ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានលើកឡើងថា ជំនាញមិនរើសអើងភេទនោះទេ ដោយបុរស និងស្រ្តី មានសិទ្ធិ និងឱកាសស្មើគ្នាក្នុងការចាប់យកជំនាញដែលខ្លួនពេញចិត្ត ដោយគ្មានការរើសអើង។
ក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារបន្តឆ្នាំ២០២៤ របស់ក្រសួងកិច្ចការនារី កាលពីរសៀលថ្ងៃទី១១ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត មានប្រសាសន៍ដោយធ្វើការកត់សម្គាល់ថា បច្ចុប្បន្នមានស្រ្តីកាន់តែច្រើនបានចូលរៀនជំនាញខាងបច្ចេកវិទ្យា ដែលនេះបានបង្ហាញថា ជំនាញគ្មានការរើសអើងភេទ ដូច្នេះយើងត្រូវតែបន្តជំរុញ និងផ្តល់ឱកាសដោយគ្មានការរើសអើង។ « ខ្ញុំមានការភ្ញាក់ផ្អើល នៅពេលដែលទៅមើលថ្ងៃមុននៅសាលាតិចឡូ មានការដាក់បង្ហាញសមត្ថភាពក្នុងការធ្វើរ៉ូបូត ធ្វើ AI ហើយភ្ញាក់ គឺចំនួនស្រ្តីខាងអ្នក IT … អញ្ចឹងបានន័យថា ជំនាញគ្មានរើសអើងភេទទេ សិទ្ធស្មើគ្នា ខិតខំស្មើគ្នា នៅក្នុងកងទ័ពកម្ពុជាយើង ក៏មាននារីបើករថក្រោះដែរ អញ្ចឹងឱកាសស្មើគ្នា ការផ្តល់ឱកាសស្មើគ្នា នៅក្នុងការចាប់យកនេះ យើងត្រូវបន្តជំរុញ និងផ្តល់ឱកាសដោយគ្មានការរើសអើង»។
ជាមួយគ្នានេះ សម្តេចធិបតីក៏បានមានប្រសាសន៍បញ្ជាក់ឱ្យដឹងដែរថា ប្រទេសកម្ពុជាទទួលបានចំណាត់ថ្នាក់ខ្ពស់បំផុត ជាប្រទេសផ្ដល់សេរីភាពទូលំទូលាយសម្រាប់ស្ត្រីក្នុងការចាប់ផ្ដើមធ្វើអាជីវកម្មនិងធុរកិច្ច ព្រមទាំងទទួលបានតួនាទីកាន់តែច្រើននៅក្នុងសមាសភាពស្ត្រីជាថ្នាក់ដឹកនាំនៅគ្រប់កម្រិតទាំងនៅក្នុងអង្គនីតិបញ្ញត្តិ អង្គនីតិប្រតិបត្តិ និងអង្គតុលាការ។ សម្ដេចធិបតីបានអះអាងថា បច្ចុប្បន្នេះ ស្ត្រីនៅក្នុងតួនាទីធ្វើសេចក្ដីសម្រេចចិត្តក្នុងវិស័យមុខងារសាធារណៈមានចំនួន២៧ភាគរយ និងមន្ត្រីរាជការជាស្ត្រីមានចំនួន ៤២ ភាគរយ។
សម្តេចធិបតីនាយករដ្ឋមន្រ្ដីបានថ្លែងបញ្ជាក់ថា វត្តមាននិងភាពជោគជ័យរបស់ស្ត្រីនៅក្នុងគ្រប់វិស័យ នៅក្នុងធុរកិច្ច ក្នុងសិល្បៈ កីឡា នៅក្នុងវិស័យសន្តិសុខ ការពារជាតិ ក៏ដូចជាតួនាទីនៅក្នុងការដឹកនាំ កាន់តែមានការរីកចម្រើន និងកាន់តែកើន ដែលនេះបញ្ជាក់ថាបើសិនជាផ្ដល់ឱកាសស្មើគ្នាស្ត្រីក៏មាននៅក្នុងការទាញយកនូវសក្ដានុពលដែលអាចធ្វើបាននិងមានជោគជ័យ។
សម្តេចធិបតីបន្តថា រាជរដ្ឋាភិបាលកម្ពុជាបានយកចិត្តទុកដាក់ជាខ្លាំងទៅលើតួនាទីរបស់ស្ត្រី នៅក្នុងការអភិវឌ្ឍសង្គម-សេដ្ឋកិច្ច តាមរយៈការធ្វើស្ថាប័ននូបណីយកម្ម និងការបញ្ជ្រាបយ៉េនឌ័រនៅតាមក្រសួង-ស្ថាប័ននានាទាំងនៅថ្នាក់ជាតិ និងក្រោមជាតិ ដោយបានផ្ដល់បរិយាកាសអំណោយផល និងកាលានុវត្តភាពដល់ស្ត្រី ចូលរួមប្រកបដោយសក្ដានុពល៕
