ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចុប្បន្ន មានសិស្សភៀសខ្លួនសរុប ១,៨៩៨នាក់ ក្នុងនោះសិស្សស្រី ៩២៨នាក់ នៅភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ កំពុងទទួលបានការគាំទ្រផ្នែកអប់រំ ខណៈសាលារៀននៅតំបន់នេះកំពុងទទួលបានសម្ភារៈសិក្សា និងសម្ភារៈគាំទ្រពីអង្គការ Action Education ដើម្បីធានាឱ្យកុមារដែលបានភៀសខ្លួនអាចបន្តការសិក្សាបាន។
ចាប់តាំងពីខែមេសា ឆ្នាំ២០២៦ ភូមិរង់ចាំបានចាប់ផ្តើមបើកថ្នាក់រៀន ដើម្បីគាំទ្រសិស្សដែលបានភៀសខ្លួនដោយសារសង្គ្រាមកម្ពុជា–ថៃ និងមិនទាន់អាចត្រឡប់ទៅលំនៅឋានវិញបាន។
លោក វន សំភាស់ នាយកអង្គការ Action Education បានប្រគល់សម្ភារៈសិក្សា និងសម្ភារៈគាំទ្រជាច្រើន តាមរយៈ ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ជូនដល់សាលារៀនចំនួន៥ នៅក្នុងភូមិរង់ចាំ។
សាលារៀនទាំង៥ ដែលទទួលបានការគាំទ្រ រួមមាន សាលាបឋមសិក្សាព្រៃចាន់ សាលាបឋមសិក្សាជោគជ័យ សាលាបឋមសិក្សាសាមគ្គីច្រក សាលាបឋមសិក្សាបន្ទាយមានឫទ្ធិ និងអនុវិទ្យាល័យបន្ទាយមានឫទ្ធិ។
សម្ភារៈដែល Action Education ផ្តល់ជូន រួមមាន កង់ ២០៧គ្រឿង អង្ករ ១០,៤តោន សៀវភៅបណ្ណាល័យ៥ឈុត ស្មើ៥០០ក្បាល សៀវភៅសិក្សា៤,០០០ក្បាល កុំព្យូទ័រ៧០គ្រឿង LCD ១គ្រឿង កាតាប៦០ តុសិស្ស៥០ សម្ភារៈកីឡា៥ឈុត និងសម្លៀកបំពាក់កីឡា២,០០០កំប្លេ។
ក្រៅពីនេះ ក៏មានគ្រឿងឧបភោគបរិភោគ ដូចជា គុយទាវ ទឹកដោះគោ និងនំ គ្រាប់ពូជបន្លែ៥០កញ្ចប់ ភួយ១០០ និងកៅស៊ូតង់៦០ ផងដែរ។
ការគាំទ្រក៏មិនកំណត់ត្រឹមសម្ភារៈសិក្សានោះទេ។ ចាប់តាំងពីខែកក្កដា ឆ្នាំ២០២៦ ក្រសួងអប់រំ យុវជន និងកីឡា បានចាប់ផ្តើមផ្តល់អាហារដល់សិស្សភៀសខ្លួនជាបន្តបន្ទាប់ ដើម្បីឆ្លើយតបទៅនឹងតម្រូវការអាហារូបត្ថម្ភ និងជួយឱ្យកុមារអាចផ្តោតលើការរៀនសូត្របានកាន់តែប្រសើរ។
ឯកឧត្តមបណ្ឌិតសភាចារ្យ ហង់ ជួនណារ៉ុន បានកោតសរសើរចំពោះ Action Education ដែលបានចូលរួមយ៉ាងសកម្មក្នុងការជួយជ្រោមជ្រែងកុមារ និងសាលារៀននៅតាមតំបន់ព្រំដែន ដោយចាត់ទុកជំនួយនេះថា ជាកម្លាំងចិត្តសម្រាប់សិស្សានុសិស្ស និងគ្រូបង្រៀនដែលកំពុងជួបការលំបាក។
លោក វន សំភាស់ នាយក Action Education បានមានប្រសាសន៍ថា ជំនួយទាំងនេះមានសារៈសំខាន់ក្នុងការគាំទ្រការអប់រំ និងជួយសម្រាលការលំបាករបស់សិស្សានុសិស្សនៅតំបន់ព្រំដែន។
លោកបន្តថា អង្គការ Action Education ជឿជាក់ថា ការគាំទ្រដល់សាលារៀន និងកុមារនៅពេលនេះ គឺជាការចូលរួមកសាងឱកាសសម្រាប់អនាគតរបស់ពួកគេ។
សម្រាប់ Action Education កុមារមិនគួរត្រូវបាត់បង់ឱកាសរៀនសូត្រ ដោយសារវិបត្តិនោះឡើយ ហើយនៅពេលកុមារត្រូវបានបង្ខំឱ្យចាកចេញពីផ្ទះ ការអប់រំរបស់ពួកគេក៏មិនគួរត្រូវបង្ខំឱ្យផ្អាកដែរ៕
