ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លើកឡើងនៅក្នុងឱកាសជួបជុំជាមួយបងប្អូនប្រជាពលរដ្ឋខ្មែរនៅទីក្រុងញូវយ៉ក សហរដ្ឋអាមេរិក កាលពីពេលថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា នៅក្នុងអាណត្តិទី៧នេះ រាជរដ្ឋាភិបាលនឹងផ្តោតលើការពង្រឹងគុណធម៌ សីលធម៌ ពីថ្នាក់មតេយ្យ រហូតដល់ថ្នាក់ទី១២ ដោយធ្វើយ៉ាងណាឱ្យការអប់រំមិនត្រឹមតែពង្រឹងមនុស្សឱ្យចេះអក្សរ មានសមត្ថភាព តែត្រូវគួបផ្សំជាមួយនឹងគុណធម៌ សីលធម៌ និងឥរិយាបទល្អ។
សម្តេចធិបតី មានប្រសាសន៍បញ្ជាក់ថា អត្តចិតពិតជាសំខាន់ណាស់សម្រាប់ធនធានមនុស្សយើង ដូច្នេះត្រូវរៀបចំបណ្តុះគុណធម៌ សីលធម៌ ផ្នត់គំនិត ដល់យុវជន ចាប់តាំងពីក្មេងមក។
ខ្ញុំបានឱ្យក្រសួងអប់រំបញ្ចូលកម្មវិធីមួយចំនួនដើម្បីបំផុស ដូចជាការស្ម័គ្រចិត្តជួយសហគមន៍, ការជួយយកអាសារគ្នា… សមត្ថភាពចំណេះដឹងយើងត្រូវគិតហើយ ប៉ុន្តែបើមានសមត្ថភាព ខ្វះអត្ថចរិត ខ្វះគុណធម៌ ក៏មិនកើត យើងត្រូវតែពង្រឹង
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា
លោកបណ្ឌិត យង់ ពៅ អគ្គលេខាធិការរាជបណ្ឌិតសភាកម្ពុជា បានសម្តែងការយល់ស្រប ដោយថា ប្រសិនបើយើងមិនបានបញ្ចូលគុណធម៌ សីលធម៌ ឥរិយាបទ រួមទាំងមនសិការជាតិ ទៅដល់យុវជន ចាប់ពីវ័យកុមារទេ នោះនឹងធ្វើឱ្យយុវជនខ្មែរយើងនៅថ្ងៃអនាគតហាក់ដូចជាមនុស្សដែលខ្វះព្រលឹងជាតិ។ លោកបណ្ឌិតបញ្ជាក់ថា កាលណាគ្មានគុណធម៌ គ្មានមនសិការ គ្មានឥរិយាបទល្អ សីលធម៌មិនល្អ ការបណ្តុះបណ្តាល ទោះមានចំណេះដឹងជ្រៅជ្រះយ៉ាងណា ក៏ហាក់ដូចជាមនុស្សដែលមានចំណេះដឹង ប៉ុន្តែខ្វះព្រលឹងជាតិ។
យើងអាចនិយាយបានថា មានចំណេះដឹង តែខ្វះព្រលឹងជាតិ អញ្ចឹងតែខ្វះព្រលឹងជាតិទៅ ធ្វើឱ្យឥរិយាបទបុគ្គលមិនសមប្រកប… អញ្ចឹងយើងត្រូវតែបណ្តុះបណ្តាលឱ្យគេមានព្រលឹងជាតិតាំងពីកុមារតូចទៅ
លោកបណ្ឌិត យង់ ពៅ អគ្គលេខាធិការរាជបណ្ឌិតសភាកម្ពុជា
អគ្គលេខាធិការរាជបណ្ឌិតសភាកម្ពុជាបន្តថា ដូច្នេះ ការកែទម្រង់វិស័យអប់រំ កែទម្រង់ទាំងការបញ្ចូលនូវទ្រឹស្តី និងមនសិការជាតិ រួមទាំងបញ្ហាគុណធម៌ សីលធម៌ ឥរិយាបទនៅក្នុងការបណ្តុះបណ្តាល ចាប់តាំងពីថ្នាក់មតេយ្យ រហូតដល់មធ្យមសិក្សា នេះគឺជាគ្រឹះសំខាន់បំផុតរបស់មនុស្ស ព្រោះថា គ្រឹះសង្គម គឺគ្រឹះរបស់មនុស្ស ដែលចាប់ផ្តើមចេញពីក្មេងវ័យនោះឯង៕
