ភ្នំពេញ – គណៈកម្មការស្ម័គ្រចិត្ត នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ (CAMSOC) និងអាស៊ានប៉ារ៉ាហ្គេម លើកទី១២ ឆ្នាំ២០២៣ បានប្រកាសទទួលអ្នកស្ម័គ្រចិត្តជាផ្លូវការ ដើម្បីជាផ្នែកមួយ នៃដំណើរឆ្ពោះទៅព្រឹត្តិការណ៍ជាប្រវត្តិសាស្ត្រនេះ។ បើតាមសេចក្តីប្រកាស កីឡាអាស៊ីអាគ្នេយ៍ លើកទី៣២ មាន​ប្រភេទ​កីឡា​ចំនួន ៣៦ បូកជាមួយ​កីឡាសម្ដែង ១ប្រភេទទៀត ដែល​មាន​តម្រូវការអ្នកស្ម័គ្រចិត្តប្រមាណ ៦,៩៦៣នាក់ ។

ឯកឧត្តម ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ បានដាក់ក្ដីសង្ឃឹមថា កម្ពុជា នឹងបានទទួលនូវការចុះឈ្មោះរបស់អ្នកស្ម័គ្រចិត្តជាច្រើន ដើម្បីចូលរួមបំពេញការងារ ក្នុងកិច្ចការស៊ីហ្គេមរបស់ជាតិ ឱ្យទទួលបានជោគជ័យ។

ឯកឧត្តម ថោង ខុន អនុប្រធានអចិន្ដ្រៃយ៍ នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២

“អ្នកស្ម័គ្រចិត្ត គឺជា DNA របស់ព្រឹត្តិការណ៍កីឡាដ៏ធំ ហើយកន្លងមកយើងក៏បានធ្វើការរៀបចំបែងចែក គឺការចាត់តាំង ការប្រើប្រាស់ របស់គណៈកម្មការស្ម័គ្រចិត្តនេះ ទៅតាមគ្រប់ផ្នែកអស់ហើយ ក្នុងនោះក៏មាននៅក្នុងគណៈកម្មការជំនាញផងដែរ ដោយខាងមុខនេះ គណៈកម្មការជំនាញ នឹងទទួលយកអ្នកស្ម័គ្រចិត្តទាំងឡាយ ដើម្បីទៅចូលរួមការងារជាមួយគណៈកម្មការជំនាញ ពិសេសក្នុងការរៀបចំការប្រកួតគ្រប់ប្រភេទកីឡាទាំងអស់ និងការងារជំនាញ ដែលមានការពាក់ព័ន្ធ”

សូម​បញ្ជាក់ថា អ្នកស្ម័គ្រចិត្តសម្រាប់ព្រឹត្តិការណ៍​ស៊ីហ្គេម​លើកទី៣២ ត្រូវបានបែងចែកជា ៣កម្រិត រួមមាន ថ្នាក់ដឹកនាំ ជនបង្គោល និងអ្នកស្ម័គ្រចិត្តទូទៅ ព្រមទាំងផ្ដល់៥០កន្លែងដល់អ្នកស្ម័គ្រចិត្តជាជនជាតិបរទេស។ លើសពីនេះ ក៏ត្រូវការអ្នកស្ម័គ្រចិត្ត នៅខេត្តសៀមរាប ចំនួន ១០០នាក់ ខេត្តព្រះសីហនុ ចំនួន ១០០នាក់ ខេត្តកែប ៥០នាក់ និងខេត្តកំពត ៥០នាក់។

អ្នកដែល​ចង់ចូលរួមជាអ្នក​ស្ម័គ្រចិត្តត្រូវមានលក្ខណៈសម្បត្តិដូចជា មានអាយុចាប់ពី ១៨ឆ្នាំឡើងទៅ គិតត្រឹមថ្ងៃទី០១ ខែមករា ឆ្នាំ២០២៣ មានពេលវេលាគ្រប់គ្រាន់ មានសុខភាពល្អដើម្បីបំពេញការងារ មានឆន្ទៈនិងទំនួលខុសត្រូវខ្ពស់ក្នុងការងារ មានអាកប្បកិរិយាស្លូតបូត សុភាពរាបសា និងលើកទឹកចិត្តចំពោះជនមានពិការភាព គ្រូបង្វឹកកីឡា អតីតកីឡាករ កីឡាការិនី។ សម្រាប់អ្នកស្ម័គ្រជាអ្នកសម្របសម្រួល LO ត្រូវចេះភាសាអង់គ្លេស។

អ្នកស្ម័គ្រចិត្តត្រូវមានឯកសារភ្ជាប់ជាមួយដូចជា រូបថត (ទំហំ ៤គុណ៦) អត្តសញ្ញាណប័ណ្ណ ឬលិខិតឆ្លងដែន និងជីវប្រវត្តិសង្ខេប។ ឆ្លងកាត់ការចុះឈ្មោះតាមអនឡាញ និងត្រូវឆ្លងកាត់កិច្ចសម្ភាសន៍ ព្រមទាំងចូលរួមវគ្គបណ្ដុះបណ្ដាលភារកិច្ចដែលអ្នកស្ម័គ្រចិត្តនឹងធ្វើពេលព្រឹត្តិការណ៍។

សម្រាប់​ការ​ចុះឈ្មោះចាប់ពីថ្ងៃទី០១ ខែកុម្ភៈ ដល់ថ្ងៃទី០១ ខែមីនា ឆ្នាំ២០២៣ តាមរយៈ https://cambodia2023.com/km/volunteer-register។ ការបំពេញពាក្យស្នើសុំត្រូវបានកំណត់ជា ៣ដំណាក់កាល ហើយបេក្ខភាពដែលបំពេញពាក្យស្នើសុំបានជោគជ័យ នឹងទទួលបានសារបញ្ជាក់នៅលើ Telegram ឬនៅលើ E-mail៕