ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដោយសារតែបញ្ហានៃការកើនឡើងកម្តៅខ្លាំង ដែលធ្វើឱ្យសិស្សានុសិស្សពិបាកក្នុងការសិក្សា សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានបញ្ជាក់ទៅដល់រដ្ឋមន្រ្តីក្រសួងអប់រំ ដោយថា សាលានានាមានសិទ្ធិផ្អាកការសិក្សាជាបណ្តោះអាសន្នសិន ក្នុងករណីដែលកម្តៅក្តៅខ្លាំង។
ថ្លែងក្នុងពិធីជំនួបជាមួយបុគ្គលិកកំពង់ផែស្វយ័តខេត្តព្រះសីហនុ នៅថ្ងៃទី១ ខែឧសភា ចំថ្ងៃនៃទិវាពលកម្មអន្តរជាតិ សម្តេចនាយករដ្ឋមន្រ្តីមានប្រសាសន៍ថា តាមរយៈបណ្តាញសង្គម សម្តេចបានឃើញសាលារៀនខ្លះសិស្សត្រូវយកកន្សែងត្រជាក់ជ្រលក់ទឹកយកមកដាក់លើក្បាលដោយសារក្តៅខ្លាំង ។ សម្តេចបញ្ជាក់ថា ប្រសិនបើក្តៅខ្លាំងគណៈគ្រប់គ្រងសាលាអាចផ្អាកឱ្យសិស្សសម្រាក ព្រោះថា កុមារតូចៗមិនអាចឱ្យអង្គុយនៅកន្លែងមិនអំណោយផល ហើយក្តៅខ្លាំងនោះទេ។
បើចាំបាច់ គឺប្រគល់សិទ្ធិឱ្យគណៈគ្រប់គ្រងសាលា, បើសិនជាក្ដៅខ្លាំងលើស៤០ដឺក្រ ហើយសាលាមិនអំណោយផលអាចមានសិទ្ធិផ្អាកការសិក្សាថ្ងៃនោះ កុំឱ្យសិស្សអង្គុយយូរ
សម្តេចធិបតី ហ៊ុន ម៉ាណែត នាយករដ្ឋមន្រ្តី
កាលពីថ្ងៃទី៣០ ខែមេសា ឆ្នាំ២០២៤ ក្រសួងអប់រំ យុវជន និងកីឡា បានផ្ញើលិខិតមួយច្បាប់ជូនទៅដល់ប្រធានមន្ទីរអប់រំ យុវជន និងកីឡារាជធានីខេត្តទាំងអស់ ក្នុងការកែសម្រួលម៉ោងបង្រៀន និងរៀន ក្នុងរដូវប្រាំងដែលមានអាកាសធាតុក្តៅខ្លាំង។ ក្រសួងបានបញ្ជាក់ថា រដូវប្រាំងឆ្នាំ២០២៤ អាកាសធាតុក្តៅហួតហែងខ្លាំង និងអាចមានសីតុណ្ហភាពលើសពី៤០អង្សា ជាពិសេសនៅចន្លោះពីម៉ោង១០ព្រឹក ដល់ម៉ោង២រសៀល, ដូច្នេះដើម្បីបង្ការទប់ស្កាត់ហានិភ័យ និងចៀសវាងជំងឺផ្សេងៗ ដែលអាចប៉ះពាល់ដល់សុខភាព ការរៀនសូត្ររបស់សិស្សានុសិស្ស និងការបំពេញការងាររបស់លោកគ្រូ អ្នកគ្រូ ក្រសួងបានណែនាំដល់គណៈគ្រប់គ្រងគ្រឹះស្ថានសិក្សាទាំងអស់ ពិនិត្យស្ថានភាពជាក់ស្តែង ក្នុងការផ្លាស់ប្តូរម៉ោងសិក្សា ដោយពេលព្រឹក ចូលរៀននៅម៉ោង ៧:០០ ចេញនៅម៉ោង ១០:០០ ព្រឹក, ពេលរសៀលចូលរៀននៅម៉ោង ១៤:០០ និងចេញនៅម៉ោង ១៧:០០ ហើយក្នុងមួយម៉ោងសិក្សា លោកគ្រូអ្នកគ្រូ ត្រូវឱ្យសិស្សឈប់សម្រាក ឬចេញលេញរយៈពេល១៥នាទី។
ក្រសួងក៏បានណែនាំផងដែរ ដល់គ្រឹះស្ថានសិក្សាត្រូវត្រៀមទឹកសម្រាប់គ្រូបង្រៀន និងសិស្សប្រើប្រាស់ និងណែនាំសិស្សឱ្យយកទឹកឆ្អិនពីផ្ទះមកទទួលទាន ។ ក្នុងករណីសីតុណ្ហភាពឡើងខ្លាំងលើសការគ្រប់គ្រង គ្រឹះស្ថានសិក្សាមានសិទ្ធិក្នុងការសម្រេចជាក់ស្តែង។
យោងតាមស្ថានភាពអាកាសធាតុពេលបច្ចុប្បន្នកម្ពុជារងសម្ពាធទាបដែលធ្វើឱ្យកំដៅក្នុងប្រទេសនៅចន្លោះពី២៦ ដល់៣៩អង្សារ៕
