ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្មវិធីផ្ដល់អាហារតាមសាលារៀន ជាកម្មវិធីមួយដែលក្រសួង អប់រំ យុវជន និងកីឡា បានរៀបចំឡើងដើម្បីគាំទ្រដល់សិស្សានុសិស្សដែលរស់នៅក្នុងតំបន់ជួបការលំបាកអាចមានឱកាសបន្តការសិក្សា និងអាចចូលរៀនដូចសិស្សានុសិស្សដទៃទៀតដែរ។ នេះបើតាមការលើកឡើងរបស់ លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា។
លោកជំទាវ ឃួន វិច្ឆិកា មានប្រសាសន៍ថា ការផ្ដល់អាហារតាមសាលារៀននេះ ក៏អាចធ្វើឱ្យប្អូនៗសិស្សានុសិស្សមានសុខភាពល្អ អាចលូតលាស់ធំធាត់ស្របតាមស្ដង់ដា និងមានសតិបញ្ញាត្រឹមត្រូវដែលអាចចូលរៀននៅក្នុងកម្រិតបឋមសិក្សា និងបន្តការសិក្សាទៅអនាគតបានដោយជោគជ័យ ដោយសារពួកគាត់នឹងអាចជៀសផុតពីជំងឺក្រិន និងជំងឺខ្វះអាហារូបត្ថម្ភជាដើម។
អ្នកនាំពាក្យក្រសួងអប់រំ បញ្ជាក់ថា ការផ្ដល់អាហារតាមសាលារៀនក្រៅពីជំរុញការចូលរៀន ការបន្តការសិក្សា និងលើកកម្ពស់សុខភាពសិស្ស ក៏ជាចំណុចមួយដើម្បីគាំទ្រសហគមន៍ផលិតផលិតផលកសិកម្ម ដែលមានដូចជា អង្ករ សាច់ ត្រី ស៊ុត ទឹកដោះសត្វ បន្លែ ផ្លែឈើ គ្រាប់ធញ្ញជាតិ ចំណីអាហារដែលបញ្ចូលមីក្រូសារជាតិជាដើម ព្រមទាំងជួយដល់ជីវភាពរស់នៅសហគមន៍ប្រចាំថ្ងៃផងដែរ។ លោកជំទាវបន្តថា ក្រសួងអប់រំ កំពុងតែអនុវត្តកម្មវិធីផ្ដល់អាហារតាមសាលារៀន ដោយប្រើកសិផលរបស់សហគមន៍ដើម្បីគាំទ្រការងារនេះ។ ទន្ទឹមគ្នា នៅក្នុងអាទិភាពរបស់រាជរដ្ឋាភិបាល គឺជំរុញឱ្យមានកិច្ចសហប្រតិបត្តិការល្អជាមួយសហគមន៍ និងដៃគូនានាដើម្បីជំរុញវិស័យអប់រំ ។
លោកជំទាវ ឃួន វិច្ឆិកា បន្ថែមថា មកដល់ពេលបច្ចុប្បន្ននេះ កម្មវិធីផ្ដល់អាហារតាមសាលារៀន កំពុងតែអនុវត្តនៅតាមសាលាបឋមសិក្សាក្នុងខេត្តគោលដៅចំនួន១០ ដោយក្នុងនោះ រួមមាន ខេត្តបន្ទាយមានជ័យ បាត់ដំបង ពោធិ៍សាត់ កំពង់ចាម កំពង់ឆ្នាំង កំពង់ធំ សៀមរាប ព្រះវិហារ ឧត្តរមានជ័យ និងស្ទឹងត្រែង ដោយគ្របដណ្ដប់លើសាលារៀនគោលដៅចំនួន ១១១៤សាលា។ ក្នុងនោះ សាសារៀន ចំនួន ៥៥៣កន្លែង បានប្រើប្រាស់ថវិការបស់រាជរដ្ឋាភិបាល ក្រៅពីនោះសាលារៀនចំនួន ៥៦១ទៀត ប្រើប្រាស់ថវិកាអង្គការស្បៀងអាហារពិភពលោក។
បើតាមអ្នកនាំពាក្យក្រសួងអប់រំ កម្មវិធីផ្ដល់អាហារតាមសាលារៀន ដំណើរការទៅបានជោគជ័យដោយសារមានការចូលរួមពីតួអង្គសំខាន់ រួមមាន ទី១. ក្រសួងអប់រំ យុវជន និងកីឡា ទី២. សាលារៀន សហគមន៍ និងមាតាបិតាសិស្ស ទី៣. ដៃគូអភិវឌ្ឍ ក្នុងនោះអង្គការស្បៀងអាហារពិភពលោក បានគាំទ្រជាថវិកា និងស្មារតី ដើម្បីអនុវត្តកម្មវិធីនេះឱ្យបានជោគជ័យ។
គួរជម្រាបជូនថា កម្មវិធីផ្ដល់អាហារតាមសាលារៀន ជាផ្នែកមួយនៃការលើកកម្ពស់គុណភាពអប់រំ ដោយប្រើប្រាស់កសិផលក្នុងសហគមន៍ មានគោលបំណងលើកកម្ពស់អាហារូបត្ថម្ភ និងការសិក្សារបស់កុមារក្នុងតំបន់មានភាពក្រីក្រ និងភាពងាយរងគ្រោះខ្ពស់ ដោយចូលរួមចំណែកបង្កើនការចុះឈ្មោះចូលរៀន, និងកាត់បន្ថយអត្រាបោះបង់ការសិក្សានៅកម្រិតបឋមសិក្សា ព្រមទាំងចូលរួមលើកកម្ពស់សេដ្ឋកិច្ចសហគមន៍ផងដែរ៕
