ការសិក្សាពេញមួយជីវិត ឬជាភាសាអង់គ្លេស Lifelong Learning ជារបស់ នៃការអប់រំថ្មីមួយដែលជួយឱ្យមនុស្សអភិវឌ្ឍន៍សមត្ថភាពផ្ទាល់ខ្លួនជាប្រចាំ ។ អ្នកមានបំណងជ្រើសរើសការសិក្សាមួយជីវិតអាចមានឧបសគ្គរារាំងមួយចំនួនដូចជា ពេលវេលា សុខភាព វ័យ ភាពខ្មាស់អៀន គ្រួសារ និងកិច្ចការស្នូលមួយចំនួនដែលជាការទទួលខុសត្រូវរបស់ខ្លួន ។ ដើម្បីត្រៀមខ្លួនក្លាយជាអ្នកទទួលយកការសិក្សាពេញមួយជីវិត មានយុទ្ធសាស្ត្រចំនួន៥ ដែលអ្នកសិក្សាអាចរៀបចំឱ្យស្របតាមកាលវិភាគជីវិតរបស់ខ្លួន ។ នេះបើតាមការស្រាវជ្រាវរបស់ក្រុមអ្នកអភិវឌ្ឍន៍កម្មវិធីអប់រំរបស់ yoh.com ដែលផ្តល់សេវាប្រឹក្សាយោបល់ការងារលក្ខណៈអន្តរជាតិ ។ 

១. កំណត់គោលដៅច្បាស់លាស់ ៖ ប្រសិនបើមនុស្សមានគោលដៅទៅថ្ងៃអនាគតច្បាស់លាស់ គោលដៅនោះនឹងសម្រេចដូចបំណងប្រាថ្នាជាពុំខាន ។ ជាក់ស្តែងការជ្រើសរើសយកវិធីសាស្ត្រសិក្សាពេញមួយជីវិតក៏ដូច្នេះដែរ ប្រសិនបើមនុស្សព្រមបើកចិត្តទទួលយកការអប់រំថ្មីៗជារៀងរាល់ថ្ងៃ និងមិនបោះបង់ក្តីស្រមៃរបស់ខ្លួន នោះគេនឹងសម្រេចបំណងប្រាថ្នា​ ឬគោលដៅដែលខ្លួនចង់បានដោយងាយបំផុត ។

ទោះរូបភាពសិក្សាក្នុងប្រព័ន្ធ ឬក្រៅប្រព័ន្ធក៏ដោយ ក៏ការសិក្សាពេញមួយជីវិតនៅតែអាចជួយឱ្យមនុស្សទទួលបានគុណភាពជីវិតស្តង់ដារ និងរីកចម្រើនស្របតាមការវិវត្តន៍របស់សង្គម ។ សូមអ្នកបង្កើតគោលដៅដោយភាពឆ្លាតវៃ ច្បាស់លាស់ ជាក់លាក់ អាចវាស់វែងបាន និងអាចបត់បែនគ្រប់កាលៈទេសៈក្នុងដំណើរជីវិត ។

២.ពង្រឹកវិសាលភាពការសិក្សា ៖ ការសិក្សាដោយផ្ទាល់នៅក្នុងថ្នាក់ ឬតាមសិក្ខាសាលានានាជាចលករដ៏សំខាន់ទ្រទ្រង់ដល់គុណភាពសិក្សាពេញមួយជីវិត ។ ប៉ុន្តែបច្ចុប្បន្នដំណើរការសិក្សាពេញមួយជីវិត មិនមែនមានតែនៅក្នុងថ្នាក់រៀនទៀតនោះទេ ។ អ្នកជ្រើសរើសយកការសិក្សាពេញមួយជីវិតអាចពង្រីកវិសាលភាពការសិក្សារបស់ខ្លួនតាមរយៈការប្រើប្រាស់បច្ចេកវិទ្យាថ្មីៗ ហើយអាចជ្រើសរើសពេលវេលាសមស្របណាមួយសម្រាប់ខ្លួនឯង ។ ការពង្រីកវិសាលភាពការសិក្សាជួយឱ្យគុណភាពសិក្សាកាន់តែប្រសើរ និងមានលក្ខណៈគ្រប់ជ្រុងជ្រោយ ។

