពីថ្ងៃទី១១ ខែកក្កដា ឆ្នាំ២០២៦ គឺកុមារីអាយុ ៩ខែម្នាក់ រស់នៅរាជធានីភ្នំពេញ។
អាជ្ញាធរសុខាភិបាលបានអំពាវនាវឱ្យប្រជាពលរដ្ឋប្រុងប្រយ័ត្នចំពោះរោគសញ្ញាដូចជា ក្តៅខ្លួន ក្អក ឬពិបាកដកដង្ហើម បន្ទាប់ពីមានប្រវត្តិប៉ះពាល់ជាមួយសត្វបក្សីឈឺ ឬងាប់ក្នុងរយៈពេល ១៤ថ្ងៃ។ ប្រជាពលរដ្ឋត្រូវជៀសវាងការប៉ះពាល់ ឬបរិភោគសត្វបក្សីឈឺ ឬងាប់ ចម្អិនសាច់ និងស៊ុតឱ្យបានឆ្អិនល្អ លាងដៃជាមួយសាប៊ូឱ្យបានញឹកញាប់ និងប្រញាប់ទៅមន្ទីរពេទ្យដែលនៅជិតបំផុត ប្រសិនបើមានអាការៈសង្ស័យឆ្លង៕
