ភ្នំពេញ- ក្រសួងអប់រំ យុវជន និងកីឡា ប្រកាសជ្រើសរើសប្រតិភូយុវជនចំនួន៤រូប ក្នុងនោះប្រុស២រូប ស្រី២រូបដើម្បីចូលរួមក្នុងកម្មវិធីកិច្ចសន្ទនាយុវជនអាស៊ានឆ្នាំ២០២៣ ក្រោមមូលបទ “ការអភិវឌ្ឍឌីជីថលសម្រាប់គោលដៅអភិវឌ្ឍន៍ប្រកបដោយចីរភាព (Digital Development for Sustainable Development Goals)”។
កិច្ចសន្ទនាយុវជនអាស៊ាន (AYD) មានបំណងដើម្បីផ្តល់វេទិកាសន្ទនាសម្រាប់តំណាងយុវជនក្នុងតំបន់អាស៊ាន និងកំណត់ដំណោះស្រាយសម្រាប់បញ្ហាប្រឈម និងដោះស្រាយសក្តានុពលរបស់ពួកគេក្នុងឱកាសឌីជីថល ភាពជាសហគ្រិន និងការអនុវត្ត SDGs ។ លើសពីនេះ ដើម្បីស្វែងរកមធ្យោបាយនៃកិច្ចសហប្រតិបត្តិការ ដែលអាចធ្វើទៅបាន ដើម្បីពង្រឹងភាពជាដៃគូសម្រាប់ការពង្រឹងសមត្ថភាពយុវជន។
លក្ខខណ្ឌនៃការចូលរួម បេក្ខជនត្រូវមានសញ្ជាតិខ្មែរ និងមានអាយុចន្លោះពី ១៨ដល់៣០ ឆ្នាំ (គិតមកដល់ថ្ងៃចូលរួមកម្មវិធី) ។ បេក្ខជនត្រូវតែមានជំនាញក្នុងប្រព័ន្ធអប់រំ និងបណ្តុះបណ្តាល ព័ត៌មាន ទំនាក់ទំនង និងបច្ចេកវិទ្យា (ICT) ក៏ដូចជាការអភិវឌ្ឍន៍រួមបញ្ចូល និងប្រកបដោយនិរន្តរភាពនឹងក្លាយជាអត្ថប្រយោជន៍មួយ។ លើសពីនេះ បេក្ខជនត្រូវមានជំនាញប្រើប្រាស់ភាសាអង់គ្លេសបានល្អ មានលិខិតឆ្លងដែនដែលមានសុពលភាពរហូតដល់ថ្ងៃទី១៥ ខែធ្នូ ឆ្នាំ ២០២៣ និងត្រូវតែអាចចូលរួមក្នុងកម្មវិធី (Video Conference) និងនៅក្នុងព្រឹត្តិការណ៍ជាក់ស្តែងនៅទីក្រុងហ្សាកាតា ប្រទេសឥណ្ឌូនេស៊ី។
បេក្ខជនដែលចាប់អារម្មណ៍អាចដាក់ពាក្យតាមរយៈ https://forms.gle/VFapgxVuHjDNC8or8 ។ ផុតកំណត់ទទួលពាក្យរហូតដល់ថ្ងៃទី២៦ ខែមីនា ឆ្នាំ២០២៣ វេលាម៉ោង ១១:៥៩ នាទីយប់។ សម្រាប់ព័ត៌មានបន្ថែម [email protected] ។
សូមជម្រាបថា កិច្ចសន្ទនាយុវជនអាស៊ានឆ្នាំ២០២៣ នឹងក្លាយជាវេទិកាសម្រាប់យុវជនកម្ពុជាគ្រប់ស្រទាប់ ដែលមានបំណងចង់យល់ដឹង រៀនសូត្រ និងចង់ធ្វើការពិភាក្សាអំពីអាស៊ាន ក៏ដូចជាបង្ហាញសមត្ថភាព និងទេពកោសល្យរបស់ខ្លួននៅលើឆាកអន្តរជាតិ៕