ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសជួបសំណេះសំណាលជាមួយយុវសិស្សឆ្នើមកម្ពុជា ដែលបានឈ្នះពានរង្វាន់វិទ្យាសាស្រ្តអាស៊ាន+៣ នៅប្រទេសកូរ៉េកាលពីពេលថ្មីៗនេះ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានអបអរសាទរ និងលើកទឹកចិត្តដល់យុវជនទាំងអស់ខិតខំធ្វើជាបុគ្គលគំរូ និងជាអ្នកបង្កើតថ្មី (នវានុវត្តន៍ករ) នាពេលអនាគត ដើម្បីអភិវឌ្ឍបច្ចេកវិទ្យា និងដំណោះស្រាយថ្មីៗ ដែលអាចប្រើប្រាស់បាននៅទូទាំងពិភពលោក។
ឯកឧត្តមរដ្ឋមន្រ្តីបានរំលេចថា ការឈ្នះពានរង្វាន់វិទ្យាសាស្រ្តអាស៊ាន+៣ របស់យុវសិស្សកម្ពុជានេះ គឺជាមោទនភាពសម្រាប់ប្រទេស សម្រាប់គ្រួសារ និងប្អូនៗក្នុងនាមជាសិស្ស ហើយក៏បង្ហាញថា ជោគជ័យកើតឡើងដោយការខិតខំប្រឹងប្រែងពិតប្រាកដ មិនថាប្អូនៗរៀននៅសាលារដ្ឋ ឬសាលាឯកជននោះទេ។
បើតាម ឯកឧត្តម ហែម វណ្ណឌី បច្ចុប្បន្នមាតាបិតាកាន់តែច្រើនបានទទួលស្គាល់ពីសារៈសំខាន់នៃការអប់រំជំនាញស្ទែម (STEAM) និងលើកទឹកចិត្តកូនៗឱ្យសិក្សាជំនាញនេះ។ ឯកឧត្តមបន្តថា STEAM ជាកាតាលីករដែលអាចជំរុញកម្ពុជាឱ្យក្លាយជាប្រទេសរីកចម្រើននាពេលអនាគត ជាពិសេសតាមរយៈការអភិវឌ្ឍមូលធនមនុស្ស ដូចជា វិស្វករ និងអ្នកវិទ្យាសាស្ត្រ សម្រាប់ឧស្សាហកម្មផ្សេងៗ។
STEAM គឺជាអក្សរកាត់ដែលតំណាងឱ្យ Science (វិទ្យាសាស្ត្រ) Technology (បច្ចេកវិទ្យា) Engineering (វិស្វកម្ម) Arts (សិល្បៈ) និង Mathematics (គណិតវិទ្យា)។ វារួមបញ្ចូលនៅមុខវិជ្ជាជាច្រើន ដែលជាមូលដ្ឋានគ្រឹះនៃការរីកចម្រើនផ្នែកវិទ្យាសាស្រ្ត និងបច្ចេកវិទ្យាទំនើប។
នាប៉ុន្មានឆ្នាំចុងក្រោយនេះ អ្នកជំនាញក្នុងវិស័យអប់រំ និងស្ថាប័នដឹកនាំការអប់រំជាច្រើនលើសាកលលោកបានចាត់ទុកការសិក្សាមុខវិជ្ជា STEAM អាទិភាពចម្បងមួយសម្រាប់ការបណ្តុះបណ្តាលធនធានមនុស្ស។ ជំរុញការសិក្សា STEAM អាចឱ្យយុវជនត្រៀមខ្លួនឱ្យរួចជាស្រេចសម្រាប់បង្កើតការងារ និងបង្កើនសេដ្ឋកិច្ចសង្គមឱ្យកាន់តែរីកចម្រើន។ ស្របគ្នានេះ បើតាមគោលនយោបាយអភិវឌ្ឍឧស្សាហកម្ម របស់ប្រទេសកម្ពុជា គឺផ្តោតសំខាន់ក្នុងការធ្វើយ៉ាងណាឱ្យសម្រេចក្តីប្រាថ្នាដើម្បីទទួលបានឋានៈជាប្រទេសមានប្រាក់ចំណូលមធ្យម ដូច្នេះប្រទេសកម្ពុជាគ្រោងនឹងបោះជំហានពីប្រទេសពឹងផ្អែកលើវិស័យកាត់ដេរ ទៅជាប្រទេសពឹងផ្អែកលើវិស័យកម្មន្តសាល ដែលចំណេះដឹងផ្នែកវិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យាមានតម្លៃមិនអាចកាត់ថ្លៃបាន៕
