ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជាការកត់សម្គាល់របស់អគ្គលេខាធិការ នៃរាជបណ្ឌិតសភាកម្ពុជា ការបោះឆ្នោតជ្រើសតាំងតំណាងរាស្រ្តនីតិកាលទី៧នេះ ប្រជាពលរដ្ឋបានទៅចូលរួមបោះឆ្នោតដោយទំនុកចិត្ត កក់ក្តៅ រីករាយ សប្បាយចិត្ត និងមិនមានការភិតភ័យ។
លោកបណ្ឌិត យង់ ពៅ អគ្គលេខាធិការរាជបណ្ឌិតសភាកម្ពុជា មានប្រសាសន៍ថា ការបោះឆ្នោតកាលពីថ្ងៃទី២៣ ខែកក្កដា ឆ្នាំ២០២៣កន្លងទៅនេះ មានប្រជាពលរដ្ឋចេញទៅបោះឆ្នោតរហូតដល់ ៨៤,៥៨ភាគរយ បើធៀបនឹងបញ្ជីឈ្មោះរបស់គណៈកម្មាធិការជាតិរៀបចំការបោះឆ្នោត (គ.ជ.ប) ដោយនេះមានន័យថា ជាតួលេខខ្ពស់ បើធៀបនឹងការបោះឆ្នោតនៅកម្ពុជាកន្លងទៅ ។ ក្នុងនោះដែរ លោកបណ្ឌិតកត់សម្គាល់ថា ប្រជាពលរដ្ឋបានទៅបោះឆ្នោតដោយបង្ហាញភាពរីករាយ បង្ហាញពីទំនុកចិត្តជាម្ចាស់ឆ្នោត ដោយមិនមានភាពភ័យខ្លាចអ្វីឡើយ។
បើតាមប្រសាសន៍បញ្ជាក់របស់លោកបណ្ឌិត យង់ ពៅ ដោយសារតែមានទំនុកចិត្តបែបនេះ ប្រជាពលរដ្ឋទៅបោះឆ្នោត ហាក់ដូចជាទៅចូលរួមក្នុងពិធីបុណ្យដ៏ធំមួយរបស់ប្រជាជាតិកម្ពុជា និងថែមទាំងរាជរដ្ឋាភិបាលបានផ្តល់ការឈប់សម្រាក៣ថ្ងៃ ទាំងថ្ងៃបោះឆ្នោតទៀតផងនោះ គេឃើញថា ប្រជាពលរដ្ឋភាគច្រើនបានឆ្លៀតពេលវេលាក្រោយការអញ្ជើញទៅបោះឆ្នោត ទៅលេងកម្សាន្តនៅតាមតំបន់រមណីយដ្ឋាននានា នៃព្រះរាជាណាចក្រកម្ពុជា ។
នេះជា តថភាពដែលកើតមាននៅកម្ពុជា ដោយសារតែទំនុកចិត្ត និងភាពកក់ក្តៅ នៃការបោះឆ្នោតនេះ អញ្ចឹងនេះជាការបោះឆ្នោតមួយដែលគួរឱ្យមានមោទនភាពសម្រាប់កម្ពុជា
លោកបណ្ឌិត យង់ ពៅ អគ្គលេខាធិការរាជបណ្ឌិតសភាកម្ពុជា
ដូចគ្នានឹងការលើកឡើងរបស់លោកបណ្ឌិត យង់ ពៅ ដែរ លោកបណ្ឌិត ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជា មានប្រសាសន៍ថា ជាអ្វីដែលលោកបានឃើញ ប្រជាពលរដ្ឋខ្លះប្រញ៉ាប់ប្រញាល់អញ្ជើញទៅបោះឆ្នោតឱ្យបានពីព្រលឹម ហើយពេលបោះឆ្នោតរួច ពួកគាត់ក៏បបួលគ្នាទៅកាន់ទិសដៅទេសចរណ៍ណាមួយដែលពួកគាត់ចង់ទៅ ។ ក្នុងនោះជាការកត់សម្គាល់ដែរថា នៅថ្ងៃបោះឆ្នោតផ្លូវល្បឿនលឿនទៅកាន់ខេត្តព្រះសីហនុត្រូវបានស្ទះចរាចរណ៍ ផ្លូវទៅស្ពានអ្នកលឿង និងកន្លែងមួយចំនួនទៀតក៏ត្រូវបានស្ទះផងដែរ ។
លោកបណ្ឌិត ឈត ប៊ុនថង មានប្រសាសន៍បញ្ជាក់ថា ទាំងនេះបង្ហាញថា ប្រជាពលរដ្ឋមានលំនឹងនៅក្នុងចិត្តថា ទោះជានៅមុនពេលបោះឆ្នោត ថ្ងៃបោះឆ្នោត ក្រោយបោះឆ្នោត ក៏ប្រទេសមានស្ថេរភាព មានសន្តិសុខគ្រប់គ្រាន់ មិនមានការព្រួយបារម្ភអ្វីឡើយ ដូច្នេះហើយទើបបានជាប្រជាពលរដ្ឋអញ្ជើញទៅបោះឆ្នោតរួចហើយ ក៏បន្តធ្វើដំណើរកម្សាន្តទៅកាន់ទីកន្លែងផ្សេងៗ៕
