ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កំពង់ស្ពឺ – ថ្លែងពីពិធីបើកការដ្ឋានសាងសង់លើកម្រិតគុណភាពផ្លូវជាតិលេខ៤១ នៅព្រឹកថ្ងៃទី២៦ ខែធ្នូ ឆ្នាំ២០២២ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានកោតសរសើរដល់ក្រសួងអប់រំ យុវជន និងកីឡា ដែលបានរៀបចំការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សម្រេចបានជោគជ័យ ខណៈឆ្នាំនេះ កម្ពុជាក៏រវល់ជាមួយការប្រជុំអាស៊ានផងនោះ។
សម្តេចតេជោបានបញ្ជាក់ថា ដោយសារឆ្នាំនេះប្រទេសកម្ពុជារវល់ជាមួយនឹងការរៀបចំកិច្ចប្រជុំកំពូលអាស៊ាន បានធ្វើឱ្យក្រសួងអប់រំផ្លាស់ប្តូរកាលបរិច្ឆេទប្រឡងសញ្ញាបត្រមធ្យមសិក្សាទុតិយភូមិ តែយ៉ាងណាក្រសួងបានរៀបចំការប្រឡងនេះទទួលបានជោគជ័យ ដោយក្នុងនោះមានបេក្ខជនជាង ៧២ភាគរយ បានជាប់ជាស្ថាពរ ដែលវាជាការសម្រេចជោគជ័យបានដ៏ល្អ។
សម្តេចតេជោ ហ៊ុន សែន នាយករដ្ឋមន្រ្តី
“ពិតហើយ គម្រោងដើររបស់យើង គឺប្រឡងមុនហ្នឹង តែដោយសារយើងជាប់ប្រជុំអាស៊ាន គឺយើងត្រូវលើកពេលមកប្រឡងថ្ងៃទី៥ ខែធ្នូវិញ ដើម្បីឱ្យផុតពីការប្រជុំអាស៊ាន និងការប្រជុំនានា… តែការប្រឡងនេះ បានសម្រេចជោគជ័យល្អណាស់ ជាមួយនឹងជាប់ជាង ៧២ភាគរយ ក្នុងរយៈក៏មានជាប់និទ្ទេស A រហូតដល់ជាង១ពាន់នាក់…”
ជាមួយគ្នានេះ សម្តេចតេជោនាយករដ្ឋមន្រ្តី ក៏បានលើកទឹកចិត្តដល់បេក្ខជនដែលប្រឡងមិនជាប់ សូមបន្តការសិក្សា ហើយឆ្នាំក្រោយសូមចូលរួមប្រឡងម្តងទៀត។ ដោយក្នុងនោះសម្តេចតេជោក៏ជំរុញដល់បេក្ខជនដែលប្រឡងមិនជាប់ គួរបន្តការសិក្សាថ្នាក់បរិញ្ញាបត្ររង ហើយខិតខំរៀន និងត្រឡប់មកប្រឡងបាក់ឌុបដើម្បីទទួលបានសញ្ញាបត្រ។
សម្រាប់ភាពជោគជ័យ នៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនេះដែរ សម្តេចតេជោនាយករដ្ឋមន្រ្តី ក៏បានថ្លែងអំណរគុណដល់លោកគ្រូអ្នកគ្រូ មន្រ្តីអង្គភាពប្រឆាំងអំពើពុករលួយ ក៏ដូចជា សហភាពសហព័ន្ធយុវជនកម្ពុជា សមត្ថកិច្ច និងអាជ្ញាធរមូលដ្ឋាននៅទូទាំងប្រទេសដែលបានយកចិត្តទុកដាក់ខិតខំរៀបចំការប្រឡងបាក់ឌុបប្រកបដោយជោគជ័យ។
គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំ២០២២នេះ បានប្រព្រឹត្តទៅកាលពីថ្ងៃទី៥ និងទី៦ ខែធ្នូ ឆ្នាំ២០២២ និងត្រូវបានប្រកាសលទ្ធផលកាលពីថ្ងៃទី២២ និងថ្ងៃទី២៣ ខែធ្នូ ឆ្នាំ២០២២ ក្នុងនោះមានបេក្ខជនសរុបចំនួន ៩០៩៥០នាក់បានប្រឡងជាប់ ដែលស្មើនឹង ៧២.៣៣ភាគរយ នៃចំនួនបេក្ខជនមកប្រឡង៕
