ក្រសួងវប្បធម៌ និងចិត្រសិល្បៈ ប្រកាសជ្រើសរើសបេក្ខជន ចូលប្រឡងប្រជែងស្នាដៃថតរូបប្រចាំឆ្នាំ២០២៥ ក្រោមប្រធានបទ «រួមគ្នាលើកតម្កើនមរតកវប្បធម៌អរូបី» ក្នុងគោលបំណងលើកកម្ពស់ការយល់ដឹង ការដឹងគុណ និងការអភិរក្សសម្បត្តិបេតិកភណ្ឌវប្បធម៌អរូបី ព្រមទាំងចែករំលែករូបភាព និងការចងចាំល្អៗដែលឆ្លុះបញ្ចាំងពីភាពសម្បូរបែបនៃវប្បធម៌ដ៏រស់រវើកនៅក្នុងប្រទេសកម្ពុជា។

ខ្លឹមសារគោលនៃរូបថត បេក្ខជនត្រូវបង្ហាញពីទិដ្ឋភាព នៃសម្បត្តិបេតិកភណ្ឌវប្បធម៌អរូបី រួមមាន ការសម្ដែងសិល្បៈទស្សនីយភាព, ចាប៉ីដងវែង, ល្ខោនខោល, ល្ខោនបាសាក់, របាំប្រពៃណី, ការផលិត និងបង្ហាត់ឧបករណ៍ភ្លេងបុរាណ, គុនល្បុក្កតោ, តម្បាញ, ស្មូន, ការរៀបចំកិច្ច និងគ្រឿងរណ្ដាប់, ការសូត្រកំណាព្យ, សិល្បៈសូនរូប, សិល្បៈសិប្បកម្មប្រពៃណី, សិល្បៈវប្បធម៌ជនជាតិដើមភាគតិច, សកម្មភាពបង្ហាញស្នាដៃ និងការបន្តវេនរបស់មរតមនុស្សរស់, សកម្មភាពបណ្ដុះបណ្ដាលជំនាញមរតកដូនតានៅតាមសហគមន៍, កិច្ចប្រារព្ធពិធី និងការលេងល្បែងប្រជាប្រិយជាដើម។

លក្ខខណ្ឌនៃបេក្ខជនទាំងអស់ ត្រូវគោរពតាមលក្ខខណ្ឌនៃកម្មវិធីដូចជា ៖ រូបថតស្ដីពីទិដ្ឋភាពនៃសម្បត្តិបេតិកភណ្ឌវប្បធម៌អរូបីរបស់កម្ពុជា ស្នាដៃថតរូបដោយជនជាតិខ្មែរ បេក្ខជនម្នាក់ត្រូវជ្រើសរើសស្នាដៃរូបថតរបស់ខ្លួនចូលរួមប្រកួត (ចំនួនប្រាំរូបថត) រូបថតពណ៌ធម្មជាតិ ភ្លឺច្បាស់ ជារូបដើម( មិនប្រើបច្ចេកទេសកាត់ត) រូបដែលបានថតមិនលើសពីរយៈពេល១២ខែគិតត្រឹមថ្ងៃប្រឡង ទំហំរូបថតចាប់ពី១០MB ឡើងក្នុងមួយរូប និងជាស្នាដៃថតដែលមិនធ្លាប់ជាប់ជ័យលាភីកន្លងមក។ ចំពោះស្នាដៃរូបថតដែលថតដោយជនបរទេស មិនអាចដាក់ពាក្យចូលរួមតាំងពិព័រណ៍រូបថតឡើយ។

ដើម្បីដាក់ពាក្យ ៖ បេក្ខជនត្រូវទៅដាក់ពាក្យដោយផ្ទាល់នៅលេខាធិការដ្ឋាននៃគណៈកម្មការរៀបចំស្នាដៃរូបថតឆ្នាំ២០២៥ នៅនាយកដ្ឋានអភិវឌ្ឍន៍វប្បធម៌ នៃអគ្គនាយកដ្ឋានបច្ចេកទេសវប្បធម៌ របស់ក្រសួងវប្បធម៌ និងវិចិត្រសិល្បៈ ដោយ ភ្ជាប់ពាក្យស្នើសុំចូលរួមប្រកួតប្រជែង ចំនួន១ច្បាប់ (មានគំរូ) ស្នាដៃរូបថតចំនួន៥ (ក្នុងមួយនាក់) រូបថតរបស់បេក្ខជន-បេក្ខនារី ៤x៦ ចំនួន២សន្លឹក (ផ្ទៃក្រោយពណ៌ស) និងអត្តសញ្ញាណបណ្ណថតចម្លង ចំនួន១ច្បាប់ ឬអាចដាក់ពាក្យស្នើតាមរយៈ ពាក្យស្នើសុំចូលរួមប្រកួតប្រជែង ។

សម្រាប់ព័ត៌មានបន្ថែមអាចទំនាក់ទំនងទៅកាន់ លោក ប៊ូ នីន ០៩២ ៩៧ ៩២ ៨៦ និង កញ្ញា យស់ ធុច ០១៦ ៤៣៦ ៣៤៤ ។

ចាប់ទទួលពាក្យចូលរួមពីថ្ងៃជូនដំណឹងរហូតដល់ ថ្ងៃទី៥ ខែតុលា ឆ្នាំ២០២៥៕