សិស្សអាយុ ១៧ឆ្នាំម្នាក់ បានអង្រួនពិភពគណិតវិទ្យា ដោយបានបំបែកទ្រឹស្តីគណិតវិទ្យា​ ដែលគ្មានអ្នកដោះស្រាយចេញ អស់រយៈពេលជាង ៤០ឆ្នាំ។

ការស្រាវជ្រាវរបស់យុវតី Hannah Cairo ដែលបានបោះពុម្ព កាលពីខែកុម្ភៈនៅលើបណ្ណសារវិទ្យាសាស្ត្រអនឡាញ arXiv បង្ហាញឱ្យឃើញពីដំណោះស្រាយ នៃការស្មានរបស់ Mizohata-Takeuchi ដែលជាគំនិតស្នូលក្នុងការវិភាគអាម៉ូនិក ដែលជាទ្រឹស្ដីបានបង្កើតឡើងនៅដើមទសវត្សរ៍ឆ្នាំ១៩៨០ ប៉ុន្តែត្រូវបានគេរកឃើញថា ការដោះស្រាយមិនត្រឹមត្រូវ។ ការស្មាន ដែលដាក់ឈ្មោះតាមគណិតវិទូ Shigeru Mizohata និង Kazuaki Takeuchi បានអះអាងថា ថាមពលនៃមុខងារគណិតវិទ្យាមួយចំនួន ដែលបង្កើតឡើងពីរលកនៅលើផ្ទៃកោង អាចរីករាលដាល ឬផ្ដោតតែលើលំនាំជាក់លាក់ប៉ុណ្ណោះ។

អស់រយៈពេលជាច្រើនទសវត្សរ៍មកហើយ គ្មាននរណាម្នាក់ អាចបញ្ជាក់ពីការប៉ានស្មាននេះបានទេ។ ខណៈពេលដែលមានការសង្ស័យថា មានការបង្កកំហុស ហើយ​មានតែករណីពិសេសមួយចំនួនប៉ុណ្ណោះ ដែលត្រូវបានទទួលស្គាល់ថា ដោះស្រាយបានត្រឹមត្រូវ។

យុវតី Cairo បានបំបែកភាពជាក់គាំង ដោយបង្កើតទ្រឹស្តីផ្ទុយទូទៅមួយ ដែលនិយាយថា មុខងារ ដែលថាមពលរបស់វារីករាលដាលក្នុងទម្រង់មិនទៀងទាត់ និងស្រដៀងនឹងប្រភាគ ដែលប្រឆាំងនឹងច្បាប់ ដែលបានព្យាករណ៍។

លោក Itamar Oliveira បណ្ឌិតគណិតវិទ្យានៅសាកលវិទ្យាល័យ Birmingham បានរាយការណ៍នៅក្នុងទស្សនាវដ្តី Quanta ថា «យើងទាំងអស់គ្នាភ្ញាក់ផ្អើលជាខ្លាំង។ ខ្ញុំមិនដែលឃើញអ្វីដូចនេះ ពីមុនមកទេ។»

លោក Tony Carbery គណិតវិទូនៅសាកលវិទ្យាល័យ Edinburgh ដែលបានសិក្សាពីបញ្ហានេះអស់ជាច្រើនទសវត្សរ៍ បានលើកឡើងនៅក្នុងទស្សនាវដ្ដី Quanta ថា «នេះគឺជាបញ្ហាដែលខ្ញុំចូលចិត្តបំផុត អស់រយៈពេល ៤០ឆ្នាំមកហើយ ហើយពេលនេះ ខ្ញុំបានបំបែកវាដោយជោគជ័យ។»

ធំធាត់នៅ Bahamas និងរៀនតាមផ្ទះជាមួយបងប្អូន ២នាក់របស់នាង យុវតី Cairo បានចាប់ផ្ដើមរៀនគណិតវិទ្យាតាមរយៈ Khan Academy នៅសាលាបឋមសិក្សា ហើយបានសិក្សាអំពីរបៀបគណនាលេខនៅអាយុ ១១ឆ្នាំ។ ដោយមើលឃើញពីសក្តានុពលដ៏អស្ចារ្យរបស់ Cairo គ្រួសាររបស់នាងបានជួលគ្រូបង្រៀនមកពីសាកលវិទ្យាល័យ នៅសហរដ្ឋអាមេរិក ដើម្បីបង្រៀននាងតាមអ៊ីនធឺណិត។