៣. អភិវឌ្ឍន៍ផ្នត់គំនិតសិក្សា ៖ កែច្នៃគំនិត ឬច្នៃប្រតិដ្ឋរបៀបសិក្សាឱ្យស្របតាមស្ថានភាពរបស់ខ្លួន ជួយឱ្យមនុស្សមានឱកាសសិក្សាកាន់តែទូលំទូលាយ ។ លើសពីនេះ ការសិក្សាមេរៀនលំបាកៗណាមួយលែងជាឧបសគ្គទៀតហើយសម្រាប់អ្នកទទួលយកការអប់រំពេញមួយជីវិត ។ ចំណុចនេះ អ្នកសិក្សាត្រូវចេះកែច្នៃពេលវេលា និងកាលវិភាគសិក្សារបស់ខ្លួនដោយប្រើប្រាស់វិធីសាស្ត្រជំនួយ ដូចជា បង្កើតទម្កាប់អាន ទស្សនា ស្តាប់ ពិភាក្សា និងជជែកដេញដោលជាដើម ។ ការអភិវឌ្ឍន៍ផ្នត់គំនិតសិក្សាបានល្អ លទ្ធផលដែលទទួលបានពីការអបរំពេញមួយជីវិត ក៏កាន់តែបង្កើតផ្លែផ្កាជាហូរហែផងដែរ ។

៤. ការឆ្លុះបញ្ចាំង ៖ វិធីសាស្ត្រមួយក្នុងចំណោមវិធីសាស្ត្រពង្រឹងសមត្ថភាពផ្ទាល់ខ្លួន គឺរៀនឆ្លុះបញ្ចាំងសកម្មភាពដែលខ្លួនបានប្រព្រឹត្តកន្លងទៅ ។ ការឆ្លុះបញ្ចាំងនេះ ជួយឱ្យអ្នកសិក្សាអាចស្គាល់ខ្លួនឯង ស្គាស់ពីល្បឿននៃការសិក្សា ស្គាល់ពីប្រសិទ្ធភាពនៃការសិក្សា និងបានដឹងលទ្ធផលមកពីការសិក្សា ។ ជាទូទៅមនុស្សម្នាក់ៗអាចជួបការលំបាកបន្តិចនៅក្នុងដំណាក់កាលឆ្លុះបញ្ចាំងខ្លួនឯងនេះ តែវាជាចំណុចសំខាន់ដែលអ្នកសិក្សាត្រូវធ្វើដើម្បីរកគន្លឹះកែលម្អគុណភាពសិក្សារបស់ខ្លួន ។ ការរំលឹកខ្លួនឯងឱ្យទទួលយកការអប់រំស្របតាមលទ្ធភាពផ្ទាល់ខ្លួន ខុសប្លែងពីការរំលឹកខ្លួនឯងដោយឱ្យអ្នកដទៃជាអ្នកដាសតឿនជំនួស ។ ទន្ទឹមគ្នានេះ សូមកុំភ្លេចបង្កើតកំណត់ហេតុសិក្សាផ្ទាល់ខ្លួនផង ។

៥. ចែករំលែកអ្វីដែលអ្នកបានរៀន ៖ ពាក្យថាខុសនិងត្រូវវាគ្រាន់តែជាបញ្ញត្តិសម្គាល់លើសកម្មភាពតែប៉ុណ្ណោះ ប៉ុន្តែបង្កើតកំហុសដោយចេតនាទើបជាកំហុសពិតប្រាកដ ។ សម្រាប់ទទួលយកការសិក្សាពេញមួយជីវិតតែងចូលរួមកែល្អ ចែករំលែក ដោះស្រាយបញ្ហា និងទទួលយកការកែលម្អជានិច្ច ។ អ្នករៀនអ្វីដែលថ្មី អាចចែករំលែកចំណេះដឹងថ្មីនោះដល់អ្នកដទៃ ក្រុមការងារ ឬសហការី នោះគំនិតច្នៃប្រតិដ្ឋថ្មីៗនឹងកើតឡើងជាបន្តបន្ទាប់ ។ សូមកុំភ្លេចថា គំនិតច្នៃប្រឌិតរបស់មនុស្សគឺកើតចេញពីគំនិតច្នៃប្រតិដ្ឋរបស់អ្នកដទៃ ហើយការចែករំលែកចំណេះដឹងទៅអ្នកដទៃ ជារបៀបរៀនថ្មីមួយសម្រាប់របត់នៃការអប់រំសត្សវត្សទី២១ ៕