សម្រាប់ឆ្នាំសិក្សា២០២៣-២០២៤ គ្រឹះស្ថានបឋមសិក្សាសាធារណៈទាំងអស់ នឹង​តម្រូវ​ឱ្យ​អនុវត្ត​ក្របខណ្ឌស្តង់ដាសាលារៀនគំរូ ដោយចាប់ផ្តើមដំណើរការពីថ្ងៃទី០១ ខែធ្នូ ឆ្នាំ២០២៣ ដល់ថ្ងៃទី៣០ កញ្ញា ឆ្នាំ២០២៤។

លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា គ្រឹះស្ថានបឋមសិក្សាសាធារណៈទាំងអស់ទូទាំងប្រទេសដែលមានចំនួនប្រមាណជា ៨០៦៧សាលា នឹងចាប់ផ្ដើមអនុវត្តស្តង់ដាសាលារៀនគំរូ នៅដើមខែធ្នូនេះ ហើយការដាក់ឱ្យអនុវត្តនូវស្តង់ដា សាលារៀនគំរូ គឺក្នុងគោលដៅលើកកម្ពស់គុណភាពអប់រំ និងដើម្បីជំរុញឱ្យសាលារៀនទូទាំងប្រទេសនៅថ្ងៃអនាគតក្លាយទៅជាសាលារៀនគំរូ។

អ្នកនាំពាក្យក្រសួងអប់រំ បញ្ជាក់ថា សាលារៀនគំរូនេះ នឹងដាក់ឱ្យអនុវត្តនូវស្តង់ដាចំនួន៥​ រួមមាន ទី១. ការលើកកម្ពស់អភិបាលកិច្ចសាលារៀន គឺជំរុញឱ្យនាយកសាលា គណៈគ្រប់គ្រងសាលា អាចគ្រប់គ្រងធនធានមនុស្ស ធនធានសាលារៀនបានល្អ ដើម្បីជំរុញឱ្យការអប់រំមានគុណភាព, ទី២. ការពិនិត្យកែសម្រួលនិងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្សដែលស្របទៅនឹងការអប់រំសតវត្សទី២១, ទី៣. ការយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលា និង ទី៤. ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ ក្នុងការអប់រំស្របតាមពាក្យស្លោកភាពជាដៃគូរដ្ឋ និងសហគមន៍ដើម្បីការអប់រំ។

“យើងសង្ឃឹមថា នៅក្នុងថ្ងៃអនាគតខាងមុខនេះ សាលារៀននៅកម្ពុជានឹងប្រែក្លាយបន្តិចម្ដងៗ ក្លាយទៅជាសាលារៀនគំរូ ហើយគុណភាពអប់រំនៅកម្ពុជាមានគុណភាពកាន់តែប្រសើរឡើងថែមទៀត” ។

លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា

លោកជំទាវបណ្ឌិត ឃួន វិច្ឆិកា បញ្ជាក់បន្ថែមថា ដើម្បីឱ្យការអនុវត្តស្ដង់ដាសាលារៀនគំរូនេះអាចទទួលបានជោគជ័យ គឺទាមទារឱ្យមានការចូលរួមយ៉ាងជិតស្និទរវាងក្រសួងអប់រំ យុវជន និងកីឡា, មន្ទីរអប់រំ យុវជន និងកីឡា ក៏ដូចជាសាលារៀន និងគណៈគ្រប់គ្រងសាលា, សិស្សានុសិស្ស, មាតាបិតាសិស្ស, សហគមន៍ទាំងអស់ក្នុងការចូលរួមទាំងអស់គ្នាដើម្បីលើកកម្ពស់គុណភាពអប់រំឱ្យកាន់តែប្រសើរឡើង។

គួរជម្រាបជូនថា ក្នុងឆ្នាំសិក្សា២០២៣-២០២៤នេះ ដំណើរការរបស់គ្រឹះស្ថានបឋមសិក្សាសាធារណៈ ផ្តោតលើការអនុវត្ត “ស្តង់ដាសាលារៀនគំរូ” និង “ពានរង្វាន់សាលាគំរូ សម្តេចមហាបវរធិបតី និងការចូលរួមអនុវត្ត” យុទ្ធនាការសាលារៀនស្អាតគ្មានសំរាមៗដើម្បីលើកកម្ពស់គុណភាពអប់រំ៕