នៅឆ្នាំ២០២១ ខណៈពេលដែលទៅលេងបងប្អូនជីដូនមួយរបស់នាងនៅទីក្រុង ឈីកាហ្គោ យុវតី Cairo បានចូលរួមក្នុងកម្មវិធី Math Circles of Chicago ដែលជាអង្គការមិនរកប្រាក់ចំណេញ ដើម្បីផ្ដល់ការសិក្សាផ្នែកគណិតវិទ្យាដល់សិស្ស។ មួយឆ្នាំក្រោយមក នាងបានចូលរួមក្នុងកម្មវិធីរដូវក្ដៅ Berkeley Math Circle របស់ UC Berkeley តាមអ៊ីនធឺណេត ដោយចុះឈ្មោះចូលរៀនវគ្គសិក្សាកម្រិតសាកលវិទ្យាល័យ ដែល​ជាកម្រិតខ្ពស់ខណៈ​នាង​មាន​អាយុត្រឹមតែ ១៤ ឆ្នាំ។

លោកស្រី Zvezdelina Stankova ស្ថាបនិក Berkeley Math Circle បានប្រាប់ Quanta ថា សមត្ថភាពរបស់ Hannah Cairo គឺលើសពីមនុស្សធម្មតា។ រាល់ពេលដែលនាងដាក់ពាក្យចូលសាលា ឬកម្មវិធីប្រកួតប្រជែងផ្សេងៗ នាងតែងតែមានសមត្ថភាពខ្ពស់ជាងវគ្គសិក្សាដែលនាងចូលរួម។

នៅឆ្នាំ២០២៣ យុវតី Cairo បានចុះឈ្មោះចូលរៀននៅសាកលវិទ្យាល័យកាលីហ្វ័រញ៉ា, ខណៈពេលដែលចូលរៀននៅ UC Berkeley យុវតី Cairo បានសិក្សាអំពីទ្រឹស្តីនៃការរឹតបន្តឹង Fourier ក្រោមការដឹកនាំរបស់សាស្ត្រាចារ្យ Ruixiang Zhang ដែលជាគណិតវិទូទទួលបានការបណ្ដុះបណ្ដាលពី សាកលវិទ្យាល័យ​ ព្រីស្ដុន និងជាអតីតម្ចាស់មេដាយមាសអូឡាំពិចអន្តរជាតិ។

នាងបានជួបប្រទះការស្មានរបស់ Mizohata-Takeuchi ជាលើកដំបូង នៅពេលដែល Zhang បានដាក់កិច្ចការផ្ទះឱ្យនាងដោះស្រាយ។ បន្ទាប់ពីចំណាយពេលសិក្សា ស្រាវជ្រាវ និងដោះស្រាយបញ្ហានេះ នាងបានរកឃើញមុខងារពិសេសមួយ​ ដែលបង្ហាញថា ជំនួសឱ្យការលុបចោលគ្នាទៅវិញទៅមក រលកនៅលើផ្ទៃកោងបានបង្កើតគម្រូថាមពលច្របូកច្របល់ ដែលបំពាន លើការស្មានដោយផ្ទាល់។

នាងបាននិយាយថា «ខ្ញុំបានចំណាយពេលមួយរយៈ ដើម្បីបញ្ចុះបញ្ចូល Ruixiang Zhang ថា សំណើរបស់ខ្ញុំពិតជាត្រឹមត្រូវ។»

ជាមួយនឹងការណែនាំរបស់សាស្ត្រាចារ្យ Zhang យុវតី Cairo បានបោះពុម្ពលទ្ធផលនៃការស្រាវជ្រាវរបស់ខ្លួននៅលើ arXiv ហើយត្រូវបានគេអញ្ជើញឱ្យបង្ហាញស្នាដៃនេះជាលក្ខណៈអន្តរជាតិនៅក្នុងសន្និសីទអន្តរជាតិស្ដីពី ការវិភាគអាម៉ូនិក និងសមីការឌីផេរ៉ង់ស្យែលនៅប្រទេសអេស្ប៉ាញ។

បន្ទាប់ពីសម្រេចបានស្នាដៃដ៏អស្ចារ្យនេះ Cairo ត្រូវបានសាកលវិទ្យាល័យ Maryland និងសាកលវិទ្យាល័យ Johns Hopkins ប្រកាសទទួលឱ្យបន្តការសិក្សាថ្នាក់បណ្ឌិតនៅទីនោះ ហើយនាងនឹងបន្តការសិក្សានៅសាកលវិទ្យាល័យ Maryland នារដូវស្លឹកឈើជ្រុះឆ្នាំនេះ៕