ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីជាជំនួយទៅដល់សិស្សានុសិស្សក្នុងការជ្រើសរើសជំនាញ បន្ទាប់ពីបញ្ចប់ថ្នាក់វិទ្យាល័យ ក្នុងពិធីសំណេះសំណាលជាមួយសិស្សថ្នាក់ទី១២ ដែលត្រៀមប្រឡងសញ្ញាបត្រមធ្យមសិក្សាទុតិយភូមិ នៅវិទ្យាល័យ ហ៊ុនសែន ខ្ចៅ ខេត្តកំពង់ចាម កាលពីពេលថ្មីៗនេះ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា បន្ទាប់ពីជោគជ័យក្នុងការប្រឡងបាក់ឌុប សិស្សានុសិស្សត្រូវយកចិត្តទុកដាក់លើការជ្រើសរើសជំនាញឱ្យសមស្របតាមសមត្ថភាព ឧបនិស្ស័យ និងចំណង់ចំណូលចិត្តរបស់ខ្លួន ដើម្បីបង្ការការសម្រេចចិត្តខុសមួយគ្រានាំឱ្យខាតបង់ទាំងពេលវេលា និងធនធាន។
ជាមួយគ្នានេះ ឯកឧត្ដមបណ្ឌិតសភាចារ្យ ហង់ជួន ណារ៉ុន ក៏បានលើកទឹកចិត្តសិស្សត្រៀមប្រឡងទាំងអស់ ឱ្យបន្តខិតខំប្រឹងប្រែងរៀនសូត្របន្ថែម និងបំពេញចន្លោះខ្វះខាតផ្សេងៗ ជាពិសេសត្រូវថែទាំសុខភាព សម្រាក និងហូបចុកឱ្យបានគ្រប់គ្រាន់ដើម្បីធ្វើឱ្យបានល្អអំឡុងពេលប្រឡង។
យោងតាមរបាយការណ៍ប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៤ អត្រាជាប់របស់សិស្សានុសិស្សវិទ្យាល័យ ហ៊ុនសែន ខ្ចៅ បានកើនឡើងដល់៩៣%។ រដ្ឋមន្ត្រីក្រសួងអប់រំ បញ្ជាក់ថា ការខិតខំប្រឹងប្រែងរៀនសូត្ររបស់សិស្សានុសិស្ស ជាកត្តាចម្បងធ្វើឱ្យលទ្ធផលការសិក្សាបន្តរីកចម្រើនឡើង។
ឯកឧត្ដមបណ្ឌិតសភាចារ្យ ហង់ជួន ណារ៉ុន រំពឹងថា សិស្សវិទ្យាល័យ ហ៊ុនសែន ខ្ចៅ នឹងព្យាយាមសម្រេចឱ្យបានអត្រាប្រឡងជាប់១០០% ក្នុងការប្រឡងសញ្ញាបត្រមធ្យមសិក្សាទុតិយភូមិនាពេលខាងមុខនេះ។
រដ្ឋមន្ត្រីក្រសួងអប់រំ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់គណៈគ្រប់គ្រង លោកគ្រូ អ្នកគ្រូ និងក្រុមការងារពាក់ព័ន្ធទាំងអស់ ដែលបានយកអស់ពីកំលាំងកាយចិត្តប្រាជ្ញាស្មារតី ដឹកនាំបង្ហាត់បង្រៀនសិស្សានុសិស្សឱ្យទទួលបានលទ្ធផលល្អក្នុងការសិក្សា និងបានប្រែក្លាយសាលាទៅសាលារៀនគំរូប្រកបដោយសោភណភាព និងបរិស្ថានសិក្សាស្រស់បំព្រង និងសូមឱ្យបន្តរក្សាស្មារតីប្រឹងប្រែងសហការគ្នាឱ្យកាន់តែរឹងមាំដើម្បីឈានទៅសម្រេចសមិទ្ធផលរួមគ្នាជាច្រើនបន្ថែមទៀត៕
