ភ្នំពេញ – ក្នុងពិធីប្រគល់មេដាយអន្តរជាតិ លិខិតសរសើរ វិញ្ញាបនបត្រ សញ្ញាបត្រជាតិ និងអន្តរជាតិ របស់សាលាអប់រំសិស្សឆ្នើមកម្ពុជា កាលពីថ្ងៃទី១៤ ខែមករា ឆ្នាំ២០២៣កន្លងទៅ លោកស្រី ឈី វ៉ា អភិបាលរងខេត្តកោះកុង មានប្រសាសន៍ថា ក្នុងសម័យអប់រំឌីជីថលនេះ សិស្សានុសិស្សត្រូវការការអប់រំដែលអាចបណ្តុះបណ្តាលគាត់ឱ្យបានក្លាយជាពលរដ្ឋដែលមានគុណភាព  មានលក្ខណៈសម្បត្តិពេញលេញ និងរីកចម្រើនគ្រប់ផ្នែក។

លោកស្រី ឈី វ៉ា បន្ថែមថា ស្របគ្នានេះ វិជ្ជាសម្បទា បំណិនសម្បទា ចរិយាសម្បទា កាយសម្បទា មនសិការសេ្នហាជាតិ មនុស្សជាតិ ការអភិវឌ្ឍជាតិ និងការធ្វើសមាហរណកម្មកម្ពុជា នៅក្នុងតំបន់និងពិភពលោក ដែលជាចក្ខុវិស័យរបស់ក្រសួងអប់រំ យុវជន និងកីឡា គឺជួយឱ្យសិស្សានុសិស្សអាចរស់នៅក្នុងបដិវត្តន៍ឧស្សាហកម្ម៤.០ ក្នុងយុគសម័យប្រទេស និងទីក្រុងឆ្លាតវៃនាពេលឆាប់ៗខាងមុខនេះ។

 លោកស្រី ឈី វ៉ា អភិបាលរងខេត្តកោះកុង

“ខ្ញុំជឿជាក់ថាសាលានឹងដើរតួនាទីសំខាន់មួយទៀតក្នុងការរួមចំណែកក្នុងវិស័យអប់រំនៅខេត្តកោះកុង ដើម្បីឱ្យសិស្សានុសិស្សខេត្តកោះកុងមានឱកាសរៀនសូត្រចំណេះដឹងថ្មីៗទាន់សម័យ និងចូលរួមប្រកួងប្រជែងជាមួយសិស្សនៅក្រៅប្រទេស ដែលអាចក្លាយជាធនធានសកម្មក្នុងសេដ្ឋកិច្ច ដើម្បីមកជួយដឹកនាំអភិវឌ្ឍន៍ខេត្តកោះកុង នាពេលអនាគត”

អភិបាលរងខេត្តកោះកុងរូបនេះបន្តថា ដោយអនុវត្តតាមយុទ្ធសាស្រ្តចតុកោណដំណាក់កាលទី៤ នីតិកាលទី៦ នៃរដ្ឋសភាពដែលចាត់ទុកវិស័យអប់រំ និងការអភិវឌ្ឍធនធានមនុស្សជាអាទិភាពទី១ និងដើម្បីប្តេជ្ញាសម្រេចឱ្យ​បាននូវមុំទី១ គឺ ពង្រឹងគុណភាពអប់រំ វិទ្យាសាស្រ្ត និងបច្ចេកទេស ដើម្បីឱ្យកម្ពុជាអាចប្រកួតប្រជែងជាមួយប្រទេសក្នុងតំបន់ និងអន្តរជាតិលើកំណើនសេដ្ឋកិច្ចប្រកបដោយចីរភាព។

លោកស្រី ឈី វ៉ា ក៏បានកោតសរសើរចំពោះថ្នាក់ដឹកនាំ គណៈគ្រប់គ្រង លោកគ្រូ អ្នកគ្រូ និងបុគ្គលិកសាលាអប់រំសិស្សឆ្នើមកម្ពុជាទាំងអស់ ដែលខិតខំប្រឹងប្រែងទាំងកម្លាំងកាយ និងចិត្តសម្រាប់ការនាំមកនូវការអប់រំដែលមានលក្ខណៈជាតិ និងអន្តរជាតិដែលផ្តល់ឱ្យសិស្សានុសិស្សបានក្រេបជញ្ជក់នូវចំណេះដឹងថ្មីៗនិងទាន់សម័យនាំឱ្យសិស្សមានឱកាសចូលរួមប្រឡងកម្រិតអន្តរជាតិនានា នៅក្រៅប្រទេសជាមួយសិស្សផ្សេងៗ ក្នុងពិភពលោក។ 

អភិបាលរងខេត្តកោះកុងបញ្ជាក់ថា នេះជាការជួយជ្រោមជ្រែងក្នុងបុព្វហេតុរួមចំណែកកសាង និងអភិវឌ្បន៍វិស័យអប់រំនៅកម្ពុជា ដើម្បីត្រៀមធនធានមនុស្ស ក្នុងការ​ទ្រទ្រង់សេដ្ឋកិច្ចជាតិកម្ពុជាឱ្យក្លាយជាប្រទេសមានចំណូលមធ្យមកម្រិតខ្ពស់ត្រឹមឆ្នាំ២០៣០ និងចំណូលកម្រិតខ្ពស់ត្រឹមឆ្នាំ២០៥០ស្របតាមចក្ខុវិស័យអភិវឌ្ឍន៍ជាតិរបស់រាជរដ្ឋាភិបាលកម្ពុជា៕