ថ្លែងក្នុងទិវាគ្រូបង្រៀន ក្រោមប្រធានបទ “គ្រូបង្រៀនជាសសរស្ដម្ភ នៃកំណែទម្រង់សាលារៀនឆ្ពោះទៅរកឧត្ដមភាព” នាព្រឹកថ្ងៃទី០៥ តុលា ២០២៣ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ក្រសួងអប់រំផ្ដោតកិច្ចការគន្លឹះ៨ចំណុច ដើម្បីឆ្លើយតបការពង្រឹងគុណភាពសាលារៀនរដ្ឋ ចាប់ពីកម្រិតមត្តេយ្យសិក្សាដល់មធ្យមសិក្សាធានាឱ្យការអនុវត្តដំណើរការដោយរលូន។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍បញ្ជាក់ថា នៅក្នុងសម័យប្រជុំដំបូងគណៈរដ្ឋមន្រ្តីសម្រាប់នីតិកាលទី៧ សម្តេចមហាបវរធិបតីនាយករដ្ឋមន្ត្រី បានដាក់ចេញអនុសាសន៍ សំដៅលើកកម្ពស់គុណភាពអប់រំ ដោយផ្តោតសំខាន់លើការពង្រឹងគុណភាពសាលារៀនរដ្ឋ ចាប់ពីកម្រិតមត្តេយ្យសិក្សាដល់មធ្យមសិក្សា តាមរយៈការដាក់ឱ្យអនុវត្តនូវវិធានការគន្លឹះ ៤ រួមមាន ១. ការពង្រឹងអភិបាលកិច្ចសាលារៀន, ២. ការពិនិត្យ កែសម្រួល និងរៀបចំឡើងវិញនូវកម្មវិធីសិក្សា និងសកម្មភាពក្រៅម៉ោងសិក្សាដើម្បីឆ្លើយតបទៅនឹងតម្រូវការក្នុងការពង្រឹង និងពង្រីកចំណេះដឹង វិន័យ សីលធម៌ និងឥរិយាបថរបស់សិស្ស, ៣. ការបង្កើនការយកចិត្តទុកដាក់ចំពោះសុខភាពរបស់សិស្សតាមរយៈការអនុវត្តកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន, ៤. ការជំរុញ និងលើកទឹកចិត្តដល់មាតាបិតា អាណាព្យាបាល និងសហគមន៍ក្នុងការចូលរួមការងារអប់រំសិស្សក្រោមពាក្យស្លោក ភាពជាដៃគូ រដ្ឋ និងសហគមន៍ដើម្បីការអប់រំ។

ឯកឧត្តមឧបនាយករដ្ឋមន្ត្រី បន្ថែមថា ដើម្បីឆ្លើយតបនឹងអនុសាសន៍ខាងលើ ក្រសួងអប់រំ យុវជន និងកីឡាបានបង្កើត «គណៈកម្មការពង្រឹងអភិបាលកិច្ចសាលារៀន» ឆ្ពោះទៅលើកកម្ពស់គុណភាពអប់រំ ដោយមាន អនុគណៈកម្មការបច្ចេកទេសតាមអនុវិស័យ រួមមាន ១. កុមារតូច ២. បឋមសិក្សា ៣. មធ្យមសិក្សា ៤. សុខភាពសិក្សា ៥. ការអនុវត្តកម្មវិធីក្រៅម៉ោងសិក្សា ដើម្បីគាំទ្រដល់ការអនុវត្តនៅកម្រិតសាលារៀន។ ជាមួយគ្នានេះ ក្រសួងនឹងរៀបចំយន្តការវាយតម្លៃថ្នាក់ជាតិ និងថ្នាក់ខេត្ត ក្នុងគោលដៅធានាការអនុវត្តកំណែទម្រង់ខាងលើនេះ នៅកម្រិតគ្រឹះស្ថានសិក្សា ប្រកបដោយតម្លាភាព និងប្រសិទ្ធភាព ដោយមានការចូលរួមយ៉ាងសកម្មពីមន្ទីរអប់រំ យុវជន និងកីឡា ទាំង ២៥ និងរៀបចំការប្រឡងប្រណាំងរវាងខេត្ត និងខេត្តទៀតផង។

បើតាមប្រសាសន៍ ឯកឧត្តមបណ្ឌិតសភាចារ្យ ហង់ជួន ណារ៉ុន ដើម្បីធានាឱ្យការអនុវត្តខាងលើដំណើរការដោយរលូន ក្រសួងនឹងផ្ដោតលើកិច្ចការគន្លឹះ៨ចំណុច រួមមាន៖

ទីមួយ- ការធ្វើបច្ចុប្បន្នកម្ម «ផែនការសកម្មភាពគោលនយោបាយគ្រូបង្រៀន ២០២៤-២០២៨»។

ទីពីរ- ការបង្កើតប្រព័ន្ធព័ត៌មានវិទ្យាគ្រប់គ្រងសាលារៀន ដើម្បីផ្ដល់ព័ត៌មានទាន់ពេលវេលា សម្រាប់ការគ្រប់គ្រងសាលារៀន ប្រកបដោយប្រសិទ្ធភាព និងលើកកម្ពស់ការអប់រំឌីជីថល។

ទីបី- ការសិក្សាជាប្រចាំស្តីពីការពង្រាយគ្រូ,ចំនួនគ្រូលើស និងគ្រូខ្វះនៅតាមសាលារៀន និងដាក់ចេញនូវវិធានការជាកញ្ចប់ សម្រាប់ការពង្រាយគ្រូ។

ទីបួន- ការសិក្សា និងកំណត់ឡើងវិញតំបន់ដាច់ស្រយាល និងតំបន់ជួបការលំបាក ដើម្បីផ្តល់ការលើកទឹកចិត្ត និងការការគាំទ្រជាកញ្ចប់ ដូចជាការតម្លើងថ្នាក់តាមបែបពន្លឿន ការកសាងផ្ទះគ្រូ ។

ទីប្រាំ- ការរៀបចំឡើងវិញគោលការណ៍បែងចែកគ្រូបង្រៀន ដោយតម្រូវឱ្យគ្រូចេញថ្មីត្រូវចុះកិច្ចសន្យាទៅបម្រើការងារក្នុងតំបន់ខ្វះគ្រូក្នុងរយៈពេលកំណត់មួយ មុននឹងអាចផ្លាស់ទៅបំពេញភារកិច្ចជាអចិន្ត្រៃយ៍តាមសាលាគោលដៅ។

ទីប្រាំមួយ- ការពង្រាយគ្រូឡើងវិញ ដោយផ្ដល់ការលើកទឹកចិត្តជាកញ្ចប់ក្នុងមួយលើកតាមអនុសាសន៍របស់សម្តេចធិបតី។

ទីប្រាំពីរ- ការរៀបចំស្តង់ដាផ្តល់សេវាអប្បរមារបស់គ្រូបង្រៀន និងនាយកសាលារៀន និងយន្តការចុះកិច្ចសន្យាការងារប្រចាំឆ្នាំរបស់បុគ្គលិកអប់រំ។

ទីប្រាំបី- ការអនុវត្តគន្លងអាជីពសម្រាប់គ្រូបង្រៀន គណៈគ្រប់គ្រង និងអ្នកឯកទេសអប់រំ៕