ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅថ្ងៃទី១ ខែមិថុនា ឆ្នាំ២០២៦ខាងមុខ អង្គការទស្សនៈពិភពលោកអន្តរជាតិប្រចាំនៅកម្ពុជា នឹងរៀបចំពិធីអបអរសាទរខួបអនុស្សាវរីយ៍លើកទី៥៦ នៃការបំពេញបេសកកម្មមនុស្សធម៌នៅកម្ពុជា ក្រោមប្រធានបទ «ឆ្នាំនៃការដឹងគុណ ភាពធន់ និងក្តីសង្ឃឹម»។
ពិធីនេះ នឹងប្រព្រឹត្តទៅនៅសណ្ឋាគារ Raffles Hotel Le Royal ចាប់ពីម៉ោង ៥:៣០ ល្ងាច ដល់ម៉ោង ៩:០០ យប់ ដោយរួមមានពិធីអបអរសាទរពីមន្រ្តីរាជរដ្ឋាភិបាល និងអង្គការដៃគូអភិវឌ្ឍន៍ ព្រមជាមួយនឹងការតាំងពិព័រណ៍បង្ហាញសមិទ្ធផលផងដែរ។ ពិធីនេះ ត្រូវរំពឹងថា នឹងមានវត្តមានជាអធិបតីពី ឯកឧត្តមឧបនាយករដ្ឋមន្ត្រី និងរដ្ឋមន្ត្រីក្រសួងអប់រំ យុវជន និងកីឡា ហង់ ជួនណារ៉ុន រួមជាមួយភ្ញៀវកិត្តិយសចូលរួមប្រមាណ ១៥០ នាក់ ជាមន្ត្រីរាជរដ្ឋាភិបាល ថ្នាក់ដឹកនាំវិស័យឯកជន បេសកកម្មការទូត និងដៃគូអភិវឌ្ឍន៍។
តាមការបញ្ជាក់ពីអង្គការទស្សនៈពិភពលោក ឆ្នាំ២០២៦នេះ គឺជាឆ្នាំអបអរសាទរខួប៥៦ឆ្នាំនៃការងារមនុស្សធម៌នៅកម្ពុជា ចាប់តាំងពីឆ្នាំ១៩៧០មក។ អង្គការបានធ្វើការជិតស្និទ្ធជាមួយរាជរដ្ឋាភិបាល ក្រសួងពាក់ព័ន្ធ អាជ្ញាធរមូលដ្ឋាន ម្ចាស់ជំនួយ និងសហគមន៍ ដើម្បីលើកកម្ពស់គុណភាពជីវិតកុមារ និងគ្រួសារ។
ក្នុងរយៈពេលជាង៥ទសវត្សរ៍ អង្គការទស្សនៈពិភពលោកបានផ្តោតលើការផ្តល់ការអប់រំមានគុណភាព ការទទួលបានទឹកស្អាត សេវាសុខាភិបាល និងការបង្កើតបរិយាកាសសុវត្ថិភាពសម្រាប់កុមារ។ កម្មវិធីនានា បានរួមចំណែកធ្វើឱ្យសហគមន៍ជាច្រើនមានជីវភាពប្រសើរឡើង និងទទួលបានឱកាសអភិវឌ្ឍន៍ប្រកបដោយនិរន្តរភាព។
ក្នុងឆ្នាំ២០២៥ ផលពីកម្មវិធីរបស់អង្គការទស្សនៈពិភពលោកបានដល់ប្រជាជនប្រមាណ ៥,៤ លាននាក់ ក្នុងនោះមានកុមារជាង ៣,១ លាននាក់។ ការឆ្លើយតបផ្នែកមនុស្សធម៌នៅតែជាអាទិភាពសំខាន់ ដោយផ្តោតលើជំនួយទឹកស្អាត អនាម័យ អាហារ ការអប់រំ សុខភាព អាហារូបត្ថម្ភ ការការពារ និងការគាំទ្រផ្នែកចិត្តសាស្ត្រសង្គម។
សូមជំរាបថា នៅឆ្នាំ១៩៤៧ អំឡុងពេលលោក Bob Pierce ស្ថាបនិកអង្គការទស្សនៈពិភពលោក កំពុងធ្វើដំណើរនៅក្នុងប្រទេសចិន លោកបានជួបក្មេងស្រីដែលត្រូវបានគ្រួសារបោះបង់ចោល។ ដោយអារម្មណ៍រំជួលចិត្តចំពោះស្ថានភាពរបស់នាង លោកបានផ្តល់ប្រាក់ ៥ ដុល្លារ ដែលជាលុយចុងក្រោយនៅក្នុងហោប៉ៅរបស់គាត់ទៅឱ្យអ្នកថែទាំនៅក្នុងស្រុកម្នាក់ ដើម្បីជួយថែទាំកុមារីនោះ។
លោកក៏ចាប់ផ្តើមគិតថា មានកុមារជាច្រើនទៀតនៅជុំវិញពិភពលោកដែលកំពុងប្រឈមនឹងភាពក្រីក្រ ភាពអត់ឃ្លាន និងការលំបាក។ ពេលវេលានោះនៅតែដិតជាប់នៅក្នុងចិត្តរបស់លោក។
ប៉ុន្មានឆ្នាំក្រោយមក នៅឆ្នាំ១៩៥០ លោកបានបង្កើតអង្គការទស្សនៈពិភពលោកអន្តរជាតិឡើង ដោយមានចក្ខុវិស័យដើម្បីកៀរគរមនុស្សនៅជុំវិញពិភពលោកជួយគាំទ្រដល់កុមារ និងគ្រួសារដែលខ្វះខាត៕
