ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គ្រូបង្រៀនចំនួន១០០នាក់មកពីគ្រឹះស្ថានបណ្តុះបណ្តាលគ្រូចំនួន៧ និងសាលាគោលដៅចំនួន៣៣ ដែលអនុវត្តកម្មវិធីបំណិនជីវិតតាមមូលដ្ឋាន កាលពីពេលថ្មីៗនេះ ត្រូវបានបណ្ដុះបណ្ដាលបច្ចេកទេសស្ដីពី ការអប់រំបង្កើតហ្គេម ដែលរៀបចំដោយនាយកដ្ឋានបរិវត្តកម្មឌីជីថល ក្រសួងអប់រំ យុវជន និងកីឡា ក្រោមការគាំទ្រថវិកា ដោយអង្គការយូនីសេហ្វ (UNICEF)។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ការអប់រំបង្កើតហ្គេមនេះ ត្រូវធ្វើឡើងសម្រាប់គ្រូដឹកនាំនៅតាមសាលារៀនអនុវត្តកម្មវិធីបំណិនជីវិតតាមមូលដ្ឋាន (Game Changers Coalition) ដើម្បីជំរុញការអប់រំឌីជីថល និងបំណិនសតវត្សរ៍ទី២១។
លោកជំទាវ ឃួន វិច្ឆិកា បញ្ជាក់ថា កម្មវិធី Game Changers Coalition គឺជាកម្មវិធីដែលសិក្សាតាមបែបការអប់រំថ្មីនៃសតវត្សទី២១ គឺការរៀនបែបគម្រោង និងការដោះស្រាយបញ្ហា ធ្វើឱ្យសិស្សមានភាពម្ចាស់ការក្នុងការបង្កើតគំនិត និងការយល់ដឹងខ្លួនឯង តាមរយៈការដោះស្រាយបញ្ហានៅក្នុងសហគមន៏ មើលឃើញបញ្ហាក្នុងសហគមន៍ បង្កើតក្រុមស្រាវជ្រាវ និងដំណោះស្រាយបញ្ហាដោយយកបច្ចេកវិទ្យានៃការបង្កើតហ្គេមធ្វើជាដំណោះស្រាយ។
បើតាមអ្នកនាំពាក្យ គ្រូបង្គោលទាំង១០០នាក់ ត្រូវបានបណ្តុះបណ្តាលឱ្យចេះពី គោលបំណងនៃការបង្កើតហ្គេម, សិល្បៈក្នុងហ្គេម, ការណែនាំអំពីកម្មវិធីបង្កើតហ្គេម និងការណែនាំអំពីមូលដ្ឋានគ្រឹះនៃការសរសេរកូដជាដើម។ ក្នុងនោះ គ្រូដឹកនាំត្រូវធ្វើការជាក្រុម ដើម្បីបង្កើតហ្គេមមួយក្នុងមួយក្រុម ធ្វើការបង្ហាញ និងប្រកួតប្រជែងជាមួយក្រុមផ្សេងៗទៀត តាមរយៈប្រធានបទផ្សេងៗគ្នា។
គួរជម្រាបជូនថា កម្មវិធី Game Changers Coalition គឺជាកម្មវិធីសាកលមួយដែលផ្ដួចផ្ដើមឡើងដោយអង្គការយូនីសេហ្វដែលមានការិយាល័យនៅប្រទេសស៊ុយអែត បាននឹងកំពុងអនុវត្តនៅតាមប្រទេសចំនួន៦ ដើម្បីដាក់ឱ្យអនុវត្តសាកល្បងកម្មវិធីអប់រំបង្កើតហ្គេមសម្រាប់លើកកម្ពស់កុមារី និងក្មេងស្រីក្នុងសម័យបច្ចេកវិទ្យា ជាពិសេសក្នុងបរិវត្តកម្មឌីជីថលនៃការអប់រំសតវត្សទី២១។ ក្នុងនោះ កម្ពុជាបានអនុវត្តកម្មវិធី Game Changers Coalition នេះ កាលពីឆ្នាំ២០២៣ ដោយអនុវត្តសាកល្បងនៅសាលាចំនួន៤ ក្នុងខេត្តសៀមរាប។
កម្មវិធីនេះនឹងផ្ដល់ផលជះបន្តដល់សិស្សានុសិស្ស តាមរយៈក្លឹបឌីជីថលក្រៅម៉ោងសិក្សា កម្មវិធីសិក្សាផ្អែកលើគម្រោង ដោយផ្ដល់ឱ្យសិស្សនូវបំណិនក្នុងការបង្កើតថ្មី ការត្រិះរិះពិចារណា ការស្វែងរកឬសគល់នៃបញ្ហា និងដំណោះស្រាយ ការសិក្សាបែបសកម្ម ជំនាញក្នុងសង្គម ការអភិវឌ្ឍភាពច្នៃប្រឌិត ដែលជាផ្នែកមួយជាតម្រូវការចាំបាច់សម្រាប់មុខវិជ្ជាបំណិនជីវិតតាមមូលដ្ឋាន ពិសេសបានលើកកម្ពស់ចំណាប់អារម្មណ៍យុវតីលើវិស័យបច្ចេកវិទ្យា និងសហគ្រិនភាព លុបបំបាត់គម្លាតយេនឌ័រ។
ក្រៅពីផ្ដល់ភាពរីករាយ និងបង្កើនការចូលរួមពីសិស្សាសិស្ស ការអប់រំស្ដីពីការបង្កើតហ្គេមអាចបង្កើតសកម្មភាពសិក្សាថ្មីៗ ដែលនាំយកបច្ចេកវិទ្យាមកកាន់ថ្នាក់រៀន បង្កើតទំនាក់ទំនងយ៉ាងជិតស្និតរវាងគ្រូ និងសិស្ស។ សិស្សានុសិស្សមិនត្រឹមតែជាអ្នកប្រើប្រាស់បច្ចេកវិទ្យា ឬរង់ចាំតែទទួលយកចំណេះដឹងពីគ្រូប៉ុណ្ណោះទេ ប៉ុន្តែជាពួកគេបានអភិវឌ្ឍខ្លួនក្លាយជាបង្កើតថ្មីប្រកបដោយភាពច្នៃប្រឌិត សិក្សាស្រាវជ្រាវដោយខ្លួនឯងតាមរយៈការរៀនសរសេរកូដ ការរចនា និងសហការបង្កើតគម្រោងថ្មី៕
