ទិវាស្វែងយល់ពីខ្លួនឯងឆ្នាំ២០២៥ បានប្រារព្ធឡើងកាលពីចុងសប្តាហ៍​កន្លងទៅនេះ ក្រោមមូលបទ «សក្តានុពលមនុស្ស និងក្តីបារម្ភក្នុងយុគ្គសម័យបញ្ញាសិប្បនិម្មិត និងសង្គមដែលខ្វះការភ្ជាប់ទំនាក់ទំនង» ដោយ​ផ្ដោតសំខាន់លើ ការលើកកម្ពស់សុខភាពផ្លូវចិត្ត ការគ្រប់គ្រងអារម្មណ៍ ការស្ដាប់សកម្ម ការពង្រឹងជំនាញទន់ និងផ្នត់គំនិតវិជ្ជមាន ដែលជាជំនាញមិនអាចជំនួស ដោយបច្ចេកវិទ្យា AI។

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដែលចូលរួមជាអធិបតី​ក្នុង​កម្មវីធីនេះ មានប្រសាសន៍ថា នៅក្នុងយុគសម័យ AI ដែលបច្ចេកវិទ្យាមានការវិត្តន៍យ៉ាងឆាប់រហ័ស យើងទាំងអស់គ្នា ត្រូវឱ្យតម្លៃខ្ពស់ លើភាពឆ្លាតវៃពិតប្រាកដរបស់មនុស្ស, ក្នុងនោះរួមមាន សមត្ថភាពទំនាក់ទំនង ការយល់ចិត្តអ្នកដទៃ និងការកសាងទំនុកចិត្ត ដែលនេះជាធាតុសំខាន់សម្រាប់ភាពជោគជ័យរយៈពេលវែង។

សមត្ថភាពប្រាស្រ័យទាក់ទង ការយល់ចិត្តអ្នកដទៃ និងការកសាងទំនុកចិត្ត គឺជាជំនាញសំខាន់ សម្រាប់ភាពជោគជ័យរយៈពេលវែងក្នុងអាជីព និងភាពជាអ្នកដឹកនាំ។

ឯកឧត្តមរដ្ឋមន្ត្រី បានសង្កត់ធ្ងន់ថា ការបង្កើតឱ្យមានបរិយាកាស ដែលគាំទ្រ និងស្ដាប់ពីបញ្ហាគ្នាទៅវិញទៅមក ពិតជាមានសារៈសំខាន់សម្រាប់យុវជន ព្រោះនេះ ជាកន្លែង​ដែលយុវជនរៀន និយាយ ស្ដាប់ ឆ្លើយតប ដោយការយល់ចិត្ត។

លោក ព្រីម ភ្លឿន នាយកប្រតិបត្តិនៃអង្គការសិល្បៈខ្មែរអមតៈ ជាអ្នកចូលរួមម្នាក់ក្នុងកម្មវិធីនេះ យល់ឃើញថា ការរៀបចំកម្មវិធីនេះឡើង គឺពិតជាល្អ និងមានសារៈសំខាន់ សម្រាប់ការពង្រឹងជំនាញប្រាស្រ័យទាក់ទង និងការដោះស្រាយបញ្ហាផ្លូវចិត្ត ដែលកើតឡើងដោយសារការងារ និងជីវភាពរស់នៅប្រចាំថ្ងៃ។

លោក ភ្លឿន មានប្រសាសន៍ថា បច្ចុប្បន្ន ជំនាញប្រាស្រ័យទាក់ទង និងភាពក្លាហាន ហ៊ាននិយាយពីបញ្ហាផ្ទាល់ខ្លួន និងការងារចេញមកក្រៅ ក្នុងបរិយាយកាសមួយ មានសុវត្ថិភាព ពិតជាសំខាន់ ព្រោះក្នុងសម័យបច្ចេកវិទ្យា ការប្រាស្រ័យទាក់ទងរវាងមនុស្ស និងមនុស្សកាន់តែថមថយ។

យុវតី សំណាង ម៉ានិច ដែលជាយុវជន ទើបតែបញ្ចប់ការសិក្សាជំនាញសហគ្រិនភាព និងនវានុវត្តអន្តរជាតិ បានបង្ហាញការយល់ឃើញថា នេះគឺជាកម្មវិធីមួយដ៏ពិសេស ព្រោះបានផ្ដល់ឱកាសឱ្យកញ្ញា បានភ្ជាប់ទំនាក់ទំនងជាមួយយុវជន មកពីបណ្ដាប្រទេសផ្សេងៗ។

គួរជម្រាបជូនថា កម្មវិធី Rise Cambodia: ASEAN Youth Coverage For the Self-Awareness Festival 2025 បានប្រារព្ធឡើងកាលពីថ្ងៃសៅរ៍ រៀបចំដោយ Growthbean សិង្ហបុរី, HRINC Cambodia, សាកលវិទ្យាល័យជាតិគ្រប់គ្រង និង TUI Blue Angkor Grace នៅក្នុងសាកលវិទ្យាល័យជាតិគ្រប់គ្រង ដោយមានការចូលរួមពីតំណាងយុវជន ៩០រូប មកពីប្រទេសជុំវិញតំបន់អាស៊ាន និងមានការគាំទ្រពី ក្រុមប្រឹក្សាយុវជនជាតិ (NYC) សិង្ហបុរី៕