ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីប្រគល់សញ្ញាបត្រដល់គរុនិស្សិត នៅវិទ្យាស្ថានគរុកោសល្យរាជធានីភ្នំពេញ នាព្រឹកថ្ងៃទី០៤ កក្កដា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា លើកឡើងថា ឆ្អឹងខ្នងនៃវិស័យអប់រំ គឺជាគ្រូបង្រៀន ដូច្នេះគុណភាពគ្រូ គឺជាកត្តាគន្លឹះដើម្បីធានានូវការអប់រំ និងសមត្ថភាពរបស់ប្រទេសនៅក្នុងការអភិវឌ្ឍ។
តាមប្រសាសន៍របស់សម្តេចធិបតី គុណភាពមនុស្ស គឺជាកត្តាកំណត់ នៃសមត្ថភាពប្រទេសអភិវឌ្ឍ ដោយមានន័យថា ទាល់តែមនុស្សខ្លាំង ទើបកម្ពុជាអាចអភិវឌ្ឍខ្លាំង ដូច្នេះការបណ្តុះបណ្តាលអប់រំ គឺជារឿងសំខាន់ ហើយប្រសិនបើគ្រូមិនពូកែ មិនចំណាប់ នោះសិស្សចេញទៅក៏មិនចំណាប់ ធនធានមនុស្ស ក៏មិនសូវចំណាប់ដូចគ្នា ។ សម្តេចធិបតីបន្តថា ដូច្នេះហើយបានជារាជរដ្ឋាភិបាលយកចិត្តទុកដាក់ទៅលើការពង្រឹងគុណភាពគ្រូ ដែលជាមូលដ្ឋាន នៃការកែទម្រង់វិស័យអប់រំ។
” បើប្រជាជនយើងអត់ចេះកុំព្យូទ័រ អត់ចេះភាសាអង់គ្លេស តើយកកុំព្យូទ័រមកប្រើយ៉ាងម៉េចកើត? នៅតែសរសេរដៃដដែល តើយើងទាន់គេទេ? តើអ្វីទៅជាកត្តាកំណត់នូវគុណភាពធនធានមនុស្ស? គឺការអប់រំបណ្តុះបណ្តាលនេះឯង…”
សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា
យ៉ាងណាក៏ដោយ សម្តេចធិបតីនាយករដ្ឋមន្រ្តី បានលើកទឹកចិត្តដល់គរុនិស្សិត ដែលជាអនាគតគ្រូបង្រៀន ត្រូវបន្តអភិវឌ្ឍចំណេះដឹង និងវិជ្ជាជីវៈប្រចាំ តាមរយៈការសិក្សាស្រាវជ្រាវ ស្វែងយល់បន្ថែមនូវជំនាញ ព្រមទាំងបច្ចេកទេសគរុកោសល្យថ្មីៗ ដើម្បីក្លាយខ្លួនជាអ្នកអប់រំដ៏មានគុណភាពខ្ពស់សម្រាប់កម្ពុជា ស្របតាមបរិបទ នៃការរីកចម្រើនរបស់សង្គម។
គួរបញ្ជាក់ថា រាជរដ្ឋាភិបាល តាមរយៈ ក្រសួងអប់រំ យុវជន និង កីឡា បានដាក់ចេញវិធានការកែទម្រង់ស៊ីជម្រៅប្រកបដោយភាពបុរសកម្ម ច្នៃប្រឌិត និងត្រៀមលក្ខណៈយូរអង្វែង សំដៅជំរុញការធានាបានមូលធនមនុស្សប្រកបដោយគុណភាពខ្ពស់ ដើម្បីរួមចំណែកដល់ការកសាងសង្គមកម្ពុជា ដែលមានប្រជាជនប្រកបដោយចំណេះដឹង ទេពកោសល្យ សមត្ថភាពខ្ពស់ និងមានវប្បធម៌ជ្រៅជ្រះ ព្រមទាំងមានផលិតភាពការងារខ្ពស់ សម្រាប់ចូលរួមលើកកម្ពស់ភាពប្រកួតប្រជែងរបស់កម្ពុជា៕
