ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកនាំពាក្យក្រសួងអប់រំ យុវជន និងកីឡា លោកជំទាវ ឃួន វិច្ឆិកា បានឱ្យដឹងថា ដំណើរការស្រង់ពិន្ទុបាក់ឌុបដោយកុំព្យូទ័រ សម្រាប់ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៦ ត្រូវបានរៀបចំតាមការគ្រោងទុក និងមិនមានបញ្ហាអ្វីគួរឱ្យកត់សម្គាល់ឡើយ។
លោកជំទាវ ឃួន វិច្ឆិកា មានប្រសាសន៍ប្រាប់ AMS ថា ក្រសួងអប់រំ យុវជន និងកីឡា បានប្រជុំណែនាំទៅដល់គណៈកម្មាធិការ អនុគណៈកម្មាធិការ សមាជិកទាំងអស់ ដែលនឹងចូលរួមក្នុងដំណើរការ នៃការស្រង់ពិន្ទុដោយកុំព្យូទ័រ ហើយដំណើរការនេះ គឺរៀបចំតាមការគ្រោងទុក មិនមានបញ្ហាកើតឡើងគួរឱ្យកត់សម្គាល់នោះទេ។
ការបញ្ជាក់នេះធ្វើឡើងបន្ទាប់ពីក្រសួងអប់រំ យុវជន និងកីឡា បានរៀបចំកិច្ចប្រជុំស្តីពីការណែនាំបច្ចេកទេសដល់គណៈកម្មការស្រង់ បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី១០ ខែសីហា ឆ្នាំ២០២៦ កាលពីថ្ងៃទី២០ ខែសីហា នៅវិទ្យាស្ថានជាតិអប់រំ។
កិច្ចប្រជុំនេះដឹកនាំដោយឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា សម្រាប់ដំណើរការស្រង់បូក ដោយមានការចូលរួមពីថ្នាក់ដឹកនាំក្រសួង តំណាងអង្គភាពប្រឆាំងអំពើពុករលួយ (ACU) មន្ត្រីអប់រំ និងសមាជិកគណៈកម្មការពាក់ព័ន្ធ។
ក្នុងកិច្ចប្រជុំនោះ ឯកឧត្តម ហង់ជួន ណារ៉ុន បានថ្លែងអំណរគុណដល់អង្គភាពប្រឆាំងអំពើពុករលួយ និងមន្ត្រីអប់រំគ្រប់លំដាប់ថ្នាក់ ដែលបានបំពេញភារកិច្ចក្នុងដំណើរការកំណែ ដោយឯកឧត្តមបានគូសបញ្ជាក់ពីការបន្តពង្រឹងយន្តការបច្ចេកទេស ដើម្បីធានាថា ការស្រង់ បូក និងផ្ទៀងផ្ទាត់ពិន្ទុ ប្រព្រឹត្តទៅដោយត្រឹមត្រូវ និងអាចទុកចិត្តបាន។
ក្រសួងនឹងបន្តអនុវត្តការត្រួតពិនិត្យសន្លឹកកិច្ចការ (Spot Check) និងរៀបចំក្រុមអ្នកផ្ទៀងផ្ទាត់ចុងក្រោយ ដើម្បីធានាថា ពិន្ទុរបស់បេក្ខជនគ្រប់រូបមានភាពត្រឹមត្រូវ សុក្រឹត និងកាត់បន្ថយហានិភ័យ នៃកំហុសក្នុងការបូក និងបញ្ចូលពិន្ទុ។
ជាមួយគ្នានេះ ក្រសួងមានទិសដៅយកលទ្ធផលបាក់ឌុបមកសិក្សា និងផ្សារភ្ជាប់ជាមួយការវាយតម្លៃកម្រិតអន្តរជាតិ PISA ព្រមទាំងរៀបចំប្រព័ន្ធចំណាត់ថ្នាក់គុណភាពសាលារៀន ដោយផ្អែកលើពិន្ទុមធ្យមភាគ និងកម្រិតនិទ្ទេសរបស់សិស្ស ដូចជា A, B និង C។
គួរជម្រាបថា តាមការគ្រោងទុក ក្រសួងអប់រំគ្រោងប្រកាសលទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១០ សីហា ២០២៦ នៅថ្ងៃទី២ កញ្ញា ឆ្នាំ២០២៦៕
