ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងពិធីប្រកាសដាក់ឱ្យអនុវត្តស្តង់ដាសាលាបឋមសិក្សាគំរូ សៀវភៅអភិវឌ្ឍកុមារផ្សារភ្ជាប់នឹងការអប់រំបឋមសិក្សា និងសៀវភៅពន្លឿនការសិក្សាភាសាខ្មែរថ្នាក់ទី១ នាព្រឹកថ្ងៃទី១២ ខែមករា ឆ្នាំ២០២៤ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការដាក់ឱ្យអនុវត្តស្តង់ដាសាលារៀនគំរូ មានគោលដៅដើម្បីលើកកម្ពស់កំណែទម្រង់វិស័យអប់រំពីមត្តេយ្យសិក្សាទៅមធ្យមសិក្សា ហើយគ្របដណ្ដប់លើគ្រប់ទិដ្ឋភាពទាំងអស់នៃការអប់រំ។
ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍បញ្ជាក់ថា ការអនុវត្តស្តង់ដាសាលារៀនគំរូ បានផ្សារភ្ជាប់ពីការបណ្ដុះបណ្ដាលគ្រូ ការបណ្ដុះបណ្ដាលនាយក ទាំងការរៀន និងការបង្រៀននៅក្នុងសាលារៀន ហើយផ្ដោតលើការជួយគាំទ្រគ្រប់បែបយ៉ាងរបស់ដៃគូអភិវឌ្ឍ អាជ្ញាធរមូលដ្ឋាន ក៏ដូចជាមាតាបិតាសម្រាប់ការអភិវឌ្ឍសាលារៀន។
រដ្ឋមន្រ្តីក្រសួងអប់រំ មានប្រសាសន៍ថា ប្រសិនចង់ឱ្យប្រទេសកម្ពុជាអភិវឌ្ឍន៍ គឺត្រូវចាប់ផ្ដើមពីសាលារៀនធ្វើយ៉ាងណាឱ្យសិស្សមានចំណេះដឹងទូលំទូលាយក្លាយទៅជាពលរដ្ឋល្អនៅក្នុងសតវត្សរ៍ទី២១។ ទន្ទឹមគ្នានេះ ប្រសិនបើយើងអាចប្រែក្លាយគ្រឹះស្ថានសិក្សាប្រមាណពី ២០%ទៅ៣០% ឱ្យក្លាយទៅជាសាលាគំរូ នោះគោលដៅនេះនឹងចាប់ផ្ដើមជោគជ័យ។
ខ្ញុំជឿជាក់ថាប្រសិនបើយើងទាំងអស់គ្នាមានការប្ដេជ្ញាចិត្ត យើងនឹងអាចអនុវត្តបាននូវចក្ខុវិស័យរបស់សម្ដេចធិបតីនាយករដ្ឋមន្រ្តីកម្ពុជាដែលចង់ឃើញថា សាលារដ្ឋពីថ្នាក់មត្តេយ្យរហូតដល់ថ្នាក់ទី១២ មានគុណភាព… ហើយយើងអាចកែលម្អការសិក្សារៀនសូត្រ ជាពិសេសការផ្ដោតទៅលើបំណិនសតវត្សទី២១
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា
