ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការរៀនត្រៀមប្រឡងជាមុននឹងជួយឱ្យអ្នកសិក្សាមានអារម្មណ៍ល្អក្នុងពេលប្រឡង ហើយក៏មានរឿងជាច្រើនដែលអ្នកសិក្សាអាចធ្វើបានមុនពេលប្រឡងដើម្បីជួយឱ្យទទួលបានលទ្ធផលល្អក្នុងការប្រឡង។
ជាមួយគ្នានេះ លោក អ៊ុង ប៉េងអាន ស្ថាបនិកគេហទំព័រហ៊េសបុក Think with PingAnn គិតជាមួយប៉េងអាន ក៏បានចែករំលែកគន្លឹះចំនួនសម្រាប់សិក្សានុសិស្ស ជាពិសេសសិស្សានុសិស្សដែលត្រៀមខ្លួនប្រឡងសញ្ញាបត្រមធ្យសិក្សាទុតិយភូមិ ឬបាក់ឌុបឆាប់ៗខាងមុខនេះ។
១. របៀបរៀន២៥/៥ ៖ សាករំលឹកមេរៀនបែប២៥/៥ ក្នុងបន្ទប់ស្ងប់ស្ងាត់ដោយផ្ដោតទៅលើមុខវិជ្ជា ឬប្រធានបទតែមួយគត់រយៈពេល២៥នាទី រួចសម្រាកខួរក្បាល៥នាទី។ យុទ្ធសាស្រ្តនេះអាចជួយឱ្យខួរក្បាលរបស់អ្នកផ្ដោតយ៉ាងពេញលេញ និងទទួលយកមេរៀនដោយពុំមានការរំខានក្នុងរយៈពេលដ៏ខ្លីមួយ។ ទន្ទឹមគ្នានេះ ការសម្រាក ៥នាទីក្នុងចន្លោះពេលនីមួយៗ អាចជួយកាត់បន្ថយវិបត្តិអស់ថាមពលក្នុងខ្លួន (Burn Out) ឬសម្ពាធ និងជួយឱ្យខួរក្បាលរបស់អ្នកស្រឡះជាងមុន ដើម្បីចាប់ផ្ដើមទទួលយកមេរៀនថ្មី។ ធ្វើបែបនេះបីទៅបួនដង រួចសម្រាករយៈ១ទៅ២ម៉ោង មុនចាប់ផ្ដើមអនុវត្ត ២៥/៥ ជុំថ្មីម្ដងទៀត។
២. រៀនជាក្រុម ៖ ចែករំលែកចំណេះដឹងគ្នាទៅវិញទៅមក តាមរយៈការសិក្សាជាក្រុម ។ ការសិក្សាជាក្រុមគឺជាគន្លឹះល្អក្នុងការជួយគ្នាទៅវិញទៅមកចំពោះលំហាត់ដែលលំបាក។ លើសពីនេះ ស្វែងរកសម្រាប់សំណួរដែលត្រូវការការត្រិះរិះពិចារណាខ្ពស់ និងធ្វើឱ្យការសិក្សារបស់យើងរីករាយជាងមុន។
៣. ថែរក្សារាងកាយរបស់អ្នក ៖ សុខភាពគឺជាមូលដ្ឋានគ្រឹះនៃភាពជោគជ័យ។ ទោះស្ថិតនៅក្នុងសម្ពាធខ្លាំងប៉ុណ្ណា មុនពេលប្រឡង អ្នកគួរសម្រាកឱ្យបានគ្រប់គ្រាន់ ញ៉ាំអាហារដែលមានជីវជាតិគ្រប់គ្រាន់ និងអាហារដែលបំប៉នខួរក្បាល ដើម្បីជួយឱ្យអ្នកគិត និងចងចាំប្រសើរជាងមុនសម្រាប់ការប្រឡងរបស់អ្នក។
គួរជម្រាបជូនថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នឹងប្រព្រឹត្តិទៅនៅថ្ងៃទី០៦-០៧ ខែវិច្ឆិកា ឆ្នាំ២០២៣។ ក្នុងនោះ ក្រសួងអប់រំយុវជន និងកីឡា បានកំណត់យកមុខវិជ្ជា ប្រវត្តិវិទ្យា សម្រាប់ថ្នាក់វិទ្យាសាស្រ្ត និង មុខវិជ្ជាផែនដី និងបរិស្ថានវិទ្យា សម្រាប់ថ្នាក់វិទ្យាសាស្រ្តសង្គម ជាវិញ្ញាសាជម្រើសសម្រាប់ការប្រឡងសញ្ញាបត្រមធ្យមសិក្សាទុតិយភូមិនាពេលខាងមុខនេះ៕
