ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងសន្និសីទសារព័ត៌មានស្ដីពី ថ្លៃបារី និងឥរិយាបទអ្នកប្រើប្រាស់បារីចំពោះការប្រែប្រួលថ្លៃ កាលពីពេលថ្ងៃពុធ (៣០ កក្កដា) លោកបណ្ឌិត គី សេវីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា មានប្រសាសន៍ថា ដើម្បីឱ្យពលរដ្ឋឈប់ជក់បារី លុះត្រាមានការបន្ថែមតម្លៃ១ម៉ឺនរៀលលើតម្លៃបច្ចុប្បន្ន។
បណ្ឌិត គី សេរីវឌ្ឍន៍ មានប្រសាសន៍ថា តាមរយៈការសិក្សាលើទស្សនៈអ្នកជក់បារីជិត៥០០នាក់ក្នុងរាជធានីភ្នំពេញ ខេត្តកំពង់ចាម និងខេត្តសៀមរាប បានគាំទ្ររហូតជាង៨០% ក្នុងការតម្លើងអាករពិសេសលើបារី ពោលគឺពេលបារីឡើងថ្លៃ អ្នកជក់បារី ៥២% នឹងជក់តិចជាងមុន ហើយ២៣% នឹងឈប់ជក់ ដែលធ្វើឱ្យសុខភាពអ្នកជក់បារីប្រសើរជាងមុន រីឯការចំណាយលើការព្យាបាលជំងឺដែលបង្កដោយការជក់បារីក៏ថយចុះដែរ។ លើសពីនេះ រដ្ឋាភិបាលនឹងចំណាយតិចទៅលើ ប.ស.ស បើប្រជាជនមានសុខភាពល្អជាងមុន។
អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា បញ្ជាក់បន្ថែមថា តាមរយៈការចុះសម្ភាសន៍ផ្ទាល់ បង្ហាញថា អ្នកជក់បារីអាចទទួលយកបានប្រសិនតម្លៃបារីមួយកញ្ចប់មានតម្លៃជាមធ្យម ៤៤០០រៀល ប៉ុន្តែប្រសិនបើបារីឡើងថ្លៃ១ម៉ឺនរៀលបន្ថែមទៀត នោះពួកគាត់នឹងបន្ថយការជក់បារី។ បណ្ឌិត គី សេរីវឌ្ឍន៍ បន្តថា ប្រសិនធ្វើឱ្យបារីឡើងថ្លៃ ពួកគាត់នឹងបន្ថយការជក់ និងឈប់ជក់រហូតដល់ ៧៦% ដែលរួមចំណែកជាមួយរដ្ឋាភិបាលក្នុងយុទ្ធនាការប្រទេសដែលគ្មានផ្សែងបារី។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា មានប្រសាសន៍ថា នៅកម្ពុជាប្រជាពលរដ្ឋ ១៥ ០០០នាក់ បានស្លាប់ជារៀងរាល់ឆ្នាំបណ្ដាលមកពីជំងឺដែលបង្កដោយការប្រើប្រាស់ថ្នាំជក់ រួមមាន ជំងឺដាច់សរសៃឈាមខួរក្បាល ជំងឺស្ទះសរសៃឈាមបេះដូង ជំងឺឆ្លងផ្លូវដង្ហើមផ្នែកខាងក្រោម ជំងឺត្បៀតទងសួតរ៉ាំរ៉ៃ និងជំងឺមហារីកសួត ទងសួត និងបំពង់ខ្យល់ ហើយ៣៣%នៃអ្នកស្លាប់ទាំងអស់ កើតឡើងចំពោះប្រជាពលរដ្ឋដែលមានប្រាក់ចំណូលទាបបំផុត។ លើសពីនេះទៀត ការប្រើប្រាស់ថ្នាំជក់បណ្តាលឱ្យខាតបង់ថវិកា ៦៤៩លានដុល្លារ ដែលស្មើនឹង ៣% នៃ GDP របស់កម្ពុជា។
នាយកប្រតិបត្តិអង្គការចលនាដើម្បីសុខភាពកម្ពុជា លើកឡើងថា ការតម្លើងអាករពិសេសលើផលិតផលថ្នាំជក់ នឹងនាំឱ្យការស្លាប់ និងជំងឺថយចុះ ហើយចំណូលពន្ធកើនឡើង។
យោងតាមរបាយការណ៍របស់អង្គការសុខភាពពិភពលោក កម្ពុជាស្ថិតក្នុងចំណោមប្រទេសដែលមានបន្ទុកពន្ធសរុបលើបារីទាបជាងគេ ធៀបនឹងបណ្តាប្រទេសក្នុងតំបន់អាស៊ាន ដោយមានត្រឹមតែ ២៥%នៃថ្លៃលក់រាយ បើធៀបនឹងប្រទេសថៃ៨១% សិង្ហបុរី៧១% ប៊្រុយណេ៦២% ហើយកម្ពុជាក៏នៅឆ្ងាយពីអត្រាដែលផ្តល់អនុសាសន៍ដោយអង្គការសុខភាពពិភពលោក ឱ្យយកពន្ធយ៉ាងតិច ៧៥% នៃថ្លៃលក់រាយ៕
