ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងកម្មវិធី “Meet and Greet 2025 និទ្ទេស A, B, C with Mony” គាំទ្រដោយក្រសួងប្រៃសណីយ៍ និងមូលនិធិ CBRD កាលពីពេលកន្លងទៅថ្មីៗនេះ កញ្ញា សេង រ័ត្នសេដ្ឋាមុនី ដែលគេស្គាល់ថា ជាយុវជនឆ្នើមមួយរូបរបស់កម្ពុជា បានលើកឡើងថា កញ្ញាចង់ឃើញយុវជនកម្ពុជាឱ្យមានភាពច្នៃប្រតិដ្ឋ ចាប់យកបច្ចេកវិទ្យា និងក្លាហានសម្រេចក្ដីស្រមៃ ដើម្បីរួមចំណែកអភិវឌ្ឍសហគមន៍ និងប្រទេសជាតិ។
កញ្ញា សេង រ័ត្នសេដ្ឋាមុនី បន្ថែមថា ក្នុងនាមជាអ្នកប្តេជ្ញាចិត្តក្នុងការជំរុញការអប់រំឌីជីថល និងនវានុវត្តន៍ កញ្ញាចង់ឱ្យសិស្សានុសិស្សមើលឃើញថា ភាពច្នៃប្រតិដ្ឋ បច្ចេកវិទ្យា និងភាពក្លាហាន អាចផ្លាស់ប្តូរមិនត្រឹមតែអនាគតផ្ទាល់ខ្លួនប៉ុណ្ណោះទេ ប៉ុន្តែក៏អាចជួយផ្លាស់ប្ដូរសហគមន៍ផងដែរ។ កញ្ញាមានចក្ខុវិស័យក្នុងការកសាងអនាគតមួយដែលយុវជនកម្ពុជាអាចដឹកនាំ មិនត្រឹមតែនៅក្នុងថ្នាក់រៀន ប៉ុន្តែអាចបង្កើតដំណោះស្រាយសម្រាប់ពិភពលោកបាន។
ក្នុងឱកាសនោះ លោកស្រី ប៉េងលី ស៊ីនីច អគ្គនាយករង និងជាអគ្គលេខាធិការ នៃកម្មវិធីអភិវឌ្ឍន៍ជំនាញឌីជីថល (DSDP) ក៏បានលើកទឹកចិត្តសិស្សានុសិស្សឱ្យស្វែងយល់ពីឱកាសក្នុងវិស័យឌីជីថល ដោយថា នៅពេលធនធានមនុស្សជំនាញឌីជីថលមានកាន់តែច្រើន កម្ពុជាក៏អាចពង្រឹងខ្លួនដើម្បីប្រកួតប្រជែងជាមួយប្រទេសដទៃក្នុងវិស័យឌីជីថលបានកាន់តែខ្លាំងផងដែរ។ លោកស្រីក៏បានបង្ហាញផ្លូវទៅដល់សិស្សនិស្សិតពីកម្មវិធីអាហារូបករណ៍ទេពកោសល្យឌីជីថលតេជោ និងកម្មវិធីអភិវឌ្ឍន៍ជំនាញបច្ចេកវិទ្យាឌីជីថល ដែលមានគោលដៅពង្រីកលទ្ធភាពទទួលបានការអប់រំ និងបណ្តុះបណ្តាលឌីជីថលប្រកបដោយគុណភាព។
លោកស្រីប្រធានលេខាធិការដ្ឋានបានបង្ហាញអំពី អត្ថប្រយោជន៍នានា នៃកម្មវិធីអភិវឌ្ឍន៍ជំនាញឌីជីថល ដោយផ្តោតការយកចិត្តទុកដាក់លើការផ្តល់ឱ្យនិស្សិតអាចចាប់យកក្តីស្រមៃរបស់ក្នុងការសិក្សាជំនាញបច្ចេកវិទ្យាឌីជីថល ហើយអាចទ្រទ្រង់និរន្តរភាពក្នុងការផ្តល់ជំនួយហិរញ្ញវត្ថុដល់និស្សិតជំនាន់ក្រោយ ទន្ទឹមនឹងការចូលរួមបំពេញបន្ថែមលើការផ្តល់អាហារូបករណ៍ពីគ្រប់មជ្ឈដ្ឋានសំដៅកសាង និងអភិវឌ្ឍធនធានមនុស្សក្នុងវិស័យនេះ ឱ្យបានកាន់តែច្រើនបន្ថែមទៀត ដោយសារបច្ចុប្បន្ន ធនធានមនុស្សជំនាញឌីជីថលនៅមានតិចតួចនៅឡើយ បើធៀបនឹងបណ្តាប្រទេសជិតខាងនិងក្នុងតំបន់អាស៊ាន។
បើតាមប្រសាសន៍លើកឡើងរបស់ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ ប្រជាជនកម្ពុជាប្រហែល ៣០% មានជំនាញឌីជីថលកម្រិតមូលដ្ឋាន និងមានលទ្ធភាពប្រើប្រាស់ប្រព័ន្ធអ៊ីនធឺណេត និងបច្ចេកវិទ្យាឌីជីថល។ ផ្អែកលើទិន្នន័យនេះ ឯកឧត្តមមានប្រសាសន៍ថា យុវជនគួរចាប់ផ្តើមសិក្សាពីជំនាញឌីជីថល ដែលជំនាញនេះសុទ្ធតែជាជំហានចាំបាច់សម្រាប់ការងារប្រចាំថ្ងៃ និងអាចជាមូលដ្ឋានគ្រឹះមួយដ៏ល្អ មុននឹងឈានទៅចាប់យកជំនាញឌីជីថលនៅកម្រិតមធ្យម និងខ្ពស់ ឆ្លើយតបទៅនឹងការប្រែប្រួលនៃតម្រូវការ និងភាពប្រកួតប្រជែងក្នុងទីផ្សារការងារនាពេលបច្ចុប្បន្ន៕