ឯកឧត្តមបណ្ឌិតសភាចារ្យ ហង់ជួន ណារ៉ុន លើកឡើងថា នៅឆ្នាំ២០២៤នេះ បច្ចេកវិទ្យាបានឈានទៅដល់កម្រិតមួយដែលលឿន ហើយទាមទារឱ្យវិស័យអប់រំត្រូវតែឆ្លើយតប។ ទន្ទឹមគ្នានេះ ប្រសិនបើយើងមិនអាចកែប្រែសាលារៀនបាន មិនអាចបង្កលក្ខណៈឱ្យសិស្សានុសិស្សមានការយល់ដឹងទូលំទូលាយ ចេះគិត និងចេះអនុវត្ត ក៏ដូចជាចេះប្រើប្រាស់បច្ចេកវិទ្យា នោះក៏យើងមិនអាចអនុវត្តចក្ខុវិស័យកម្ពុជា ឆ្នាំ២០៣០ ឱ្យក្លាយជាប្រទេសដែលមានប្រាក់ចំណូលមធ្យម ជាពិសេសមិនអាចទាក់ទាញអ្នកវិនិយោគខាងផ្នែកបច្ចេកវិទ្យាឱ្យចូលមកដាក់ទុនវិនិយោគនៅកម្ពុជាបានឡើយ។ ឯកឧត្តមបណ្ឌិតសភាចារ្យ បន្តថា ម៉ោងនេះ សិស្សនៅប្រទេសផ្សេងទៀត នៅកម្រិតបឋមសិក្សាក្ដី មធ្យមសិក្សាក្ដី គេកំពុងនិយាយអំពីបញ្ញាសិប្បនិម្មិត (AI) ។ តើទៅថ្ងៃអនាគតបច្ចេកវិទ្យានេះ នឹងធ្វើឱ្យមានផលប៉ះពាល់យ៉ាងដូចម្ដេចសម្រាប់វិស័យអប់រំ? នេះជាបញ្ហាធំមួយប្រសិនបើយើងមិនបង្កលក្ខណៈឱ្យសាលារៀនយល់ដឹង ឱ្យគ្រូអាចស្វែងយល់ខ្លួនឯង អំពីនិន្នាការនៃការអភិវឌ្ឍបច្ចេកវិទ្យាទេ គឺយើងដើរមិនទាន់គេនោះឡើយ។
ឯកឧត្តមរដ្ឋមន្រ្តីបានលើកជាឧទាហរណ៍ថា សាលាឯកជនកម្រិតមធ្យមសិក្សានៅរាជធានីភ្នំពេញ ប្រសិនបើគ្រូបង្រៀនសិស្សឱ្យចេះស្រាវជ្រាវ ចេះតាមដានការវិវត្តសភាពការណ៍ ទាំងផ្នែកអប់រំ បច្ចេកវិទ្យា សិស្សដែលរៀនចប់កម្រិតវិទ្យាល័យ គឺអាចដឹងបាននូវនិន្នាការធំៗលើពិភពលោកទាំងផ្នែកបច្ចេកវិទ្យា ក៏ដូចជាវិទ្យាសាស្រ្ត ក៏ប៉ុន្តែសាកលវិទ្យាល័យមួយចំនួនតាមខេត្ត ប្រសិនបើមិនមានលក្ខខណ្ឌគ្រប់គ្រាន់សម្រាប់តាមដានទេ សូម្បីរៀនចប់បរិញ្ញាបត្រក៏មិនអាចដឹងពីនិន្នាការធំៗ និងបច្ចេកវិទ្យាបានដែរ។ នេះជាបញ្ហាគម្លាតរវាងទីក្រុង និងជនបទ ព្រមទាំងគម្លាតរវាងសាលាឯកជន និងសាលារដ្ឋ ។
យ៉ាងណាក៏ដោយ បើតាមប្រសាសន៍របស់រដ្ឋមន្រ្តីក្រសួងអប់រំ ប្រសិនបើយើងចង់ពង្រឹងគុណភាពអប់រំ កាត់បន្ថយគម្លាតនេះ គឺត្រូវបង្កើតបរិស្ថានមួយសម្រាប់ការសិក្សាស្រាវជ្រាវ ចាប់ផ្ដើមពីគ្រឹះស្ថានបណ្ដុះបណ្ដាលគ្រូ វិទ្យាល័យ ហើយផ្ដល់ឱ្យសិស្សមានឱកាសគ្រប់គ្រាន់ក្នុងការស្រាវជ្រាវ ស្វ័យសិក្សា និងឆ្លើយតប ជាពិសេសបណ្ដុះបំណិនសតវត្សរ៍ទី២១តែម្ដង៕
