កម្មវិធីទូរស័ព្ទដៃ App NoDrug ត្រូវ​បាន​ចាត់ទុកថា ជាមធ្យោបាយមួយដ៏មានប្រសិទ្ធភាពក្នុងការប្រើប្រាស់ ដើម្បីរាយការណ៍ពីបទល្មើសគ្រឿងញៀនក្នុងមូលដ្ឋានទៅកាន់សមត្ថកិច្ចជំនាញ សំដៅដល់ការបោសសម្អាតគ្រឿងញៀនចេញពីភូមិឋានរបស់ប្រជាពលរដ្ឋ ស្របតាមគោលនយោបាយរបស់រាជរដ្ឋាភិបាលកម្ពុជា។

ចាប់តាំងពីដាក់​ឱ្យដំណើរការ​កាលពីដើមឆ្នាំ២០២៤ រហូត​មក​ដល់ពេលនេះ កម្មវិធីទូរស័ព្ទដៃ App NoDrug មានអ្នកប្រើប្រាស់ជាង៥ម៉ឺននាក់ ខណៈអ្នករាយការណ៍អំពីបញ្ហាគ្រឿងញៀនជិត៣ពាន់ករណី និងដោះស្រាយបានជិត២ពាន់ករណី។

ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ ក្រសួងមហាផ្ទៃ មានប្រសាសន៍ថា កម្មវិធីទូរស័ព្ទដៃ App NoDrug នឹងផ្ដល់ភាពងាយស្រួលដល់ប្រជាពលរដ្ឋប្រើប្រាស់ ដើម្បីរាយការណ៍អំពីបទល្មើសគ្រឿងញៀនក្នុងមូលដ្ឋានទៅកាន់សមត្ថកិច្ចជំនាញ ដោយធានាសុវត្ថិភាព និងរក្សាភាពឯកជនរបស់អ្នករាយការណ៍។

ក្នុងវគ្គបណ្ដុះបណ្តាលជនបង្គោល ប្រយុទ្ធប្រឆាំងការប្រើប្រាស់គ្រឿងញៀន នៅក្រសួងព័ត៌មាន កាលពីដើមខែតុលា ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ ក្រសួងមហាផ្ទៃ បានស្នើសុំដល់គ្រប់សមាសភាពទាំងអស់ត្រូវបន្តចូលរួមចំណែកក្នុងការងារជាតិប្រឆាំងគ្រឿងញៀនតាមរយៈការបញ្ជ្រាបខ្លឹមសារ ក្នុងកម្មវិធីផ្សេងៗ ការបង្កើតមាតិកាអប់រំ ពីបញ្ហាគ្រឿងញៀន និងផ្សព្វផ្សាយលើកកម្ពស់ការទាញយកប្រើប្រាស់ App NoDrug ដែលជាមធ្យោបាយតភ្ជាប់ប្រជាពលរដ្ឋទៅនឹងសមត្ថកិច្ចឱ្យបានកាន់តែច្រើនបន្ថែមទៀត ដើម្បីកាត់បន្ថយឈានទៅលុបបំបាត់បញ្ហាគ្រឿងញៀននៅក្នុងសហគមន៍។

សូមជំរាបជូនដែរថា ក្នុង​អាណត្តិ​រាជរដ្ឋាភិបាល​នីតិកាល​ទី ៧ នេះ រាជរដ្ឋាភិបាល បាន​ចាត់ទុក​បញ្ហា​គ្រឿងញៀន​គឺជា​កិច្ច​ការងារ​អាទិភាព​ចម្បង​ទី ៤ ដែល​ចាំបាច់​ត្រូវ​យកចិត្តទុកដាក់​គិតគូរ​ក្នុង​ការ​ទប់ស្កាត់ និង​បង្ក្រាប​ឱ្យ​មាន​ប្រសិទ្ធភាព​ខ្ពស់​បំផុត។

យោងតាមរបាយការណ៍ថ្មីៗរបស់នាយកដ្ឋានប្រឆាំងគ្រឿងញៀន ចាប់ពីខែមករាដល់ខែមិថុនាឆ្នាំនេះ អាជ្ញាធរបានចាប់ខ្លួនជនសង្ស័យគ្រឿងញៀនចំនួន ១២ ៧២៨នាក់ ពោលគឺកើនឡើង ៨% បើធៀបនឹងរយៈពេលដូចគ្នាកាលពីឆ្នាំមុន៕