ភ្នំពេញ – លោក សួន បញ្ញា ជាប្រធានគម្រោងយុវជនកសិកម្មដាស់សតិ ដោយ​គម្រោង​មួយ​នេះ​មានគោលបំណងលើកកម្ពស់ការគាំទ្រយុវជន និងយុវតីនៅជនបទក្នុងប្រទេសកម្ពុជាឱ្យទទួលបានការងារសមប្រកបនិងកំណើនសេដ្ឋកិច្ចប្រកបដោយនិរន្តរភាពតាមរយៈកម្មវិធីយុវជនអភិវឌ្ឍយុវជន កម្មវិធីយុវជកសិកម្មអេកូឡូស៊ី និងកម្មវិធីយុវកសិកម្ម។

អ្នកដឹកនាំគម្រោងវ័យ២៦ឆ្នាំរូបនេះ បញ្ជាក់ថា ការបង្កើតគម្រោងយុវជនកសិកម្មដាស់សតិនេះឡើង គឺផ្ដើមចេញពីការស្គាល់ខ្លួនឯង ។ បញ្ញា រៀបរាប់ថា ដើមឡើយលោកចង់រស់នៅក្នុងជីវិតមួយដែលមានសួនបន្លែចំរុះនៅជុំវិញផ្ទះ  អាចហាត់ប្រាណ ធ្វើការនៅផ្ទះលើកុំព្យូទ័រ និងចំណាយពេលជាមួយគ្រួសារនៅពេលជាមួយគ្រួសារពេលទំនេរ ហើយគ្រប់ពេលធ្វើកិច្ចការអ្វីៗ លោកតែងមានរូបភាពបែបនេះនៅក្នុងចិត្តរហូត ។

លោក សួន បញ្ញា ប្រធានគម្រោងយុវជនកសិកម្មដាស់សតិ

“បន្ទាប់ពីចំណាយពេលមាណប្រជិត៨ឆ្នាំដើម្បីស្វែងរកខ្លួនឯង ខ្ញុំក៏បានរកឃើញបុព្វហេតុជីវិតរបស់ខ្លួនគឺ ចង់ចូលរួមដាស់សតិគ្នាទៅវិញទៅមក ធ្វើយ៉ាងណាឱ្យមនុស្សជាតិបកមកធ្វើការងារកសិកម្ម ហើយរស់នៅប្រកបដោយភាពសុខដុមជាមួយធម្មជាតិ”

លោក សួន បញ្ញា បន្តថា តាមរយៈការអនុវត្តគម្រោងនេះ គឺមិនបានព្យាយាមផ្លាស់ប្ដូរឱ្យប្រជាជន មកធ្វើការងារកសិកម្មនោះទេ ប៉ុន្តែជាការព្យាយាមរកវិធីទាក់ទាញយុវជនឱ្យចាប់អារម្មណ៍លើការងារកសិកម្ម ព្រោះយុវជនភាគច្រើនកំពុងស្វែងរកកិច្ចការដែលធ្វើទៅមានតម្លៃសម្រាប់ខ្លួន ឬការងារនោះជះផលវិជ្ជមានដល់សង្គមបាន។ លោកបន្ថែមថា ខ្លឹមសារនៃការងារកសិកម្ម គឺការធ្វើការងារកសិកម្មដែលអាចជួយភពផែនដី និងធម្មជាតិ ហើយបន្តផលិតស្បៀងអាហារដល់មនុស្សជាតិ។ ក្នុងនោះ លក្ខណៈពិសេសរបស់គម្រោងនេះ គឺឱ្យតម្លៃទៅលើបច្ចេកទេសធ្វើកសិកម្មដែលមិនប៉ះពាល់ដល់បរិស្ថាន និងសុខភាពមនុស្ស។ លើសពីនេះ ធ្វើយ៉ាងណាបង្កើនស្ថេរភាពគម្រោងឱ្យនៅតែបន្ត និងច្នៃឱ្យចេញទៅជាអាជីកម្ម។

លោក សួន បញ្ញា ប្រធានគម្រោងយុវជនកសិកម្មដាស់សតិ

“បញ្ហាដែលជួបកន្លងមកដល់ថ្ងៃនេះ គឺយើងពិបាកគៀងគរមនុស្សមកចូលរួមធ្វើការងារនេះជាមួយគ្នា ប្រហែលជាដោយសារយើងទើបតែចាប់ផ្ដើមទើបមិនទាន់មានអ្នកបានដឹងច្រើន ប៉ុន្តែឥឡូវខ្ញុំក៏សប្បាយចិត្តដែរដែលមានយុវជនចាប់ផ្ដើមចាប់អារម្មណ៍ និងទាក់ទងមកយើងផ្ទាល់ដោយសារចក្ខុវិស័យ និងគុណតម្លៃដែលយើងមានគឺត្រូវគ្នាជាមួយយុវជន”

លោក សួន បញ្ញា សង្ឃឹមថា តាមរយៈគម្រោងយុវជនដាស់សតិនេះ នឹងរួមចំណែកជួយលើកកម្ពស់ជីវភាពរបស់យុវជន និងអាចផ្សារភ្ជាប់ទំនាក់ទំនងជាមួយយុវជននៅក្រៅប្រទេស ដើម្បីឱ្យពួកគេស្វែងរកខ្លួនឯងឃើញ និងស្គាល់ពីសមត្ថភាពរបស់ខ្លួន។ លោកក៏បានសំណូមពរដល់យុវជនដែលចាប់អារម្មណ៍ក្នុងការងារកសិកម្មអាចស្វែងរកកន្លែងដែលអាចជួយអភិវឌ្ឍសមត្ថភាព និងចំណេះដឹងផ្នែកបច្ចេកទេសកសិកម្ម ឬអាចទំនាក់ទំនងចូលរួមជាមួយគម្រោងរបស់យុវជនកសិកម្មដាស់សតិបានផងដែរ។

គួរបញ្ជាក់ថា លោក សួន បញ្ញា ធ្លាប់មានក្ដីស្រមៃចង់ជាកីឡាករជម្រើសជាតិប្រណាំងកង់គួកតំណាងឱ្យប្រទេសខ្មែរក្នុងការប្រកួតកីឡាអូឡាំពិកនៅប្រទេសជប៉ុន ក្នុងឆ្នាំ២០២០។ ប៉ុន្តែជាក់ស្ដែងលោកមិនបានចូលរួមប្រកួតនោះទេ ដោយលោកបែរទៅធ្វើការងារជាមួយសហគមន៍កសិកម្មវិញ ក្រោយពេលបានស្គាល់ច្បាស់ពីចំណូលចិត្តរបស់ខ្លួន ហើយបានសិក្សាស៊ីជម្រៅទាក់ទងជាមួយបច្ចេកទេសដាំដំណាំកសិកម្ម និងយល់ពីសារៈសំខាន់នៃការដាំដំណាំជាអាហារសម្រាប់មនុស្សជាតិ៕